អ្នកជំនាញសុខភាព៖ក្រសួងសុខាភិបាលគួរស៊ើបអង្កេតទីតាំងផ្សេងៗដែលកំពុងលក់អាហារបំប៉ន់សុខភាព
អ្នកជំនាញផ្នែកសុខភាពសាធារណៈសាទរដែលក្រសួងសុខាភិបាលសម្រេចបិទទីតាំងលក់ផលិតផលជំនួយសុខភាពពីរកន្លែងថ្ងៃទី២៤ខែកញ្ញាឆ្នាំ២០២៣ ក្នុងថ្ងៃតែមួយ។ ទីតាំងទាំងពីរមានឈ្មោះថា ឱសថស្ថានគ្រួសារកក់ក្ដៅ និងកន្លែងលក់ឱសថបុរាណរបស់លោក ស៊ូ សេងហួរ។
ចុះផ្សាយនៅថ្ងៃ៖
ស្តាប់ - ០៤:០៥
លោកវេជ្ជបណ្ឌិត នុត សម្បត្តិ ប្រធានវិទ្យាស្ថានវេជ្ជសាស្ត្រ ជីវសាស្ត្រ និងកសិកម្មនៃរាជបណ្ឌិតសភាកម្ពុជាថ្លែងនៅថ្ងៃទី២៥ខែកញ្ញាឆ្នាំ២០២៣ថា ការផ្សព្វផ្សាយផលិតផលចេញពីទីតាំងទាំងពីរកន្លងមកខុសពីការពិតទាំងស្រុងដែលធ្វើឲ្យប៉ះពាល់ដល់សុខភាពសាធារណៈគួរឲ្យបារម្ភ។
បន្ថែមពីលើការអបអរសាទរអ្នកជំនាញរូបនេះស្នើសុំក្រសួងសុខាភិបាលធ្វើកិច្ចការងារទាំងនេះឲ្យភាពសុក្រិត្យជាងនេះទៀត ហើយជាការល្អប្រសិនបើ ក្រសួងសុខាភិបាលមានលទ្ធភាពស្រាវជ្រាវរកទីតាំងផ្សេងទៀតដែលជ្រកក្រោមយីហោលក់អាហារបំប៉ន់សុខភាពខុសច្បាប់។ មួយវិញទៀត! ការតាមដាន និងអង្កេតមើលសុខភាពពលរដ្ឋដែលកំពុងប្រើប្រាស់ផលិតផលរបស់ទីតាំងទាំងពីរក៏ជារឿងសំខាន់សម្រាប់ផលរំខានរយៈពេលយូរ។ នេះជាយោបល់របស់លោកវេជ្ជបណ្ឌិត នុត សម្បត្តិ។
ក្រសួងសុខាភិបាលនៅថ្ងៃទី២៤ ខែកញ្ញា ឆ្នាំ២០២៣នេះបានបញ្ជាក់ថា មុនសម្រេចចិត្តបិទកន្លែងលក់ឱសថបុរាណរបស់លោក ស៊ូ សេងហួរ ក្រសួងធ្លាប់ទុកឱកាសឲ្យលោកម្នាក់នេះកែខ្លួនដែរតែមិនស្ដាប់។ នាយកដ្ឋានឱសថ ចំណីអាហារបរិក្ខារពេទ្យ និងគ្រឿងសំអាងនៃក្រសួងសុខាភិបាលនិងមន្ទីរសុខាភិបាលរាជធានីភ្នំពេញធ្លាប់បានចុះទៅអប់រំនិងផាកពិន័យលោក ស៊ូ សេងហួរ ពីរដងរួចហើយ នៅរវាងខែមីនានិងឧសភាឆ្នាំ២០២៣ ក្នុងសំណុំរឿងផ្សព្វផ្សាយការព្យាបាលជំងឺ ចែកចាយនិងលក់ឱសថបុរាណដោយគ្មានច្បាប់អនុញ្ញាតពីក្រសួងសុខាភិបាល និងបើកទីតាំងអគារឱសថបុរាណថ្មីដោយគ្មានច្បាប់អនុញ្ញាតពីរដ្ឋបាលរាជធានីភ្នំពេញ។
ជាការកត់សម្គាល់សេចក្ដីសម្រេចរបស់ក្រសួងសុខាភិបាលធ្វើឡើងស្របគ្នានឹងមតិអ្នកប្រើប្រាស់បណ្ដាញសង្គមមួយចំនួនទទូចឲ្យមានចំណាត់ការលើលោក ស៊ូ សេងហួរ បន្ទាប់ពីបុគ្គលរូបនេះបង្កើតមាតិកានិងបញ្ចេញវិដេអូមិនសមរម្យដែលគេចាត់ទុកថា បំពុលសង្គម។
បន្ថែមលើនេះក្រសួងសុខាភិបាល អំពាវនាវដល់ប្រជាពលរដ្ឋប្រុងប្រយ័ត្នក្នុងការសម្រេចចិត្តទទួលការព្យាបាលដោយមន្ដអាគម ឬឱសថ បុរាណដែលខុសច្បាប់ និងកុំជឿការឃោសនាភូតកុហកបោកប្រាស់ទាំងនោះ តាមបណ្តាញសង្គម ឃ្លីបវីដេអូ ឬការផ្សព្វផ្សាយតៗគ្នា ដែលនាំឱ្យខាតបង់ប្រាក់ ពេលវេលា ប៉ះពាល់ដល់សុខភាព និងអាចបណ្តាលឱ្យគ្រោះថ្នាក់ដល់ អាយុជីវិតជាយថាហេតុ។
ចំណែកការបិទទីតាំងលក់ឱសថគ្រួសារកក់ក្ដៅវិញ! ក្រសួងសុខាភិបាលតាមរយៈសេចក្ដីប្រកាសព័ត៌មានដោយឡែកអះអាងថា ក្រុមហ៊ុននេះមិនគោរពនិងអនុវត្តតាមខ្លឹមសារលិខិតចុះថ្ងៃទី១៩ខែកញ្ញាឆ្នាំ២០២៣ បង្គាប់ឲ្យលុបចោលបញ្ជិកាចរាចរផលិផលបំប៉នសុខភាពGINSENG PRO ដែលមានផ្ទុកសារធាតុជាតិសកម្ម DEXAMETHASONE និង PREDNISLON។
ក្រសួងបានអំពាវនាវឲ្យសាធារណៈជនបញ្ឈប់ការទិញឬប្រើប្រាស់ផលិតផលបំប៉ន់សុខភាពរបស់គ្រួសារកក់ក្ដៅព្រោះអាហារបំប៉ន់របស់ក្រុមហ៊ុននេះមានគ្រោះថ្នាក់ដល់អ្នកប្រើប្រាស់ក្នុងរយៈពេលយូរដូចជាៈប៉ះពាល់ប្រព័ន្ធរំលាយអាហារ អាចដំបៅឬធ្លាយក្រពះខ្សោយតម្រង់នោម លើសឈាម ទឹកនោមផ្អែម ខ្សោយប្រព័ន្ធភាពស៊ាំសារពាង្គកាយជាដើម។ បន្ថែមពីលើនេះទៀតក្រសួងសុខាភិបាលបានព្រមានចាត់វិធានការច្បាប់ចំពោះម្ចាស់ក្រុមហ៊ុនគ្រួសារកក់ក្ដៅ តំណាងចែកចាយ និងអ្នកពាក់ព័ន្ធ បើនៅតែបន្តលក់ផលិតផលបំប៉ន់សុខភាពដែលបានឃាត់នេះទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ