បក្សភ្លើងទៀនត្រៀមសុំក្រសួងមហាផ្ទៃចេញលិខិតទុតិយតាលើលិខិតចុះបញ្ជីគណបក្ស
គណបក្សភ្លើងទៀន ត្រៀមស្នើសុំក្រសួងមហាផ្ទៃចេញលិខិតទុតិយាលើលិខិតចុះបញ្ជីគណបក្សនៅឯក្រសួងមហាផ្ទៃ ដើម្បីអាចឲ្យបក្សប្រឆាំងមួយនេះ ចូលរួមការបោះឆ្នោតពេលក្រោយៗ។ ជំហរបស់គណបក្សភ្លើងទៀនយ៉ាងដូច្នេះ គឺបញ្ជាក់តាមរយៈអ្នកនាំពាក្យ ក្រោយពេលដែលក្រសួងមហាផ្ទៃបានយល់ព្រមឲ្យតំណាងបក្សភ្លើងទៀន ចូលជួបនៅថ្ងៃព្រហស្បតិ៍ខាងមុខ ក្នុងការជជែកពីលិខិតចុះបញ្ជីរបស់គណបក្សដែលបានបាត់។
ចុះផ្សាយនៅថ្ងៃ៖
ស្តាប់ - ០២:១១
បើតាមសេចក្តីជម្រាបរបស់ក្រសួងមហាផ្ទៃ នៅថ្ងៃអង្គារ គឺ ក្រសួងមហាផ្ទៃអនុញ្ញាតឲ្យតំណាងគណបក្សភ្លើងទៀនចំនួន៥នាក់ ចូលជួបពិភាក្សាជាមួយតំណាងក្រសួងមហាផ្ទៃ នៅថ្ងៃព្រហស្បតិ៍ ទី២១កញ្ញា ខាងមុខ ដើម្បីជជែកពីបញ្ហាលិខិតចុះបញ្ជីគណបក្សរបស់គណបក្សភ្លើងទៀនដែលបានបាត់បង់។
ជំនួបនៅថ្ងៃព្រហស្បតិ៍ខាងមុខនេះ អ្នកនាំពាក្យគណបក្សភ្លើងទៀន បានអះអាងថា បក្សប្រឆាំងនឹងបន្តទាមទារក្រសួងមហាផ្ទៃ ចេញលិខិតទុតិយតាលើលិខិតលេខ១៩៣។ លិខិតលេខ១៩៣ ដែលជាលិខិតចុះបញ្ជីគណបក្សភ្លើងទៀននៅឯក្រសួងមហាផ្ទៃ។
លោក គីមសួរ ភីរិទ្ធិ អ្នកនាំពាក្យបក្សភ្លើងទៀន បានបញ្ជាក់ប្រាប់វិទ្យុបារាំងអន្តរជាតិ ថា គណបក្សភ្លើងទៀននៅតែបន្តរក្សាជំហ ឲ្យក្រសួងមហាផ្ទៃជួយដោះស្រាយបញ្ហារបស់ខ្លួន ដើម្បីអាចចូលរួមការបោះឆ្នោតពេលខាងមុខ។ បើតាមលោក គីមសួរ ភីរិទ្ធិ លោកជឿជាក់ថា លិខិតទុតិយតាលើលិខិតចុះបញ្ជីគណបក្ស នឹងអាចជួយគណបក្សភ្លើងទៀន អាចចូលរួមការបោះឆ្នោត។
គួរបញ្ជាក់ថា គណបក្សភ្លើងទៀន បានបាត់បង់ឱកាសចូលរួមការបោះឆ្នោតជ្រើសតាំងតំណាងរាស្ត្រអាណត្តិទី៧កន្លងទៅនេះ ដោយសារតែបក្សបានបាត់លិខិតច្បាប់ដើមនៃការចុះបញ្ជីគណបក្ស។ ក្រុមមន្ត្រីបក្សភ្លើងទៀន បញ្ជាក់ថា លិខិតនោះបានបាត់នាអំឡុងពេលដែលទីស្នាក់ការនៃអតីតបក្សសង្រ្គោះជាតិ ត្រូវបានអាជ្ញាធរចូលបង្ក្រាបកាលពីឆ្នាំ២០១៧។
យ៉ាងណាមិញ ក្រសួងមហាផ្ទៃ កាលពីដើមខែមិថុនាបានចេញលិខិតបញ្ជាក់មួយជូនដល់គណបក្សភ្លើងទៀន ថាជាគណបក្សស្របច្បាប់ ដើម្បីចុះឈ្មោះចូលរួមការបោះឆ្នោត ក៏ប៉ុន្តែលិខិតនោះមិនអាចជួយអ្វីជាដុំកំភួនដល់បក្សប្រឆាំងមួយនេះឡើយ។ ពោលគឺ គណៈកម្មាធិការជាតិរៀបចំការបោះឆ្នោត បានបញ្ជាក់ថា ការចុះឈ្មោះចូលរួមការបោះឆ្នោតរបស់គណបក្ស ត្រូវតែមានលិខិតចុះបញ្ជីច្បាប់ដើម។
ក្រោយបាត់បង់ឱកាសចូលរួមប្រកួតជាមួយបក្សកាន់អំណាច តាមរយៈការបោះឆ្នោត គណបក្សភ្លើងទៀន ក៏ព្យាយាមសុំជួបខាងតំណាងក្រសួងមហាផ្ទៃ ជាញឹកញយ ដើម្បីឲ្យស្ថាប័នជាអាណាព្យាបាលគណបក្សនយោបាយមួយនេះ ជួយអន្តរាគមន៍។ បើតាមអ្នកនាំពាក្យ គណបក្សភ្លើងទៀនសង្ឃឹមរហូតដល់៩០% ថា បញ្ហាលិខិតចុះបញ្ជីរបស់គណបក្សនឹងអាចដោះស្រាយបាន ប្រសិនបើដំណើរការតាមនិតិវិធីច្បាប់។ តែផ្ទុយមកវិញ វាក៏លំបាក មិនអាចទៅរួច ប្រសិនបើជារឿងនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ