របាយការណ៍៖ លំហសិទ្ធិពលរដ្ឋនៅកម្ពុជាធ្លាក់ចុះ ដោយការអនុវត្តច្បាប់បែបគាបសង្កត់របស់អាជ្ញាធរ
អង្គការការពារសិទ្ធិពលរដ្ឋ និងសង្គមស៊ីវិល ហៅកាត់ថា CIVICUS បានវាយតម្លៃជាអវិជ្ជមានលើស្ថានភាពលំហសិទ្ធិពលរដ្ឋនៅប្រទេសកម្ពុជា ពិសេសសិទ្ធិសហជីពនៅក្រុមហ៊ុនណាហ្គាវើល៍ និងសិទ្ធិរបស់សកម្មជននយោបាយ។ នេះបើតាមរបាយការណ៍សង្ខេបចុងក្រោយរបស់ CIVICUS ចេញផ្សាយនៅក្នុងសប្តាហ៍នេះ។
ចុះផ្សាយនៅថ្ងៃ៖
ស្តាប់ - ០២:២១
CIVICUS ដែលជាសម្ព័ន្ធសង្គមស៊ីវិលពិភពលោកទើបបានចេញរបាយការណ៍ថ្មីរបស់ខ្លួន កាលពីថ្ងៃទី៤ ខែតុលា ឆ្នាំ២០២២កន្លងទៅ វាយតម្លៃថា ស្ថានភាពលំហសិទ្ធិពលរដ្ឋនៅកម្ពុជា កំពុងរងការគាបសង្កត់ តាមរយៈការអនុវត្តច្បាប់មិនត្រឹមត្រូវរបស់អាជ្ញាធរ។
របាយការណ៍ CIVICUS បង្ហាញថា ច្បាប់ក្នុងទម្រង់គាបសង្កត់ទាំងនោះត្រូវបានអាជ្ញាធរកម្ពុជាអនុវត្តជាប្រចាំ យកមករិតបន្តឹងសេរីភាពពលរដ្ឋ ដោយការដាក់ទោសទណ្ឌ ចំពោះការអនុវត្តសិទ្ធិសេរីភាពបញ្ចេញមតិ និងការជួបជុំដោយសន្តិវិធីជាដើម។
CIVICUS បានចងក្រងរាល់សកម្មភាពចុះបង្ក្រាបរបស់អាជ្ញាធរ ក្នុងរយៈពេលប៉ុន្មានខែថ្មីៗនេះ មកលើក្រុមសហជីពតវ៉ាវិវាទការងារនៅក្រុមហ៊ុនណាហ្គាវើល ការយាយីនយោបាយជុំវិញការបោះឆ្នោតឃុំសង្កាត់ ការដោះស្រាយជម្លោះដីធ្លីយាយីសិទ្ធិពលរដ្ឋតវ៉ា និងការកាត់ទោសសកម្មជនគណបក្សប្រឆាំង សកម្មជនព្រៃឈើ សកម្មជនបរិស្ថាន និងអ្នកសារព័ត៌មានជាដើម។ ទន្ទឹមគ្នានេះ នៅកម្ពុជាសេរីភាពសារព័ត៌មាន នៅតែមានហានិភ័យ ខណៈដំណើរការច្បាប់ស្ដីពីសិទ្ធិទទួលបានព័ត៌មានមានភាពយឺតយ៉ាវ។ នេះបើតាមរបាយការណ៍សង្ខេបរបស់សម្ព័ន្ធសង្គមស៊ីវិលពិភពលោក CIVICUS។
គួរជ្រាបថា កាលពីថ្ងៃទី១៩ ខែកញ្ញា ឆ្នាំ២០២២ អង្គការ CIVICUS បានចេញផ្សាយនូវសេចក្តីសង្ខេបមួយចោទរដ្ឋាភិបាលកម្ពុជាថា គ្មានឆន្ទៈអនុវត្តលទ្ធិប្រជាពលរដ្ឋនិងកំណែទម្រង់លំហសិទ្ធិពលរដ្ឋ។ ហើយក៏បានរំលេចនូវកំណែទម្រង់ស្តារលំហសិទ្ធិពលរដ្ឋនៅកម្ពុជា ក្រោយក្រុមប្រឹក្សាសិទ្ធិមនុស្សអង្គការសហប្រជាជាតិអនុម័ត។
ទន្ទឹមគ្នានេះដែរ លោក Vitit Muntarbhorn អ្នករាយការណ៍ពិសេសរបស់អង្គការសហប្រជាជាតិ បានដាក់ចេញនូវរបៀបវារៈ ១០ចំណុច ដើម្បីលើកកម្ពស់ស្ថានភាពសិទ្ធិមនុស្សនៅកម្ពុជា រួមទាំងការបើកទូលាយលំហស៊ីវិល និងនយោបាយ និងបញ្ចប់ការកាត់ទោសអ្នកប្រឆាំងនយោបាយ និងអ្នកការពារសិទ្ធិមនុស្ស។
តែយ៉ាងណាក៏ដោយ របាយការណ៍និងការអំពាវនាវរបស់អង្គការក្រៅរដ្ឋាភិបាលក្រៅស្រុក ឬក្នុងស្រុក មិនដែលត្រូវបានរដ្ឋាភិបាលកម្ពុជា ឆ្លើយតបជាសកម្មភាពដោះស្រាយនោះឡើយ ជំនួសមកវិញ រដ្ឋាភិបាលកម្ពុជាតែងធ្វើការច្រានចោលនិងបកស្រាយវិញថា ជារបាយការណ៍និងជាការអំពាវនាវលម្អៀង និងមានចរិតនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ