តុលាការមិនអនុញ្ញាតឲ្យលោក រ៉ុង ឈុន ចេញទៅប្រជុំសហជីពអន្តរជាតិនៅអូស្ត្រាលី

ប្រធានសហភាពសហជីពកម្ពុជា(CCU) និងជាទីប្រឹក្សាសមាគមគ្រូបង្រៀនកម្ពុជាឯករាជ្យ លោក រ៉ុង ឈុន មិនត្រូវបានអនុញ្ញាតឲ្យចាកចេញទៅក្រៅប្រទេសទេ ដើម្បីចូលរួមសមាជលើកទី៥ របស់សហជីពអន្តរជាតិ(ITUC) ដែលនឹងត្រូវធ្វើឡើងចាប់ពីថ្ងៃទី១៧ ដល់ថ្ងៃទី២២ ខែវិច្ឆិកា ឆ្នាំ២០២២នេះ នៅប្រទេសអូស្ត្រាលី។ ការរារាំងដំណើរចាកចេញទៅក្រៅប្រទេសរបស់តុលាការដូច្នេះ ត្រូវគេមើលឃើញថា ក៏ដោយសារតែ លោក រ៉ុង ឈុន កំពុងស្ថិតនៅក្រោមការត្រួតពិនិត្យតាមផ្លូវតុលាការ។

ឲ្យលោក រ៉ុង ឈុន ប្រធានសហភាពសហជីពកម្ពុជា និងជាទីប្រឹក្សាសមាគមគ្រូបង្រៀនកម្ពុជាឯករាជ្យ © FB

សហភាពសហជីពកម្ពុជា(CCU) បានសម្តែងនូវការខកចិត្ត និងសោកស្តាយយ៉ាងខ្លាំង ដែលសាលាដំបូងរាជធានីភ្នំពេញ បានបដិសេធការស្នើសុំរបស់មេធាវី ដើម្បីអាចឲ្យលោក រ៉ុង ឈុន ប្រធានសហភាពសហជីពកម្ពុជា និងជាទីប្រឹក្សាសមាគមគ្រូបង្រៀនកម្ពុជាឯករាជ្យបានចេញទៅប្រទេសអូស្ត្រាលីដើម្បីចូលរួមសមាជលើកទី៥ របស់សហភាពសហជីពអន្តរជាតិ(ITUC)។

តាមរយៈសេចក្តីថ្លែងការណ៍កាលពីថ្ងៃទី០៣ ខែវិច្ឆិកា ម្សិលមិញ សហភាពសហជីពកម្ពុជាបានលើកឡើងថាតុលាការមិនអនុញ្ញាតឲ្យលោក រ៉ុង ឈុន បានទៅចូលរួមកិច្ចប្រជុំនេះទេ បើទោះណាជាមានលិខិតអញ្ជើញរបស់សហភាពសហជីពអន្តរជាតិ និងការធានាអះអាងរបស់មេធាវីថាលោក រ៉ុង ឈុន​ នឹងវិលត្រលប់មកប្រទេសកម្ពុជាវិញក៏ដោយ ក្រោយចប់មហាសន្និបាត។

ជាងនេះទៅទៀត សហភាពសហជីពកម្ពុជា បានហៅទង្វើរបស់តុលាការថាជាការគាបសង្កត់សិទ្ធិសេរីភាពលោក រ៉ុង ឈុន និងមិនឲ្យតម្លៃទៅលើសហជីពអន្តរជាតិ ដែលមានសមាជិកជាង៤០០លាននាក់នៅទូទាំងពិភពលោក។ នេះបើតាមសេចក្តីថ្លែងការណ៍។ សហជីពដែលមិនមាននិន្នាការរដ្ឋាភិបាលមួយនេះ បញ្ជាក់ថាការហាមឃាត់នេះ មិនមានផលចំណេញដល់កម្ពុជាទេ មានតែធ្វើឲ្យខូចឈ្មោះប្រទេស ខណៈដែលសហជីពអន្តរជាតិលើកឡើងពីករណីលោក រ៉ុង ឈុន នៅក្នុងមហាសន្និបាត។

ដោយឡែក សាលាដំបូងរាជធានីភ្នំពេញមិនមានការបញ្ជាក់យ៉ាងណានៅឡើយទេ ក៏ប៉ុន្តែតាមសេចក្តីថ្លែងការណ៍របស់សហជីព តុលាការគ្រាន់តែប្រើពាក្យថា«មិនឯកភាព» ហើយមិនបានលើកហេតុផល និងអះអាងពីមូលហេតុច្បាស់លាស់ឡើយ។

សូមរំលឹកថា លោក រ៉ុង ឈុន ​ត្រូវ​បាន​ចាប់​ខ្លួន កាល​ពី​យប់​ថ្ងៃ​៣១ ខែ​កក្កដា ឆ្នាំ​២០២០ ហើយ ​

សាលាដំបូងរាជធានីភ្នំពេញ បានសម្រេចផ្តន្ទាទោសលោក រ៉ុង ឈុន​ ឱ្យជាប់​ពន្ធនា​គារ២​ឆ្នាំ ពីបទ ញុះញង់ឲ្យមានភាពវឹកវរដល់សន្តិសុខសង្គម បន្ទាប់ពីលោកធ្វើការរិះគន់រឿងព្រំដែនកម្ពុជា-វៀតណាម កាលពីឆ្នាំ២០២០។ ក៏ប៉ុន្តែកាលពីឆ្នាំ ២០២១ កន្លងទៅសាលាឧទ្ធរណ៍បានកាត់តម្រឹមទោសមក​នៅ​តែ​១ឆ្នាំ៣ខែ និង​១១​ថ្ងៃ គិតចាប់ពីថ្ងៃឃុំខ្លួន និងដាក់​ក្រោម​ការ​ត្រួតពិនិត្យតាមផ្លូវតុលាការ​រយៈ​ពេល ៣ឆ្នាំ ផងដែរ៕