សម្ព័ន្ធភាពសកលនៃអង្គការសង្គមស៊ីវិលអំពាវនាវឱ្យអាជ្ញាធរបញ្ឈប់ការធ្វើទុក្ខបុកម្នេញ
CIVICUS ដែលជាសម្ព័ន្ធសង្គមស៊ីវិលពិភពលោក បានអំពាវនាវឱ្យអាជ្ញាធរបញ្ឈប់ការធ្វើទុក្ខបុកម្នេញលើសកម្មជន សកម្មជនសហជីព គណបក្សប្រឆាំង និងបញ្ចប់ការរឹតបន្តឹងលើសេរីភាពជាមូលដ្ឋាន។ នេះបើតាមរបាយការណ៍ចេញផ្សាយ កាលពីសប្តាហ៍មុន ដោយអង្គការនេះ ក៏អំពាវនាវឲ្យសហគមន៍អន្តរជាតិបង្កើនសម្ពាធលើរដ្ឋាភិបាលលោក ហ៊ុន សែន ឲ្យគោរពនិងការពារសិទ្ធិមនុស្ស មុនការបោះឆ្នោតឆ្នាំ២០២៣។
ចុះផ្សាយនៅថ្ងៃ៖
ស្តាប់ - ០២:២១
របាយការណ៍សង្ខេបថ្មីរបស់ CIVICUS ស្តីពីការរឹតត្បិតសេរីភាពពលរដ្ឋនៅកម្ពុជា ចេញផ្សាយកាលពីថ្ងៃទី១៩ ខែកញ្ញា បង្ហាញថា បន្ទាប់ពីសេចក្តីសម្រេចរបស់ក្រុមប្រឹក្សាសិទ្ធិមនុស្ស ដែលបានអនុម័ត កាលពីថ្ងៃទី ១១ ខែតុលា ឆ្នាំ២០២១ មិនមានការកែលម្អសិទ្ធិមនុស្សជាក់ស្តែងនៅលើមូលដ្ឋាននោះទេ។ ទោះបីជាមានសេចក្តីរាយការណ៍ដោយអ្នករាយការណ៍ពិសេសរបស់អង្គការសហប្រជាជាតិស្តីពីស្ថានភាពសិទ្ធិមនុស្សនៅកម្ពុជា និងការអំពាវនាវជាច្រើននៅក្រុមប្រឹក្សាសិទ្ធិមនុស្ស និងអនុសាសន៍របស់អង្គការសហប្រជាជាតិក៏ដោយ ក៏រដ្ឋាភិបាលកម្ពុជាមិនបានបង្ហាញឆន្ទៈនយោបាយក្នុងការអនុវត្តលទ្ធិប្រជាធិបតេយ្យ ឬកំណែទម្រង់លំហស៊ីវិលនោះទេ។
តាមរយៈរបាយការណ៍របស់ខ្លួន CIVICUS បានលើកឡើងថា អ្នកការពារសិទ្ធិមនុស្ស និងសកម្មជនកម្ពុជា បន្តប្រឈមនឹងការគាបសង្កត់។ ក្នុងរយៈពេលមួយឆ្នាំកន្លងទៅ ការចោទប្រកាន់ដោយមិនច្បាស់ ក្រោមពាក្យថា 'ញុះញង់' ត្រូវបានប្រើជាប្រព័ន្ធដើម្បីយាយី និងផ្ដន្ទាទោសពួកគេ។ អ្នកដែលត្រូវបានឃុំខ្លួន និងចោទប្រកាន់តាមអំពើចិត្ត ជារឿយៗត្រូវបានឃុំខ្លួនក្នុងរយៈពេលយូរ ក្រោមហេតុផលឃុំខ្លួនបណ្តោះអាសន្ន ហើយគ្មានឱកាសទទួលបានការកាត់ក្តីដោយយុត្តិធម៌នោះទេ។ នេះបើតាម CIVICUS។
របាយការណ៍ CIVICUS បានលើកឡើងសង្ខេបពីករណីកើតឡើងថ្មីៗនេះ ដែលត្រូវបានចាត់ទុកថាជាសកម្មភាពធ្វើទុក្ខបុកម្នេញពីអាជ្ញាធរ។ ករណីទាំងនោះរួមមានការកាត់ទោសលើសមាជិក៤នាក់នៃអង្គការសិទ្ធិមនុស្សក្នុងស្រុក ADHOC ការបន្តប្រឈមមុខនឹងការគាបសង្កត់របស់សមាជិកសហជីពណាហ្គាវើលដ៍(LRSU)។ បញ្ហាផ្សេងទៀតរួមមាន បញ្ហាសេរីភាពសារព័ត៌មាន ច្បាប់អង្គការសង្គមស៊ីវិល ការចោទប្រកាន់តាមប្រព័ន្ធតុលាការប្រឆាំងសមាជិកអតីតបក្សជំទាស់ជាដើម។
កិច្ចសន្ទនាអន្តរកម្មមួយនឹងធ្វើឡើងជាមួយអ្នករាយការណ៍ពិសេសស្តីពីសិទ្ធិមនុស្សកម្ពុជា នាថ្ងៃទី៥ ខែតុលា បន្ទាប់ពីអ្នករាយការណ៍ពិសេសទើបបានដាក់ចេញនូវរបៀបវារៈ ១០ចំណុច ដើម្បីលើកកម្ពស់ស្ថានភាពសិទ្ធិមនុស្សនៅកម្ពុជា រួមទាំងការបើកទូលាយលំហស៊ីវិល និងនយោបាយ និងបញ្ចប់ការកាត់ទោសអ្នកប្រឆាំងនយោបាយ និងអ្នកការពារសិទ្ធិមនុស្ស។ CIVICUS ក៏បានអំពាវនាវឱ្យរដ្ឋដ៏ទៃទៀតលើកឡើងពីកង្វល់ទាក់ទងនឹងបញ្ហាខាងលើសម្រាប់កិច្ចសន្ទនានេះ។
ជារៀងរាល់ពេលដែលមានការចេញរបាយការណ៍ ឬការអំពាវនាវពីអង្គការសិទ្ធិមនុស្សក្រៅរដ្ឋាភិបាល កម្ពុជាតែងតែឆ្លើយតបដោយអះអាងថារបាយការណ៍ទាំងនោះមិនពិត ឬចងក្រងឡើង ដោយមានភាពលម្អៀង និងមានចរឹតនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ