កម្ពុជាផ្ទុះជំងឺហ្ស៊ីកាលើកដំបូងនៅឆ្នាំនេះលើកុមារម្នាក់
ក្រសួងសុខាភិបាលបានរកឃើញជាលើកដំបូងនៅឆ្នាំ២០២៣នេះ នូវប្រភេទជំងឺហ្ស៊ីកាដែលបានកើតទៅលើកុមារអាយុ៧ឆ្នាំម្នាក់នៅខេត្តកំពង់ធំ។ បើតាមសេចក្តីប្រកាសរបស់ក្រសួងសុខាភិបាលនៅថ្ងៃអាទិត្យនេះ អ្នកជំងឺបានចូលសម្រាកនៅមន្ទីរពេទ្យកាលពីថ្ងៃទី១៨កញ្ញា ដោយមានអាការៈក្តៅខ្លួនខ្លាំង ក្អួត និងរាគ។ ក្រោយគ្រូពេទ្យធ្វើតេស្តរកមេរោគគ្រុនឈាម គឺលទ្ធផលអវិជ្ជមាន។ ប៉ុន្តែ ការយកវត្ថុវិភាគទៅមន្ទីរពេទ្យប៉ាស្ទ័រ នៅថ្ងៃទី២១កញ្ញា បង្ហាញថា អ្នកជំងឺមានវិជ្ជមានវីរុសហ្ស៊ីកា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣២
ក្រសួងសុខាភិបាលបានគូសបញ្ជាក់ថា វីរុសហ្ស៊ីកា គឺឆ្លងតាមរយៈមូសខ្លាខាំ។ មូសខ្លានេះគឺដូចគ្នានឹងមូសខ្លាដែលខាំកើតជំងឺគ្រុនឈាម និងគ្រុនឈីក។ វីរុសនេះអាចឆ្លងតាមរួមភេទ ពីព្រោះមាននៅក្នុងទឹកនោម ឈាម ទឹកមាត់ ទឹកភ្លោះ។ ហ្ស៊ីកា អាចឆ្លងពីម្តាយទៅកូន ទាំងអំឡុងពេលមានផ្ទៃពោះ និងសម្រាល។
ប៉ុន្តែជំងឺនេះមិនធ្ងន់ធ្ងរឡើយ មានចេញរោគសញ្ញា២ទៅ៣ថ្ងៃក្រោយពេលឆ្លង។ អាការៈទូទៅ គឺមានភ្នែកក្រហម ឈឺសន្លាក់ ហើយវាអាចជាសះស្បើយក្នុងរយៈពី២ថ្ងៃទៅ៧ថ្ងៃ ហើយអត្រាស្លាប់មានតិចតួច។ តែសម្រាប់ស្ត្រីមានផ្ទៃពោះ គឺអាចនឹងមានសភាពធ្ងន់ដល់សន្លប់ ហើយទារកក្នុងផ្ទៃអាចតូចជាងធម្មតា។នេះបើតាមក្រសួងសុខាភិបាល។
សម្រាប់វិធីព្យាបាលវិញ អ្នកជំងឺហ្ស៊ីកា ត្រូវផឹកទឹកឲ្យបានច្រើន ដាក់ថ្នាំបញ្ចុះកម្តៅ តែមិនត្រូវប្រើថ្នាំផ្សះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ