អង្គការលីកាដូ៖ ច្បាប់កូវីដបានប្រើជាយុទ្ធសាស្ត្រប្រឆាំងអ្នកតវ៉ាសិទ្ធិដីធ្លី និងសកម្មជនសិទ្ធិការងារ
អង្គការលីកាដូបានចេញផ្សាយសេចក្តីសង្ខេបផ្នែកច្បាប់មួយនៅថ្ងៃព្រហស្បតិ៍ម្សិលមិញនេះ ដោយធ្វើការរិះគន់ច្បាប់ស្តីពីការទប់ស្កាត់ជំងឺកូវីដ១៩របស់រដ្ឋាភិបាលថា ត្រូវបានប្រើប្រាស់ជាយុទ្ធសាស្ត្រប្រឆាំងនឹងអ្នកតវ៉ាសិទ្ធិដីធ្លីនិងសកម្មជនសិទ្ធិការងារ ក្នុងចំណោមអ្នកការពារសិទ្ធិមនុស្សផ្សេងទៀត ទោះស្ថានភាពកូវីដធូរស្រាល។ សម្រាប់អ្នកនាំពាក្យក្រសួងយុត្តិធម៌ ច្បាប់នេះត្រូវបានអនុវត្តក្រោមរូបភាពរឹតត្បិតដោយឈរលើច្បាប់ត្រឹមត្រូវ ព្រោះដើម្បីការពារជិវិតប្រជាពលរដ្ឋ។
ចុះផ្សាយនៅថ្ងៃ៖
ស្តាប់ - ០២:៣៧
ច្បាប់ស្តីពី «វិធានការទប់ស្កាត់ការឆ្លងរីករាលដាលនៃជំងឺកូវីដ១៩ និងជំងឺកាចសាហាវ និងគ្រោះថ្នាក់ធ្ងន់ធ្ងរផ្សេងទៀត» ជាច្បាប់ដែលមានលក្ខណៈរឹតត្បិត រំលោភសិទ្ធិមនុស្សធ្ងន់ធ្ងរលើអ្នកការពារសិទ្ធិមនុស្ស អ្នកតវ៉ាសិទ្ធិដីធ្លី សហជីព និងប្រជាពលរដ្ឋ ក្រោមការអនុវត្តបែបរើសអើសរបស់អ្នកអនុវត្តច្បាប់ ជាមួយនឹងការដាក់ទណ្ឌកម្មធ្ងន់ធ្ងរហួសហេតុក្នុងរយៈកាល១ឆ្នាំមកនេះ។ នេះជាការលើកឡើងរបស់អង្គការសម្ព័ន្ធខ្មែរជំរឿននិងការពារសិទ្ធិមនុស្ស ឬលីកាដូ នៅក្នុងសេចក្តីសង្ខេបផ្នែកច្បាប់មួយ ចេញផ្សាយនៅថ្ងៃទី២៩ ខែកញ្ញា ឆ្នាំ២០២២។
តាមសេចក្តីសង្ខេបផ្នែកច្បាប់របស់អង្គការលីកាដូខាងលើ ក្នុងរបាយការណ៍ឆ្នាំ២០២១របស់អគ្គលេខាធិការអង្គការសហប្រជាជាតិទៅកាន់ក្រុមប្រឹក្សាសិទ្ធិមនុស្សអង្គការសហប្រជាជាតិ គឺមានមនុស្សយ៉ាងតិច ៧២៩នាក់ ត្រូវបានចាប់ខ្លួន ក្រោមច្បាប់កូវីដ១៩ នៅចន្លោះពាក់កណ្តាលខែមេសា ដល់ចុងខែឧសភា ឆ្នាំ២០២១ ហើយជាង ១០០នាក់ត្រូវបានឃុំខ្លួន ដែលជាតួលេខរដ្ឋាភិបាលបានបដិសេធ។ សម្រាប់លីកាដូ ទោះកម្ពុជាមានករណីកូវីដធ្លាក់ចុះ ច្បាប់នេះត្រូវបានប្រើជាយុទ្ធសាស្ត្រប្រឆាំងអ្នកតវ៉ាសិទ្ធីដីធ្លី និងសកម្មជនសិទ្ធិការងារ ក្នុងចំណោមអ្នកការពារសិទ្ធិមនុស្សផ្សេងទៀត។
តាមរយៈវិទ្យុបារាំងអន្តរជាតិrfi នៅថ្ងៃទី៣០ ខែកញ្ញា ឆ្នាំ២០២២ លោក ជិន ម៉ាលីន អ្នកនាំពាក្យក្រសួងយុត្តិធម៌បកស្រាយថា ច្បាប់ស្តីពីការទប់ស្កាត់កូវីដ១៩ ដែលអនុម័តកាលពីថ្ងៃទី១១ ខែមីនា ឆ្នាំ២០២១ គឺជាច្បាប់ដែលត្រូវបានដាក់ឱ្យប្រើប្រាស់ក្រោមភាពចាំបាច់ ក្នុងការធានាសុខភាព និងអាយុជីវិតពលរដ្ឋ ពោលគឺមិនមែនជាការបង្កើតឡើង ដើម្បីកម្រិតសិទ្ធិសេរីភាពលើក្រុមចង្កោមមនុស្សណានោះទេ។
លោក ជិន ម៉ាលីន អ្នកនាំពាក្យក្រសួងយុត្តិធម៌ បន្តអះអាងថា ច្បាប់ស្តីពីកូវីដគឺមានភាពរឹតត្បិត តែធ្វើឡើងជារួម ដើម្បីប្រយោជន៍សាធារណៈ ដែលត្រូវបានអនុញ្ញាតិដោយច្បាប់កាតិកាសញ្ញាអន្តរជាតិសិទ្ធិពលរដ្ឋនិងសិទ្ធនយោបាយ។ ហើយបើធៀបនឹងប្រទេសផ្សេង កម្ពុជា មានភាពរិតត្បិតធូរស្រាលជាងគេឆ្ងាយណាស់។
គួរជម្រាបជូនថា អង្គការលីកាដូទទូចឱ្យមានវិសោធនកម្មច្បាប់លើមាត្រាជាច្រើន (មាត្រា១-មាត្រា៥ មាត្រា៧-មាត្រា១៥) ដោយមានការពិគ្រោះយោបល់ពីភាគីចម្រុះ, ធ្វើវិសោធនកម្មអនុក្រិតស្តីពីវិធានការសុខាភិបាល និងវិធានការរដ្ឋបាល សម្រាប់ទប់ស្កាត់ការឆ្លងរាលដាលជំងឺកូវីដ១៩ និងជំងឺកាចសាហាវនិងគ្រោះថ្នាក់ធ្ងន់ធ្ងរផ្សេងទៀត អោយអនុលោមតាមស្តង់ដារច្បាប់ជាតិនិងអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ