យុទ្ធនាការបញ្ចប់និទណ្ឌភាព៖ អ្នកសារព័ត៌មានកម្ពុជាដែលស្លាប់ក្នុងពេលបំពេញការងារមិនទទួលបានយុត្តិធម៌
ថ្ងៃទី២វិច្ឆិកា គឺជាទិវាអន្តរជាតិដើម្បីបញ្ចប់និទណ្ឌភាពលើឧក្រិដ្ឋកម្មប្រឆាំងអ្នកសារព័ត៌មានដែលត្រូវបានរំឭកឡើងជារៀងរាល់ឆ្នាំតាំងពីឆ្នាំ២០១៣មក។ នៅកម្ពុជាមានអ្នកសារព័ត៌មានយ៉ាងហោចណាស់១៥នាក់ត្រូវបានសម្លាប់នៅក្នុងការបំពេញតួនាទីរបស់ខ្លួន ក្នុងនោះមាន១២នាក់ត្រូវបានសម្លាប់ពាក់ព័ន្ធនឹងការរាយការណ៍ព័ត៌មានដែលមានហានិភ័យដល់បុគ្គលមានអំណាច ហើយពួកគេមិនទាន់ទទួលបានយុត្តិធម៌នៅឡើយ។
ចុះផ្សាយនៅថ្ងៃ៖
ស្តាប់ - ០១:៥១
អំពើនិទណ្ឌភាពចំពោះការវាយប្រហារទៅលើអ្នកសារព័ត៌មាន បានបង្កផលប៉ះពាល់យ៉ាងធ្ងន់ធ្ងរ ពិសេសកម្រិតយល់ដឹងរបស់សាធារណជន និងការវែកញែកក្នុងន័យស្ថាបនា លើប្រធានបទ និងបញ្ហាដែលជាប្រយោជន៍សាធារណៈ។
ដោយលើកឡើងពីសារៈសំខាន់នៃអ្នកសារព័ត៌មានបែបនេះ មជ្ឈមណ្ឌលសិទ្ធិមនុស្សកម្ពុជាដែលបានកត់ត្រាពីស្ថានភាពអ្នកសារព័ត៌មាននៅកម្ពុជាបានរៀបចំយុទ្ធនាការ៣សប្តាហ៍ដើម្បីចូលរួមប្រារព្ធទិវាអន្តរជាតិបញ្ចប់និទណ្ឌភាពលើឧក្រិដ្ឋកម្មប្រឆាំងអ្នកសារព័ត៌មាន។
ទិវានេះគឺឱកាសមួយជំរុញការពិភាក្សាដល់ឧក្រិដ្ឋកម្មទៅលើអ្នកសារព័ត៌មាន និងអ្នកធ្វើការក្នុងវិស័យផ្សព្វផ្សាយ ដែលមិនទាន់ត្រូវបានដោះស្រាយ និងសំដែងការគោរពដល់អ្នកសារព័ត៌មានដែលបានប្រថុយប្រថាន ឬបាត់បង់ជីវិតក្នុងបុព្វហេតុនៃការរាយការណ៍របស់ខ្លួន។
កាលពីដំបូងអង្គការផ្លាស់ប្តូរសេរីភាពបញ្ចេញមតិអន្តរជាតិ បានរៀបចំទិវានេះនៅថ្ងៃទី២៣វិច្ឆិកាឆ្នាំ ២០១១ ដើម្បីរំឭកដល់អ្នកសារព័ត៌មាន៣២នាក់ដែលត្រូវសម្លាប់នៅប្រទេសហ្វីលីពីននៅឆ្នាំ២០០៩។ ប៉ុន្តែក្រោយមក សន្និបាតអង្គការសហប្រជាជាតិបានអនុម័តប្រារព្ធទិវានេះជាផ្លូវការនៅថ្ងៃទី២វិច្ឆិកា ចាប់តាំងពីឆ្នាំ២០១៣មក។
នៅកម្ពុជាមានអ្នកសារព័ត៌មានយ៉ាងហោចណាស់១៥នាក់ត្រូវបានសម្លាប់នៅក្នុងការបំពេញតួនាទីរបស់ខ្លួន ក្នុងនោះមាន១២នាក់ត្រូវបានសម្លាប់ពាក់ព័ន្ធនឹងការរាយការណ៍ព័ត៌មានរបស់ខ្លួនដែលមានហានិភ័យដល់បុគ្គលមានអំណាច។ បច្ចុប្បន្ន ករណីសម្លាប់អ្នកសារព័ត៌មានទាំងនោះមិនទាន់ត្រូវបានស៊ើបអង្កេតដោយឯករាជ្យ និងតម្លាភាព ដើម្បីនាំជនល្មើសមកកាត់ទោសនៅឡើយ ដែលបណ្តាលឲ្យជនរងគ្រោះមិនទទួលបានយុត្តិធម៌ ខណៈជនល្មើសនៅរួចផុតពីការផ្តន្ទាទោស ឬជាអំពើនិទណ្ឌភាព។នេះបើតាមកំណត់ត្រារបស់អង្គការសិទ្ធិមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ