មេធាវីលោក កឹម សុខាត្រៀមរួចរាល់ក្នុងការធ្វើសេចក្តីសន្និដ្ឋានបញ្ជាក់ពីភាពស្អាតស្អំរបស់លោក កឹម សុខា
ចៅក្រមជំនុំជម្រះសាលាដំបូងរាជធានីភ្នំពេញ នឹងបន្តបើកសវនាការជំនុំជម្រះរឿងក្ដីលោក កឹម សុខា ប្រធានអតីតគណបក្សសង្គ្រោះជាតិ នៅថ្ងៃទី២១ខែធ្នូខាងមុខនេះទៀត ក្រោយពីបិទបញ្ចប់នីតិវិធីក្នុងការសួរដេញដោលទាំងស្រុង និងទុកពេលឲ្យមេធាវីទាំងសងខាងចំនួន២ខែ ដើម្បីរៀបចំធ្វើសេចក្តីសន្និដ្ឋានរៀងៗខ្លួនក្នុងសំណុំរឿងនេះ។ សម្រាប់ភាគីមេធាវីលោក កឹម សុខា បានបញ្ជាក់ថា ខ្លួនបានត្រៀមរួចរាល់ហើយសម្រាប់ធ្វើសេចក្ដីសន្និដ្ឋានដើម្បីបញ្ជាក់ពីភាពស្អាតស្អំរបស់លោក កឹម សុខា។
ចុះផ្សាយនៅថ្ងៃ៖
ស្តាប់ - ០១:៥៥
លោកស្រី ម៉េង សុភារី សហមេធាវីការពារក្ដីមួយរូបរបស់លោក កឹម សុខា បានបញ្ជាក់ប្រាប់វិទ្យុបារាំង RFI នៅថ្ងៃអង្គារ៍នេះថា សហមេធាវីលោក កឹម សុខា បានត្រៀមខ្លួនរួចរាល់ហើយនៅក្នុងការធ្វើសេចក្ដីសន្និដ្ឋានសម្រាប់សវនាការនាពេលខាងមុខនេះ។ បើតាមលោកស្រី ម៉េង សុភារី សេចក្ដីសន្និដ្ឋាននេះមានជាលាយល័ក្ខអក្សរផង និងផ្ទាល់មាត់ផង ដើម្បីបញ្ជាក់ពីភាពស្អាតស្អំរបស់លោក កឹម សុខា។ តែយ៉ាងណាចំណុចសំខាន់នៃសេចក្ដីសន្និដ្ឋានដើម្បីបញ្ជាក់ពីភាពស្អាតស្អំរបស់លោក កឹម សុខា មិនត្រូវបានលោកស្រី ម៉េង សុភារី លាតត្រដាងបានទេនៅពេលនេះ។
មេធាវីរូបនេះ បានបញ្ជាក់ថា តាមនីតិវិធីព្រហ្មទណ្ឌ អ្នកដែលត្រូវធ្វើសេចក្ដីសន្និដ្ឋានមុនគេ គឺតំណាងអយ្យការ និងមេធាវីដើមបណ្ដឹងរដ្ឋប្បវេណី បន្ទាប់មកទើបមេធាវីលោក កឹម សុខា ធ្វើសេចក្ដីសន្និដ្ឋានក្រោយគេ។ លោកស្រី ម៉េង សុភារី បានគូសបញ្ជាក់ថា ចំណុចដែលក្រុមសហមេធាវីលោក កឹម សុខា ត្រូវធ្វើសេចក្ដីសន្និដ្ឋាន គឺមានច្រើនដើម្បីបង្ហាញពីភាពស្អាតនិងភាពត្រឹមត្រូវរបស់លោក កឹម សុខា និងមានភស្តុតាងមួយចំនួនក៏ត្រូវលើកក្នុងសេចក្ដីសន្និដ្ឋានដែរ។
តាមរយៈសេចក្ដីសន្និដ្ឋានដើម្បីបង្ហាញពីភាពស្អាតនិងភាពត្រឹមត្រូវរបស់លោក កឹម សុខា ពីសំណាក់មេធាវីនេះ តើនឹងអាចធ្វើឲ្យលោក កឹម សុខា រួចខ្លួនពីការចោទប្រកាន់ និងមានសិទ្ធិធ្វើនយោបាយឡើងវិញដែរឬទេ? ជុំវិញបញ្ហានេះ លោកស្រី ម៉េង សុភារី បានលើកឡើងថា ករណីនេះវាអាស្រ័យលើសេចក្ដីសម្រេចរបស់តុលាការ ប៉ុន្តែសម្រាប់មេធាវីលោក កឹម សុខា នៅតែអះអាងថា លោក កឹម សុខា មិនប្រព្រឹត្តខុសដូចការចោទប្រកាន់ឡើយ។
សូមបញ្ជាក់ថា លោក កឹម សុខា ត្រូវបានចោទប្រកាន់ពីបទ «សន្ទិដ្ឋិភាពជាមួយបរទេស» ចង់ផ្ដួលរលំរដ្ឋាភិបាល។ ការចោទប្រកាន់នេះ ក្រោយពីមានការបែកធ្លាយវីដេអូដែលលោកបាននិយាយនៅប្រទេសអូស្រ្តាលីប្រាប់អ្នកគាំទ្រនៅទីនោះថា ការធ្វើនយោបាយរបស់លោកកន្លងមកមានការចង្អុលបង្ហាញ និងបង្ហាត់បង្រៀនពីជនបរទេស ក្នុងនោះមានសហរដ្ឋអាមេរិកជាដើម។ តែការចោទប្រកាន់នេះ ត្រូវបានលោក កឹម សុខា បដិសេធច្រាលចោល និងស្នើឲ្យតុលាការទម្លាក់ចោលការចោទប្រកាន់នេះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ