អ្នកនយោបាយខ្មែរផ្ញើសារជូនពរឆ្នាំថ្មីក្នុងន័យនយោបាយ
សារជូនពរឆ្នាំថ្មីពីអ្នកនយោបាយខ្មែរបានធ្លាក់មកជាបន្តបន្ទាប់។ ទាំងអ្នកនយោបាយកាន់អំណាច និងអ្នកនយោបាយបក្សជំទាស់សុទ្ធតែចង់ឃើញប្រជាជនខ្មែរមានសេចក្តីសុខ និងសុភមង្គលក្នុងឆ្នាំថ្មីនេះ។ ប៉ុន្តែឆ្លៀតក្នុងឱកាសនេះ អ្នកនយោបាយជើងចាស់ទាំងនោះក៏មិនភ្លេចឡើយសារជូនពរក្នុងនយោបាយ។
ចុះផ្សាយនៅថ្ងៃ៖
ស្តាប់ - ០២:២០
ដូចរៀងរាល់ឆ្នាំដែរ អ្នកនយោបាយជើងចាស់ខ្មែរមួយចំនួនបានផ្ញើសារជូនពរឆ្នាំថ្មីទៅដល់ប្រជាជនទូទាំងប្រទេសដោយឆ្លៀតភ្ជាប់នឹងអត្ថន័យនយោបាយ។
ប្រមុខរដ្ឋាភិបាលកម្ពុជា លោក ហ៊ុន សែន នៅតែឆ្លៀតប្រើពាក្យអរគុណសន្តិភាព នៅពីក្រោមសារជូនពរឆ្នាំថ្មីប្រកបដោយការក្រើនរំឭក កុំពិសាគ្រឿងស្រវឹងក្នុងពេលបើកបរ និងមានការប្រុងប្រយ័ត្នខ្ពស់ជានិច្ច ទោះបីបើកបរជិតឬឆ្ងាយ ដើម្បីសុវត្ថិភាព។ លើសពីនេះលោកក៏ប្រាប់ឲ្យអាជ្ញាធរ កងកម្លាំង មានសមត្ថកិច្ច យកចិត្តទុកដាក់ថែរក្សា ការពារសន្តិសុខ សណ្ដាប់ធ្នាប់ចរាចរណ៍ ជូនប្រជាពលរដ្ឋ ឲ្យបានល្អនៅតាមទីអារាម និងកន្លែងប្រារពពិធីកម្សាន្តផ្សេងៗ ក៏ដូចជាតាមរមណីយដ្ឋាននានា។
ក្នុងន័យនយោបាយវិញ លោក ហ៊ុន សែន សូមឲ្យប្រជាជនខ្មែរគ្រប់រូប រួមសាមគ្គីគ្នាជាមហាគ្រួសារខ្មែរតែមួយនៅលើទឹកដីមាតុភូមិអង្គរ ក្នុងឯករាជ្យ សន្តិភាព សេរីភាពប្រជាធិបតេយ្យ។
ចំណែក លោក កឹម សុខា បានផ្ញើសារឲ្យមាតុភូមិកម្ពុជាអមតៈជារបស់ខ្មែរគ្រប់គ្នា ដោយធានាបាននូវ ឯករាជ្យភាព អធិបតេយ្យភាព វឌ្ឍនភាព និងកិត្យានុភាពជាតិ និងឲ្យប្រជាពលរដ្ឋខ្មែរ ដែលជាម្ចាស់លើជោគវាសនាអនាគតខ្លួន មានឱកាសក្នុងការរស់នៅដោយសុខដុមរមនា មានសិទ្ធិសេរីភាព និងទទួលបាន នូវផលប្រយោជន៍ សេដ្ឋកិច្ច សង្គមកិច្ច វប្បធម៌និងនយោបាយ ប្រកបដោយសមធម៌និងយុត្តិធម៌ ដែលជាគ្រឹះនៃសន្តិភាពដ៏រឹងមាំ។
ក្នុងន័យនយោបាយ ប្រធានអតីតបក្សជំទាស់រូបនេះ បួងសូងឲ្យប្រជាជនខ្មែរចៀសផុតពីគ្រោះថ្នាក់នៃជម្លោះក្នុងពិភពលោក និងក្នុងតំបន់ ក៏ដូចជាក្នុងប្រទេសកម្ពុជាផងដែរ។
រីឯ លោក សម រង្ស៊ី តាមរយៈសារជាសំឡេងនៅលើហ្វេសប៊ុករបស់ខ្លួន អតីតប្រមុខបក្សប្រឆាំងរូបនេះសូមឲ្យប្រជាជនរក្សាជីវិតឲ្យបាន និងមានសុខភាពរឹងម៉ាំ នោះហើយគឺមានក្តីសង្ឃឹមក្នុងការទទួលបានជោគជ័យ។ លោក សម រង្ស៊ី ក៏ចង់ឲ្យប្រជាពលរដ្ឋខ្មែរបានស្គាល់នូវសេរីភាព និងយុត្តិធម៌ ពិតប្រាកដ។ យុត្តិធម៌ពិតប្រាកដ ដែលលោក សម រង្ស៊ី ក៏សំដៅផងដែរ ដល់ករណីគប់គ្រាប់បែកកាលពី២៥ឆ្នាំមុននៅជិតអតីតរដ្ឋសភា ខណៈដែលតុលាការប្រទេសបារាំងចេញដីកាចាប់ខ្លួនជនជាប់ពាក់ព័ន្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ