សកម្មជនចង់ឲ្យមេដឹកនាំកម្ពុជា និងមេដឹកនាំដទៃទៀតយកកង្វល់របស់ពួកគេដាក់ក្នុងកិច្ចប្រជុំអាស៊ាន
សកម្មជនសង្គមប្រមាណ៤០០នាក់លើកឡើងពី កង្វល់របស់ពួកគេ ប្រាប់ទៅមេដឹកនាំរដ្ឋាភិបាលកម្ពុជា និងមេដឹកនាំប្រទេសដទៃទៀតដែលនឹងត្រូវមកចូលរួមកិច្ចប្រជុំកំពូលអាស៊ាននៅកម្ពុជានៅក្នុងខែវិច្ឆិកាខាងមុខនេះ។ កង្វល់ធំៗដែលពួកគេបានលើកឡើងនៅក្នុងវេទិកាពលរដ្ឋកម្ពុជាឆ្នាំ២០២២ដែលធ្វើរយៈពេល២ថ្ងៃនោះ គឺលំហរសេរីពលរដ្ឋ សិទ្ធិនយោបាយ សិទ្ធិសហជីព បញ្ហាពាណិជ្ជកម្ម កសិកម្ម បញ្ហាដីធ្លី និងចំណាកស្រុកជាដើម។
ចុះផ្សាយនៅថ្ងៃ៖
ស្តាប់ - ០២:០៣
វេទិកាពលរដ្ឋកម្ពុជាឆ្នាំ២០២២ ត្រូវបានបិទបញ្ចប់កាលពីល្ងាចថ្ងៃទី១៧តុលា ហើយបានប្រកាសពីលទ្ធផលរួមនៅក្នុងសន្និសិទសារព័ត៌មាននៅថ្ងៃទី១៨តុលា។ លំហរសេរីពលរដ្ឋ និងសិទ្ធិនយោបាយ រួមទាំងសិទ្ធិដីធ្លី និងសេរីភាពសហជីព បញ្ហាចំណាក គឺជាកង្វល់សំខាន់ៗ ដែលត្រូវបានលើកឡើងនៅក្នុងវេទិកានេះ។ ការលើកឡើងបែបនេះ គឺជាការបញ្ជូនសារទៅកាន់មេដឹកនាំអាស៊ាន ក៏ដូចជាមេដឹកនាំពិភពលោកឲ្យបានដឹងមុនពេលពួកគេមកប្រជុំនៅកម្ពុជានៅខែវិច្ឆិកា។
បើនិយាយពីស្ថានភាពសិទ្ធិមនុស្សជារួមនៅកម្ពុជា គឺស្ថិតនៅចន្លោះភ្លើងលឿង និងភ្លើងក្រហម។ នេះតាមលោក រស់ សុដ្ឋា នាយកប្រតិបត្តិនៃសម្ព័ន្ធភាពការពារសិទ្ធិមនុស្សកម្ពុជាហៅកាត់ថា(CHRAC)។
ដោយឡែក ប្រជាពលរដ្ឋមកពីសហគមន៍ដីធ្លី ព្រៃឈើ នេសាទ កសិករ ជនជាតិដើមភាគតិច អ្នកការពារបរិស្ថាន អ្នកការពារសិទ្ធិមនុស្ស សមាគម អង្គការមិនមែនរដ្ឋាភិបាល គ្រូបង្រៀន មន្រ្តីរាជការ សហជីព កម្មករ កម្មការិនី ក្រុមអ្នកស្រលាញ់ភេទដូចគ្នា និងអ្នកមានពិការភាព ពួកគេបានលើកឡើងពីកង្វល់រៀងៗខ្លួន ចង់ឲ្យមេដឹកនាំអាស៊ាន និងមេដឹកនាំប្រទេសដទៃទៀតជួយដោះស្រាយ។
បើតាម លោក អំ សំអាត នាយកអង្គការលីកាដូ ប្រជាពលរដ្ឋ បានលើកឡើងនូវបញ្ហាប្រឈមជាច្រើន ដូចជាបញ្ហាសិទ្ធិមនុស្ស ប្រជាធិបតេយ្យ សិទ្ធិជួបជុំសម្ដែងមតិ បញ្ហាដីធ្លី បញ្ហាបរិស្ថាន បញ្ហាពាណិជ្ជកម្ម និងបញ្ហាកសិកម្មជាដើម។ បញ្ហាទាំងនេះ បាននិងកំពុងកើតមាននៅកម្ពុជា ដែលប្រជាពលរដ្ឋបានត្អូញត្អែរនិងបានលើកឡើងក្នុងវេទិកា ដើម្បីស្វែងរកកិច្ចអន្តរាគមន៍ពីរដ្ឋាភិបាល។
ជាការកត់សម្គាល់ វេទិកាប្រជាពលរដ្ឋកម្ពុជា ដែលផ្តួចផ្តើមដោយក្រុមអង្គការ សមាគម និងសហគមន៍នេះ គឺធ្វើឡើងមុនកិច្ចប្រជុំកំពូលអាស៊ានដែលមកដល់នៅខែវិច្ឆិកាខាងមុខនេះ ខណៈកម្ពុជាធ្វើជាម្ចាស់ផ្ទះ ដោយមានការចូលរួមពីមេដឹកនាំពិភពលោក ក៏ដូចជាមេដឹកនាំប្រទេសអាស៊ានផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ