លោក សម រង្ស៊ី រំពឹងថា រដ្ឋាភិបាលថ្មីអូស្ត្រាលី នឹងដឹកដៃកម្ពុជាឱ្យដើរលើគន្លងលទ្ធិប្រជាធិបតេយ្យឡើងវិញ
មេដឹកនាំអតីតគណបក្សប្រឆាំង លោក សម រង្ស៊ី បង្ហាញក្តីរំពឹងថា រដ្ឋាភិបាលថ្មីរបស់អូស្រា្តលីដែលដឹកនាំដោយគណបក្សពលករនឹងអាចដឹកដៃកម្ពុជាឱ្យដើរលើគន្លងមាគ៌ាលទ្ធិប្រជាធិបតេយ្យឡើងវិញ ជាពិសេសឱ្យកម្ពុជាឈរលើគោលជំហរកិច្ចព្រមព្រៀងសន្តិភាពទីក្រុងប៉ារីស។ ក្តីរំពឹងរបស់លោក សម រង្ស៊ី ធ្វើឡើងបន្ទាប់ពីគណបក្សពលករដែលទើបតែជាប់ឆ្នោត តែងតែគាំទ្រដល់អ្នកតស៊ូដើម្បីការគោរពលទ្ធិប្រជាធិបតេយ្យ និងការគោរពសិទ្ធិមនុស្សនៅកម្ពុជា។
ចុះផ្សាយនៅថ្ងៃ៖
ស្តាប់ - ០២:១៦
នៅលើបណ្តាញសង្គមហ្វេសប៊ុកកាលពីថ្ងៃទី២១ ឧសភា លោក សម រង្ស៊ី មេដឹកនាំអតីតគណបក្សប្រឆាំង និងបច្ចុប្បន្នកំពុងរស់នៅក្រៅប្រទេស បានជួបតំណាងជាប់ឆ្នោតរបស់គណបក្សពលករអូស្រ្តាលីដែលទទួលបានជ័យជម្នះក្នុងការបោះឆ្នោតសហព័ន្ធកាលពីថ្ងៃទី២១ ឧសភា ឆ្នាំ២០២២កន្លងទៅ។
ក្នុងជំនួបពីទីក្រុងម៊ែលប៊ន ប្រទេសអូស្រ្តាលី លោក សម រង្ស៊ី បានថ្លែងទៅកាន់លោក Anthony Albanese មេដឹកនាំគណបក្សពលករថា លោកមានជំនឿខ្ពស់មែនទែន ចំពោះរដ្ឋាភិបាលថ្មីរបស់អូស្រា្តលីមួយនេះ ក្នុងការជំរុញឱ្យកម្ពុជាត្រឡប់មកដើរលើគន្លងលទ្ធិប្រជាធិបតេយ្យ និងការគោរពសិទ្ធិមនុស្សឡើងវិញ ពិសេសការឈរលើគោលជំហររបស់ខ្លួនឯងចំពោះកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ឱ្យបានពេញលេញ។
បើតាមអតីតមេដឹកនាំបក្សប្រឆាំងរូបនេះ ហេតុផលដែលលោករំពឹងខ្ពស់ចំពោះគណបក្សថ្មីដែលត្រៀមឡើងកាន់តំណែងនាពេលនេះ ក៏ដោយសារតែបក្សនេះតែងតែគាំទ្ររូបលោកចំពោះការគោរពលទ្ធិប្រជាធិបតេយ្យ និងការគោរពសិទ្ធិមនុស្សនៅកម្ពុជានាពេលកន្លងមក។
សម្រាប់លោក សម រង្ស៊ី កម្ពុជានឹងយកគំរូលទ្ធិប្រជាធិបតេយ្យតាមប្រទេសអូស្រ្តាលី ដើម្បីមកអនុវត្តនៅក្នុងតំបន់អាស៊ីប៉ាស៊ីហ្វិក ជាពិសេសប្រទេសកម្ពុជាតែម្តង។
តែយ៉ាងណា លោក សុខ ឥសាន អ្នកនាំពាក្យគណបក្សប្រជាជនកម្ពុជា បានថ្លែងប្រាប់វិទ្យុបារាំងអន្តរជាតិRFIថា លោកមិនមានជំនឿអ្វីទាល់តែសោះថា រដ្ឋាភិបាលថ្មីអូស្រា្តលីមកគៀបសង្កត់ ឬដាក់គំនាបមកលើរដ្ឋាភិបាលកម្ពុជាតាមរយៈការជំរុញរបស់លោក សម រង្ស៊ី នោះឡើយ។
ផ្ទុយទៅវិញ លោក សុខ ឥសាន អះអាងថា រដ្ឋាភិបាលថ្មីអូស្រ្តាលីនឹងបង្កើនកិច្ចសហប្រតិបត្តិការទ្វេរភាគីឱ្យកាន់តែជិតស្និទ្ធិបន្ថែមទៀតជាមួយកម្ពុជា។
ពីជ្រុងអ្នកវិភាគវិញ លោក សាស្ត្រាចារ្យ ឯម សុវណ្ណរ៉ា អ្នកជំនាញផ្នែកវិទ្យាសាស្ត្រនយោបាយមកពីរាជបណ្ឌិតសភាកម្ពុជាយល់ឃើញថា របត់នយោបាយការទូតនឹងអាចល្អប្រសើរច្រើន ហើយរដ្ឋាភិបាលថ្មីអូស្រា្តលីនឹងផ្តល់តម្លៃក្នុងការលើកស្ទួយលទ្ធិប្រជាធិបតេយ្យនៅកម្ពុជាបានកាន់តែច្រើនជាងមុន។
បានកាន់តែច្រើនត្រង់ចំណុចនេះ លោកសាស្ត្រាចារ្យកត់សម្គាល់ថា ដោយសារគណបក្សពលករអូស្រា្តលី បានប្រកាសរួចហើយពីការយកចិត្តទុកដាក់ចំពោះលទ្ធិប្រជាធិបតេយ្យនៅលើសាកលលោក ហើយបក្សនេះ ក៏មានស្និទ្ធស្នាលជាមួយអតីតមេដឹកនាំគណបក្សសង្គ្រោះជាតិផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ