ខួប៣០ឆ្នាំនៃរដ្ឋធម្មនុញ្ញ៖ពន្យាពេលទៅធ្វើថ្ងៃ៦តុលា
ថ្ងៃទី២៤កញ្ញានេះគឺជាខួប៣០ឆ្នាំនៃការប្រកាសដាក់ឲ្យប្រើរដ្ឋធម្មនុញ្ញឆ្នាំ១៩៩៣ ដែលជាច្បាប់កំពូលរបស់កម្ពុជា ក្រោយចាកចេញពីសង្រ្គាមស៊ីវិល។ តាំងពីឆ្នាំ១៩៩៣មកដល់បច្ចុប្បន្ន ច្បាប់កំពូលនេះ ត្រូវបានរដ្ឋាភិបាលស្នើ និងធ្វើវិសោធនកម្មចំនួន១០លើកមកហើយ ក្នុងន័យដោះស្រាយបញ្ហាជាប់គាំងនយោបាយ។ ក្រុមប្រឹក្សាធម្មនុញ្ញ បានប្រកាសថា ការអបអរខួប៣០ឆ្នាំនៃថ្ងៃប្រវត្តិសាស្ត្រនេះនឹងត្រូវប្រារព្ធយ៉ាងអធិកអធម នៅថ្ងៃទី០៦ ខែតុលា ឆ្នាំ២០២៣ នៅសាលសន្និសីទកោះពេជ្រ ក្រោមព្រះរាជាធិបតីភាព ព្រះមហាក្សត្រ។ ការពន្យាពេលអបអរទិវានេះ គឺដោយសារតែមានសំណូមពរជាក់ស្តែង។
ចុះផ្សាយនៅថ្ងៃ៖
ជាការកត់សំគាល់ក្នុងខួប៣០ឆ្នាំការប្រើច្បាប់កំពូលនេះ គឺហាក់មិនសូវឃើញអ្នកនយោបាយបញ្ចេញសារអបអរ ឬរិះគន់នៃការធ្វើវិសោធនកម្មរដ្ឋធម្មនុញ្ញដូចបណ្តាឆ្នាំកន្លងទៅនោះឡើយ។
ក្នុងរយៈពេល៣០ឆ្នាំមកនេះ រដ្ឋធម្មនុញ្ញកម្ពុជា ត្រូវបានកែប្រែចំនួន១០លើករួចមកហើយ។ ការធ្វើវិសោធនកម្មដំបូងគឺនៅឆ្នាំ១៩៩៤ លើកទី២នៅឆ្នាំ១៩៩៩ លើកទី៣ឆ្នាំ២០០១ លើកទី៤ឆ្នាំ២០០៥ លើកទី៥ឆ្នាំ២០០៦ លើកទី៦ឆ្នាំ២០០៨ លើកទី៧ឆ្នាំ២០១៤ លើកទី៨ឆ្នាំ២០១៨ លើកទី៩ឆ្នាំ២០២១ដែលធ្វើឡើងដើម្បីកំណត់សញ្ជាតិតែមួយសម្រាប់តំណែងនាយករដ្ឋមន្ត្រី ប្រធានរដ្ឋសភា ប្រធានព្រឹទ្ធសភា និងប្រធានក្រុមប្រឹក្សាធម្មនុញ្ញ។
រីឯការកែប្រែលើកទី១០ចុងក្រោយបង្អស់ គឺកាលពីខែកក្កដាឆ្នាំ២០២២ ដោយមានមាត្រាមួយចំនួនធំ សុទ្ធសឹងតែទាក់ទងនឹងតំណែងនាយករដ្ឋមន្ត្រី និងដំណើរប្រព្រឹត្តទៅនៃសភាជាតិ។ ការធ្វើវិសោធនកម្មលើកទី១០ បានរងនូវមតិរិះគន់មិនសំចៃដៃពីសំណាក់អង្គការសង្គមស៊ីវិល និងក្រុមអ្នកនយោបាយនៅក្រៅរដ្ឋាភិបាល ដោយពួកគេចាត់ទុកថា ជាការពង្រឹងអំណាចនីតិប្រតិបត្តិ និងបន្ថយអំណាចសភា។
សម្រាប់ លោកបណ្ឌិត ឡៅ ម៉ុងហៃ អ្នកវិភាគនយោបាយបានសរសេរលើហ្វេសប៊ុកនៅថ្ងៃនេះថា មេដឹកនាំបានស្បថស្បែថាគោរពរដ្ឋធម្មនុញ្ញ។ លោកថាប្រសិនបើដូច្នោះមែន ពលរដ្ឋនឹងបានសុខ មានសណ្តាប់ធ្នាប់សង្គម មានយុត្តិធម៌ អធិបតេយ្យភាព បូរណភាពដែនដី និងឯកភាពជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ