ហ៊ុន ម៉ាណែត៖ តួអង្គនាយករដ្ឋមន្ត្រីថ្មីដែលសារព័ត៌មានអន្តរជាតិចាប់អារម្មណ៍ពីការស្តារទំនាក់ទំនងជាមួយបស្ចិមលោក
ការចុះផ្សាយពីលោក ហ៊ុន ម៉ាណែត ដែលត្រៀមកាន់តំណែងជានាយករដ្ឋមន្ត្រីកម្ពុជា ឆាប់ៗខាងមុខនេះ កំពុងត្រដែតឡើងតាមបណ្តាញសារព័ត៌មានអន្តរជាតិធំៗ ជាច្រើន បន្ទាប់ពីការប្រកាសរបស់នាយករដ្ឋមន្ត្រីក្នុងអំណាច៣៨ឆ្នាំ លោក ហ៊ុន សែន ថាលោកចុះចេញពីកៅអីដឹកនាំរដ្ឋាភិបាលកម្ពុជានៅខែក្រោយនេះ។ សារព័ត៌មានអន្តរជាតិធំៗ បានលើកឡើងពីការស្តារទំនាក់ទំនងការទូតរវាងកម្ពុជានិងបស្ចិមលោកឡើងវិញ ខណៈដែលគេកត់សម្គាល់ថា ចិនកំពុងមានប្រៀបក្នុងទំនាក់ទំនងជាមួយកម្ពុជា។
ចុះផ្សាយនៅថ្ងៃ៖
ស្តាប់ - ០២:៤៧
ដោយសារតែលោក ហ៊ុន ម៉ាណែត មានប្រវត្តិសិក្សាចេញពីសាលាហ្វឹកហ្វឺនទាហាន West Point នៃសហរដ្ឋអាមេរិក កាសែត The Washington Post បានឡើងចំណងជើងរបស់ខ្លួនថា «West Point បានបណ្តុះបណ្តាលអ្នកស្នងមរតកនៃប្រព័ន្ធអត្តាធិបតេយ្យនៅកម្ពុជា។ តើ ហ៊ុន ម៉ាណែត ជានរណា?»។
នៅក្នុងសម្រង់ខ្លឹមសារព័ត៌មានរបស់ The Washington Post បានលើកយកករណីស្រាវជ្រាវរបស់វិទ្យាស្ថាន Lowy អូស្ត្រាលី ដែលបានសិក្សាពីសកម្មភាពរបស់លោក ហ៊ុន ម៉ាណែត បានជួបជាមួយនឹងមេដឹកនាំបរទេសធំៗ ក្នុងរយៈពេលពីរឆ្នាំចុងក្រោយនេះ។ យ៉ាងណា តាម The Washington Post គឺមានការបង្ហាញតិចតួចបំផុត ដែលការអប់រំបែបលោកខាងលិចរបស់លោក ហ៊ុន ម៉ាណែត អាចមានឥទ្ធិពលលើជីវិតនយោបាយរបស់លោក។
រីឯសារព័ត៌មាន BBC របស់អង់គ្លេស បានឡើងចំណងជើងទាក់ទងនឹងលោក ហ៊ុន ម៉ាណែត ថា «លោក ហ៊ុន សែន លាលែងពីតំណែងក្រោយពេល៤ទសវត្សរ៍ និងតែងតាំងកូនប្រុសជានាយករដ្ឋមន្ត្រី»។ សម្រង់ខ្លឹមសារព័ត៌មានរបស់ BBC បានប្រៀបធៀបពីការដឹកនាំរបស់លោកនាយករដ្ឋមន្ត្រី ហ៊ុន សែន និងការតៀមរបស់លោក ហ៊ុន ម៉ាណែត ដែលនឹងចូលទៅអង្គុយកៅអីនាយករដ្ឋមន្ត្រី ពេលខាងមុខនេះ។
BBC បានចុះផ្សាយថា បើប្រៀបធៀបទៅនឹងឪពុករបស់លោក ដែលគ្រប់គ្រងដោយកណ្តាប់ដៃដែក គឺមានការរំពឹងទុកខ្លះថា លោក ហ៊ុន ម៉ាណែត ដែលបានសិក្សាពីសាលាយោធាអាមេរិក West Point និងសាកលវិទ្យាល័យ Bristol ផងនោះ អាចមានរបៀបដឹកនាំបែបគាបសង្កត់តិចជាងលោក ហ៊ុន សែន ហើយអាចទទួលយកការអំពាវនាវរបស់ប្រទេសបច្ចឹមលោក ពីបញ្ហាសិទ្ធិមនុស្សនៅកម្ពុជា។ ទោះជាយ៉ាងណា អ្នកវិភាគ ថា លោក ហ៊ុន ម៉ាណែត មិនបានបង្ហាញភស្តុតាងដែលថាលោកអាចនឹងបើកចំហជាងនេះទេ។ នេះបើតាម BBC។
រីឯសារព័ត៌មាន ASIA TIMES មានមូលដ្ឋាននៅហុងកុង បានដាក់ចំណងជើងថា «តើ ហ៊ុន ម៉ាណែត នឹងស្តារទំនាក់ទំនងជាមួយលោកខាងលិចទេ?»។ ជាអត្ថបទសរសេរដោយលោក Davit Hutt ដែលធ្លាប់សរសេររិះគន់រដ្ឋាភិបាលលោក ហ៊ុន សែន បានចុះផ្សាយថា ទីបំផុតទីក្រុងភ្នំពេញ អាចនឹងកែប្រែទំនាក់ទំនងជាមួយបស្ចិមប្រទេស តាមរយៈការដកស្រង់សម្តីរបស់អ្នកវិភាគ។ អ្នកវិភាគបានប្រាប់ ASIA TIMES ថា ការគ្រប់គ្រងរបស់លោក ហ៊ុន ម៉ាណែត នឹងចង់ឲ្យភាពល្អប្រសើរជាមួយលទ្ធិប្រជាធិបតេយ្យបស្ចិមប្រទេស បើទោះបីជាមិនសូវផ្តោតលើបញ្ហាសិទ្ធិមនុស្ស ឬប្រជាធិបតេយ្យក៏ដោយក្តី។
គួរកត់សម្គាល់ថា ការប្រកាសពីការត្រៀមឡើងរបស់លោក ហ៊ុន ម៉ាណែត ជានាយករដ្ឋមន្ត្រីថ្មីកម្ពុជា ក៏រំជួលដល់ក្រសួងការបរទេសអាមេរិកដែលត្រូវចាប់អារម្មណ៍។ នៅក្នុងសន្និសីទព័ត៌មានមួយ មានអ្នកសារព័ត៌មានបរទេសបានចោទសួរទៅមន្ត្រីនាំពាក្យក្រសួងការបរទេសអាមេរិក ថា អាមេរិកបានត្រៀមខ្លួនធ្វើការជាមួយរដ្ឋាភិបាលលោក ហ៊ុន ម៉ាណែត ហើយឬនៅ?។ ចម្លើយរបស់អ្នកនាំពាក្យ គឺ មិនឆ្លើយឲ្យចំន័យឡើយ ដោយគ្រាន់តែប្រាប់ថា អាមេរិកមានការរំខានចិត្តចំពោះការបោះឆ្នោតដែលមិនសេរី និងយុត្តិធម៌។ តែសម្រាប់រដ្ឋាភិបាលថ្មីនេះ គឺអាមេរិកលើកឡើងថា នៅមានឱកាសដើម្បីស្រោចស្រង់មុខមាត់កម្ពុជាលើឆាកអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ