នាយករដ្ឋមន្ត្រីសម្រេចលុបចោលគម្រោងអភិវឌ្ឍជុំវិញភ្នំតាម៉ៅ បន្ទាប់ពីមានប្រតិកម្មពីមហាជន
នៅទីបំផុតការតស៊ូមតិរបស់មហាជននៅតាមបណ្តាញសង្គម និងតាមបណ្តាញផ្សព្វផ្សាយមួយចំនួនគឺទទួលបានជោគជ័យ ខណៈដែលគម្រោងការដោះដូរ និងអភិវឌ្ឍជុំវិញសួនសត្វភ្នំតាម៉ៅត្រូវបានលោក ហ៊ុន សែន សម្រេចចិត្តសារជាថ្មីគឺលុបចោលវិញ។ ត្បិតការសម្រេចចិត្តនេះទទួលបានការសារទ ប៉ុន្តែសម្រាប់សកម្មជនបរិស្ថាន គឺក្រុមហ៊ុនដែលបានឈូសឆាយគឺត្រូវតែទទួលខុសត្រូវតចំពោះមុខមហាជនដោយសារតែដើមឈើជាច្រើនត្រូវបានឈូសឆាយអស់ទៅហើយ។
ចុះផ្សាយនៅថ្ងៃ៖
ស្តាប់ - ០១:៥៧
ការសម្រេចលុបចោលទាំងអស់នូវរាល់ការអនុញ្ញាតឲ្យធ្វើការដោះដូរ និងអភិវឌ្ឍជុំវិញភ្នំតាម៉ៅគឺដោយសារតែមានសំណូមពរជាច្រើនមករដ្ឋាភិបាល ដើម្បីរក្សាទុកព្រៃនៅក្បែរសួនសត្វភ្នំតាម៉ៅ ទោះបីក្រសួងកសិកម្មបានពន្យល់ថា សួនសត្វភ្នំតាម៉ៅមិនមានប៉ះពាល់ក៏ដោយ។ នេះជាការលើកឡើងរបស់លោក ហ៊ុន សែន នៅតាមហ្វេសប៊ុកនៅថ្ងៃអាទិត្យទី៧ ខែសីហានេះ។
បើតាមប្រមុខរដ្ឋាភិបាលកម្ពុជា លោកចេញបញ្ជាឲ្យរក្សាទុកដី និងព្រៃនៅជុំវិញសួនសត្វភ្នំតាម៉ៅជាដីដែលត្រូវការពារ និងអភិរក្សដោយក្រសួងកសិកម្ម ហើយក្រុមហ៊ុនដែលបានឈូសឆាយត្រូវបញ្ឈប់សកម្មភាព និងត្រូវដាំដើមឈើឡើងវិញលើដីដែលបានឈូសឆាយ។
យ៉ាងនេះក្តី មិនអស់ចិត្តឡើយពីសកម្មជនបរិស្ថាន។ លោក អ៊ុល វ៉ា់ន់ ជាប្រធានបណ្តាញយុវជនកម្ពុជាដែលជាអង្គការមួយធ្វើការច្រើនផ្តោតលើការតស៊ូមតិ ក្នុងការអភិរក្សធនធានធម្មជាតិ បានសារទការផ្លាស់ប្តូរចិត្តរបស់ប្រមុខរដ្ឋាភិបាលដែលលុបចោលរាល់ការអនុញ្ញាត លើការដោះដូរ និងអភិវឌ្ឍជុំវិញសួនសត្វភ្នំតាម៉ៅនេះ។
ប៉ុន្តែសម្រាប់សកម្មជនរូបនេះ បើត្រឹមតែលុបចោលការអនុញ្ញាតនេះ មិនទាន់គ្រប់គ្រាន់ទេ ពោលក្រុមហ៊ុនដែលបានកាប់បំផ្លាញព្រៃឈើដែលដាំដុះជាច្រើនឆ្នាំមកនេះ គឺត្រូវតែទទួលខុសត្រូវចំពោះមុខមហាជន គឺដាំឈើឡើងវិញ។
បើតាម លោក អ៊ុល វ៉ាន់ នៅមានករណីកាប់បំផ្លាញព្រៃឈើនៅតំបន់ផ្សេងទៀត នៅកម្ពុជា មិនទាន់ត្រូវបានទប់ស្កាត់នៅឡើយ ហើយលោកទទួចឲ្យរដ្ឋាភិបាលបើកលំហសេរីភាពដល់សកម្មជនបរិស្ថានក្នុងការចូលរួមចំណែកការពារព្រៃឈើ។
សូមបញ្ជាក់ថា ភ្នំតាម៉ៅមានផ្ទៃដីសួនសត្វ ៤០០ហិកតា ខណៈផ្ទៃដីទំហំ ២ ៣០០ ហិកតាជាព្រៃដែលព័ទ្ធជុំវិញ។ ប៉ុន្តែក្នុងចំណោមផ្ទៃដីទំហំ ២ ៣០០ ហិកតា នេះ គឺក្រុមហ៊ុនបានឈូសឆាយអស់១០០ហិកតាហើយលើផ្ទៃដី ១ ៥០០ ហិកតា ដែលកន្លងមក រដ្ឋាភិបាលបានប្រគល់ឲ្យក្រុមហ៊ុនឯកជន ក្រោមហេតុផលដើម្បីអភិវឌ្ឍលំនៅឋាន និងសាងសង់អគារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ