សកម្មជនបរិស្ថានម្នាក់ទៀតបានដោះលែង ខណៈកូនប្រុសសកម្មជនអតីតបក្សប្រឆាំងត្រូវលើកពេលដោះលែង
កញ្ញា អេង ម៉ាឡៃ ហៅ សូ មេត្តា ដែលជាសមាជិកយុវជនខ្មែរថាវរៈ ត្រូវបានដោះលែងចេញពីពន្ធនាគារ នៅល្ងាចថ្ងៃ៨តុលានេះ។ កញ្ញា សូ មេត្តា គឺជាមនុស្សទី៨ហើយ ដែលត្រូវបានដោះលែងនៅក្នុងសំណុំរឿង«ញុះញង់»រាប់ចាប់តាំងពីដើមខែតុលារហូតមកដល់ថ្ងៃទី៨វិច្ឆិកានេះ ដែលតុលាការផ្ដើមដោះលែងសកម្មជនបរិស្ថាន-សង្គម និងនយោបាយ។ រីឯកុមារា កាក់ សុវណ្ណច្ឆ័យ អាយុ១៧ឆ្នាំ ដែលគ្រោងដោះលែងចេញពីពន្ធនាគារនៅថ្ងៃទី៨វិច្ឆិកានេះ បែរត្រូវលើកពេលទៅនៅថ្ងៃទី១០វិច្ឆិកាវិញ។
ចុះផ្សាយនៅថ្ងៃ៖
ស្តាប់ - ០២:១២
កញ្ញា អេង ម៉ាឡៃ ហៅ សូ មេត្តា បានថ្លែងបញ្ជាក់ក្រោយដើរចេញពីខ្លោងទ្វារមណ្ឌលកែប្រែ (ម២)នៅរសៀលនេះថា ទោះជាក្រុមគ្រួសារមានស្ថានភាពលំបាក តែកញ្ញានៅតែបន្តធ្វើការងារសង្គមរហូតដល់នាងបាត់បង់ជីវិត ខណៈដែលសៀវភៅកំណត់ហេតុជាង១០ក្បាល ដែលនាងបានកត់ត្រាពីសកម្មភាពគ្រប់យ៉ាងនៅក្នុងពន្ធនាគារត្រូវបានមន្ត្រីពន្ធនាគារឆែកឆេរយកអស់។
កញ្ញា សូ មេត្តា ត្រូវបានអាជ្ញាធរចាប់ខ្លួន កាលពីថ្ងៃទី៧ កញ្ញា នៅខណ្ឌច្បារអំពៅ ហើយបញ្ជូនទៅតុលាការ ដោយចោទប្រកាន់ពីបទញុះញង់បង្កភាពវឹកវរធ្ងន់ធ្ងរ ដល់សន្តិសុខសង្គម។ ការចាប់ខ្លួននេះ ក្រោយពេលនាង និងយុវជនដទៃទៀត ព្យាយាមប្រមូលផ្ដុំគ្នាតវ៉ាសម្ដែងមតិ នៅទីលានប្រជាធិបតេយ្យថ្មី នៅខណ្ឌឫស្សីកែវ នៅឆ្នាំ២០២០។ ប៉ុន្តែកាលណោះគម្រោងនេះបានបរាជ័យ ដោយសារការរារាំងពីអាជ្ញាធរ។
ចំណែកសំណុំរឿងរបស់យុវជនមាតាធម្មជាតិចំនួនបីនាក់ដែលរួមមានៈ ថុន រដ្ឋា ភួន កែវរស្មី និង ឡុង គន្ធា ត្រូវបានតុលាបង្គាប់ឲ្យឃុំខ្លួននៅក្នុងសំណុំរឿង«រួមគំនិតក្បត់»មួយករណីទៀត។
នៅថ្ងៃទី៨វិច្ឆិកានេះ អង្គការលីកាដូក៏បានចេញកំណត់ហេតុខ្លីដោយបរិយាយពីការបន្តឃុំខ្លួនសកម្មជនមាតាធម្មជាតិចំនួន៣នាក់ នៅក្នុងសំណុំរឿងរួមគំនិតក្បត់មួយករណីទៀត ដែលជាហេតុធ្វើឲ្យការដោះលែងអ្នកទាំងបីពីពន្ធនាគារត្រូវបានបន្លាយពេល។ ហើយសវតានៃការចាប់ខ្លួនលោក ថុន រដ្ឋា កញ្ញាឡុង គន្ធា និងកញ្ញា ភួន កែវរស្មី ធ្វើឡើងក្រោយពួកគេរៀបចំគម្រោងដើរតវ៉ាដោយស្រ្តីម្នាក់ ឆ្ពោះទៅកាន់គេហដ្ឋានរបស់សម្ដេចនាយករដ្ឋមន្ត្រី ដើម្បីពិភាក្សាពីការលុបបឹងតាមោក នៅក្នុងរាជធានីភ្នំពេញ។
រាប់ចាប់តាំងពីចុងខែតុលារហូតមកដល់ថ្ងៃទី៨វិច្ឆិកានេះ មានសកម្មជនបរិស្ថាន និងនយោបាយ៨នាក់ហើយ រាប់ទាំងកញ្ញា សូ មេត្តា ត្រូវបានដោះលែងចេញពីពន្ធនាគារនៅក្នុងសំណុំរឿងញុះញង់ នៅថ្ងៃទី៨វិច្ឆិកានេះ។ ក្រៅពី សូ មេត្តា អ្នកផ្សេងទៀតរួមមាន៖ អ្នកស្រី សាត ផា ជាសកម្មជនម្នាក់ក្នុងចំណោមសកម្មជន១០នាក់ផ្សេងទៀត ដែលត្រូវបានចាប់ខ្លួន បន្ទាប់ពីនាំគ្នាទៅតវ៉ានៅមុខស្ថានទូតចិន កាលពីថ្ងៃទី២៣ ខែតុលា ឆ្នាំ២០២០។ បន្ទាប់មកលោក កើត សារ៉ាយ, លោក ថា ឡាវី ដែលជាសមាជិករបស់ក្រុមខ្មែរថាវរៈ និង លោក មាន ព្រហ្មមុនី ជាប្រធានសមាគមសម្ព័ន្ធនិស្សិតបញ្ញវន្តខ្មែរ រួមនឹងសកម្មជនអតីតគណបក្សសង្គ្រោះជាតិ២នាក់ទៀត គឺលោក ជុំ ពុទ្ធី និងលោក ឈួរ ផេង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ