លោក រ៉ុង ឈុន និងសកម្មជន២នាក់ នឹងត្រូវដោះលែង បន្ទាប់ពីឧទ្ធរណ៍កាត់តម្រឹមទោសនៅថ្ងៃនេះ
លោក រ៉ុង ឈុន និងសកម្មជន២នាក់ទៀត ត្រូវបានសាលាឧទ្ធរណ៍ប្រកាសសាលដីកា ដោយកាត់តម្រឹមទោស នៅថ្ងៃសុក្រនេះ ខណៈទោសដែលនៅសល់ត្រូវព្យូ។ នេះបើតាមការបញ្ជាក់របស់មេធាវីការពារក្តី។ ប៉ុន្តែលោក សំ សុគង់ នៅតែចាត់ទុកថា ការកាត់តម្រឹមទោសកូនក្តីរបស់លោកបែបនេះ គឺមិនមានយុត្តិធម៌ឡើយ ពីព្រោះកូនក្តីរបស់លោកត្រូវបន្តស្ថិតនៅក្រោមការត្រួតពិនិត្យតាមផ្លូវតុលាការ៣ឆ្នាំទៀត។
ចុះផ្សាយនៅថ្ងៃ៖
ស្តាប់ - ០១:៥៨
បើតាមសាលដីការបស់សាលាឧទ្ធរណ៍ លោក រ៉ុង ឈុន ត្រូវបានកាត់តម្រឹមទោសមកនៅតែ១ឆ្នាំ៣ខែ និង១១ថ្ងៃ គិតចាប់ពីថ្ងៃឃុំខ្លួន ខណៈដែលសាលាដំបូងបានកាត់ទោស អ្នករិះគន់បញ្ហាព្រំដែនរូបនេះចំនួន២ឆ្នាំ។
នៅក្នុងសំណុំរឿងជាមួយគ្នានេះដែរ កញ្ញា សរ កណិការ ដែលត្រូវបានចាប់ខ្លួនដោយសារតែការតវ៉ាឱ្យដោះលែងលោក រ៉ុង ឈុន ក៏ត្រូវបានសាលាឧទ្ធរណ៍កាត់តម្រឹមទោសមកនៅតែ១ឆ្នាំ៣ និង៥ថ្ងៃ ខណៈលោក តុន និមល ត្រូវកាត់ទោសមកនៅត្រឹមតែ១ឆ្នាំ២ខែនិង២៤ថ្ងៃ។ អ្នកទាំងពីរ ត្រូវបានសាលាដំបូងកាត់ទោសឱ្យជាប់ពន្ធនាគាររយៈពេល ២០ខែ។
ផ្អែកតាមសាលដីនេះ អ្នកទាំង៣ គឺត្រូវដោះលែងឲ្យមានសេរីភាពវិញនៅថ្ងៃទី១២វិច្ឆិកានេះ។ ប៉ុន្តែសម្រាប់ លោក តុន និមល គឺនៅមានជាប់បណ្តឹងក្នុងសំណុំរឿងមួយទៀតពាក់ព័ន្ធនឹងការដាក់ញត្តិនៅមុខស្ថានទូតចិន ដែលសំណុំរឿងនេះ សាលាដំបូងរាជធានីភ្នំពេញត្រូវបើកសវនាការនៅរសៀលថ្ងៃសុក្រនេះ។ នេះបើតាមការបញ្ជាក់របស់លោកមេធាវី សំ សុគង់។
លោក សំ សុគង់ នៅតែចាត់ទុកថា ការកាត់តម្រឹមទោសកូនក្តីរបស់លោកបែបនេះ គឺមិនមានយុត្តិធម៌ឡើយ ពីព្រោះកូនក្តីរបស់លោកត្រូវបន្តស្ថិតនៅក្រោមការត្រួតពិនិត្យតាមផ្លូវតុលាការ៣ឆ្នាំបន្តទៀត នៅក្រោមបទចោទប្រកាន់“ញុះញង់បង្កឱ្យមានភាពចលាចលសង្គម”។
ដោយចាត់ទុកថា ទាំងការចោទ និងការកាត់ទោស ដោយសាលាដំបូង មានភាពអយុត្តិធម៌ លោក សំ សុគង់ អះអាងថាកូនក្តីរបស់លោកនឹងប្តឹងសារទុក្ខទៅកាន់តុលាការកំពូលបន្តទៀត។
សូមបញ្ជាក់ថា លោក រ៉ុង ឈុន មេដឹកនាំសហជីព និងជាអតីតប្រធានសមាគមគ្រូបង្រៀនកម្ពុជាឯករាជ្យផងនោះត្រូវបានចាប់ខ្លួន កាលពីយប់ថ្ងៃ៣១ ខែកក្កដា ឆ្នាំ២០២០ ក្រោយពីលោកបានចុះទៅខេត្តត្បូងឃ្មុំហើយបានជួបប្រជាពលរដ្ឋនៅទីនោះដែលអះអាងថាដីរបស់ពួកគេត្រូវបានអាជ្ញាធរវៀតណាមហាមមិនឲ្យធ្វើស្រែចម្ការ ហើយការបោះបង្គោលព្រំដែនបានចូលមកទឹកដីកម្ពុជា។ ការចាប់ខ្លួនលោក រ៉ុង ឈុន នាំឲ្យមានការតវ៉ាពីសកម្មជនមួយចំនួន ហើយក៏មានមនុស្សជាង១០នាក់ទៀត ត្រូវបានចាប់ឃុំខ្លួនជាបន្តបន្ទាប់ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ