លោក ហ៊ុន ម៉ាណែត ទទួលបានងារជាសម្ដេចជាមួយស្នូទះដៃនិងរលករិះគន់
«សម្តេចមហាបវរធិបតី»ជាងារថ្មីដែលលោក ហ៊ុន ម៉ាណែត បន្ថែមពីលើងារមានស្រាប់ជាកត្តិទេសាភិបាលបណ្ឌិត។ ងារជាសម្តេចមហាបវរធិបតីដែលលោកនាយករដ្ឋមន្ត្រី ហ៊ុន ម៉ាណែត ទទួលបាននៅពេលនេះតាមរយៈ ព្រះរាជក្រឹត្យត្រាស់បង្គាប់របស់ព្រះមហាក្សត្រកម្ពុជា ចុះថ្ងៃទី២ខែកញ្ញាឆ្នាំ២០២៣។ ក្រៅពីលោក ហ៊ុន ម៉ាណែត លោកស្រី ឃួន សុដារី ក៏ទទួលបានងារជាសម្ដេចដែរ«សម្តេចមហារដ្ឋសភាធិការធិបតី»។ ជាការកត់សម្គាល់លោក ហ៊ុន ម៉ាណែត និងលោកស្រី ឃួន សុដារី បានរងការរិះគន់ទន្ទឹមនឹងការអបអរសាទរក្រោយបានងារជាសម្ដេច។
ចុះផ្សាយនៅថ្ងៃ៖
ស្តាប់ - ០២:១៥
លោកស្រី ចក សុភាព នាយិការមជ្ឈមណ្ឌលសិទ្ធិមនុស្សកម្ពុជាលើកឡើងលើបណ្ដាញសង្គមថា កាលពីជំនាន់មុនងារមន្ត្រីសំខាន់ៗត្រូវបានតែងតាំងដោយសារស្នាដៃការងារ។ តែសម័យនេះ ងារជាច្រើនអាចលែងមានតម្លៃ ព្រោះអ្នកណាក៏អាចទទួលបាន ទោះមិនទាន់បានបញ្ចេញឬបន្សល់ស្នាដៃអ្វី ដោយសារតែ សែគ្រួសារបក្សពួក ឬគ្រាន់តែចុះចូល។
លោក គង់ រ៉ៃយ៉ា ជាអ្នកគាំទ្រគណបក្សប្រឆាំងលើកឡើងស្រដៀងនេះដែរថា លោក ហ៊ុន ម៉ាណែត ទទួលបានងារថ្មីទាំងមិនទាន់ឃើញធ្វើសមិទ្ធផលសម្រាប់ជាតិមួយផង។
ចំណែក លោក សេង សារី ដែលជាអ្នកវិភាគនយោបាយបានបង្ហាញសារបញ្ឈិតបញ្ឆៀងថា ពូជពង្សរាស្រ្តឡើងធ្វើស្តេចមិនមែនជារឿងថ្មីទេក្នុងប្រវត្តិសាស្រ្តខ្មែរ ហើយអ្នកជិតខាងនៅតែមានឥទ្ធិលក្នុងប្រព័ន្ធនយោបាយខ្មែរដដែល។ លោក សេង សារី បានគូសរំលេចថា នៅក្នុងអំឡុងឆ្នាំ (១៣២៣-១៣៤០) គឺជាភស្តុតាងប្រវត្តិសាស្រ្តនៃការបញ្ចប់រាជវង្សសែ“វរ្ម័ន”។ ៧០០ ឆ្នាំក្រោយមក សន្តតិវង្សថ្មីមួយ កំពុងតែបញ្ចប់រាជវង្សសែ ”ត្រសក់ផ្អែម” បណ្តើរៗហើយ។
ផ្ទុយពីលោក សេង សារី លោក ហ្សង់ ហ្វ្រង់ស័រ តាន់ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការ ការបរទេស និងសហប្រតិបត្តិការអន្តរជាតិ បានលើកឡើងថា ជាទូទៅ«សម្តេច» គឺជាគោរមងារខ្ពង់ខ្ពស់ឧត្តុង្គឧត្តមមួយនៅក្នុងបណ្តាប្រទេសដែលប្រកាន់របបរាជានិយម។ ដោយឡែក នៅកម្ពុជា ការៀបផ្សារភ្ជាប់គោរមងារ«សម្តេច» ទៅនឹងតំណែងកំពូលខ្ពង់ខ្ពស់ ជាការមួយសមរម្យ ដ្បិតវាស្របទៅនឹងប្រពៃណីបរមបុរាណរបស់ប្រទេសកម្ពុជា។ នៅប្រទេសកម្ពុជា តាំងពីបុរាណកាលមក គោរមងារមួយចំនួនសុទ្ធតែភ្ជាប់ទៅនឹងមុខតំណែងសំខាន់ៗ ឧទាហរណ៍ដូចជា «ឧកញ៉ាចក្រី», «ឧកញ៉ាក្រឡាហោម», «ឧកញ៉ាយមរាជ»។ល។ ក្នុងន័យនេះ ការតភ្ជាប់គោរមងារ«សម្តេច»ទៅនឹងមុខតំណែង ប្រធានព្រឹទ្ធសភា ប្រធានរដ្ឋសភា ឬ នាយករដ្ឋមន្ត្រី គឺជាការវិលត្រឡប់ទៅរកប្រពៃណីជាតិមួយដ៏រឹងមាំនិងដ៏គង់វង្សយូរអង្វែងនៃរបបរាជានិយមនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ