ចូលឆ្នាំថ្មី៖ បក្សភ្លើងទៀនចង់ឃើញការបញ្ចប់នូវជម្លោះនយោបាយតាមរយៈវប្បធម៌សន្ទនា
មិនខុសពីគណបក្សកាន់អំណាចទេ គណបក្សភ្លើងទៀនក៏បានចេញសារជូនពរឆ្នាំថ្មីនេះដែរ។ តាមរយៈលិខិតជូនពរឆ្នាំថ្មី គណបក្សជំទាស់មួយនេះ បានបួងសួងឲ្យកម្ពុជាជួបប្រទះសុខសន្តិភាពពិតប្រាកដ បញ្ចប់នូវជម្លោះនយោបាយនានាតាមរយៈវប្បធម៌សន្ទនា។
ចុះផ្សាយនៅថ្ងៃ៖
ស្តាប់ - ០១:៥៧
តាមរយៈលិខិតជូនពរចុះ ថ្ងៃទី១២ ខែមេសា ដែលមានហត្ថលេខាប្រធានគណបក្ស លោក ទាវ វណ្ណុល គណបក្សភ្លើងទៀន បានបួងសួងដល់ទេវតាឆ្នាំថ្មី ព្រះនាមកិមិរាទេវី ថែរក្សាកម្ពុជា ឲ្យជួបប្រទះនូវសុខសន្តិភាពពិតប្រាកដ បញ្ចប់នូវជម្លោះនយោបាយនានា តាមរយៈវប្បធម៌សន្ទនា និងឆ្ពោះទៅរកឯកភាពជាតិ លទ្ធិប្រជាធិបតេយ្យ សេរីពហុបក្សពិតប្រាកដ។
ការបួងសួងរបស់គណបក្សភ្លើងទៀន ខណៈដែលការបោះឆ្នោតជាតិ នៅក្នុងប្រទេសកម្ពុជា កាន់តែខិតជិតមកដល់ ហើយមានមន្ត្រីជាន់ខ្ពស់គណបក្សភ្លើងទៀន និងអនុប្រធាគណបក្សផង ត្រូវបានតុលាការចោទប្រកាន់ជាបន្តបន្ទាប់។ លោក សុន ឆ័យ អនុប្រធានគណបក្សនេះ ត្រូវបានតុលាការកាត់ឲ្យចាញ់ក្តី ក្រោយតតាំងក្នុងវិវាទនយោបាយជាមួយនឹងគណៈកម្មាធិការជាតិរៀបចំការបោះឆ្នោត និងគណបក្សប្រជាជនកម្ពុជា កាលពីខែតុលា ឆ្នាំ២០២២។
ចំណែកអនុប្រធានគណបក្សភ្លើងទៀនម្នាក់ទៀត គឺលោក ថាច់ សេដ្ឋា ត្រូវសមត្ថកិច្ច ចាប់ខ្លួន កាលពីថ្ងៃទី១៦មករា ពីបទ «មិនបានបំពេញកាតព្វកិច្ចចំពោះឧបករណ៍អាចជួញដូរបាន» ដែលប្រព្រឹត្តទៅនៅរាជធានីភ្នំពេញ កាលពីអំឡុងឆ្នាំ២០១៩ តាមច្បាប់ស្តីពីឧបករណ៍អាចជួញដូរបាន និងប្រតិបត្តិការទូទាត់សង។ នេះបើតាមដីកាតុលាការក្រុងភ្នំពេញ។
ពិធីបុណ្យចូលឆ្នាំថ្មី ប្រពៃណីជាតិ ប្រព្រឹត្តទៅ នៅថ្ងៃទី១៤, ១៥ និង១៦ ខែមេសា ឆ្នាំ២០២៣។ នៅទូទាំងប្រទេសកម្ពុជា មានការរៀបចំនានា ដើម្បីស្វាគមន៍ឱកាសឆ្នាំថ្មីនេះ ដូចជាសង្រ្កាន្តនៅតាមបណ្តារាជធានី ខេត្ត ជាពិសេសព្រឹត្តិការណ៍អង្គរសង្រ្កាន្តនៅខេត្តសៀមរាប ដែលមានទាំងវត្តមានលោកនាយករដ្ឋមន្ត្រី ហ៊ុន សែន ទៅចូលរួមផង។
ក្នុងពិធីបើកព្រឹត្តិការណ៍អង្គរសង្រ្កាន្ត នៅព្រឹកថ្ងៃទី១៤ ខែមេសា ឆ្នាំ២០២៣ នៅបរិវេណប្រាសាទបាយ័ន ខេត្តសៀមរាប លោកនាយករដ្ឋមន្ត្រី ហ៊ុន សែន បានថ្លែងថា សុខសន្តិភាពស្ថិរភាពផ្នែកនយោបាយ គឺជាកត្តាសំខាន់ ដែលបានផ្តល់ឱកាសសប្បាយរីករាយសម្រាប់ប្រជាជនកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ