កម្ពុជាផ្តើមចាក់ថ្នាំបង្ការជំងឺមហារីកមាត់ស្បូនដល់កុមារីនៅទូទាំងប្រទេសពេញមួយឆ្នាំ២០២៣
កម្ពុជាបានចាប់ផ្តើមចាក់ថ្នាំបង្ការជំងឺមហារីកមាត់ស្បូននៅតាមសាលារៀន និងភូមិឃុំ-សង្កាត់ ឬ មណ្ឌលសុខភាពនៅទូទាំងប្រទេសដោយឥតគិតថ្លៃ ចាប់ពីថ្ងៃទី៥ ខែតុលា ឆ្នាំ២០២៣តទៅ។ ថ្នាំបង្ការជំងឺមហារីកមាត់ស្បូន ដែលផ្តល់តែចំនួនមួយដូសដល់កុមារីម្នាក់ៗ ដែលមានអាយុ៩ឆ្នាំ ដោយឥតគិតថ្លៃនេះ ត្រូវបានដាក់បញ្ចូលទៅក្នុងកម្មវិធីជាតិផ្តល់ថ្នាំបង្ការដើម្បីការពារជំងឺមហារីកមាត់ស្បូន។
ចុះផ្សាយនៅថ្ងៃ៖
ស្តាប់ - ០២:១៩
កម្ពុជាបានចាប់ផ្តើមចាក់ថ្នាំបង្ការជំងឺមហារីកមាត់ស្បូន ដោយឥតគិតថ្លៃ នៅតាមសាលារៀនបឋមសិក្សា ភូមិឃុំ-សង្កាត់ ឬ មណ្ឌលសុខភាពនៅទូទាំងប្រទេស ពេញមួយឆ្នាំ ចាប់ពីថ្ងៃទី៥ ខែតុលា ឆ្នាំ២០២៣តទៅ។ ថ្នាំបង្ការជំងឺមហារីកមាត់ស្បូន ដែលត្រូវផ្តល់តែចំនួន១ដូស ដល់កុមារីម្នាក់ៗដែលមានអាយុ៩ឆ្នាំ ត្រូវបានដាក់បញ្ចូលទៅក្នុងកម្មវិធីជាតិផ្តល់ថ្នាំបង្ការ ដើម្បីការពារជំងឺមហារីកមាត់ស្បូន។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាលកម្ពុជា។
កម្មវិធីជាតិផ្តល់ថ្នាំបង្ការដើម្បីការពារជំងឺមហារីកមាត់ស្បូនរបស់ក្រសួងសុខាភិបាលនេះ ត្រូវបានអនុវត្តដោយមានការគាំទ្រពីអង្គការសម្ព័ន្ធសកលសម្រាប់វ៉ាក់សាំង និងការផ្តល់ថ្នាំបង្ការ (Gavi) អង្គការសុខភាពពិភពលោក (WHO) អង្គការមូលនិធីសម្រាប់កុមារនៃអង្គការសហប្រជាជាតិ (UNICEF) និងអង្គការគ្លីនតុនហែល្ស អែកសេស អ៊ីនីតស៊ីអេធីវ (CHAI) តាមរយៈការផ្តល់ថ្នាំបង្ការនៅតាមសាលារៀនបឋមសិក្សា នៅតាមភូមិ ឬ សហគមន៍ និងការផ្តល់ថ្នាំបង្ការពេញមួយឆ្នាំនៅតាមបណ្ឌលសុខភាព។
យោងតាមតួលេខ ចាប់ពីឆ្នាំ២០១៧ ដល់ ឆ្នាំ២០១៨ ក្រសួងសុខាភិបាលកម្ពុជាបានអនុវត្តគម្រោងផ្តល់ថ្នាំបង្ការជំងឺមហារីកមាត់ស្បូនដល់កុមារីអាយុ៩ឆ្នាំ នៅក្នុងស្រុករដ្ឋបាលចំនួន១០ នៅក្នុងខេត្តសៀមរាប និងខេត្តស្វាយរៀង ដែលសម្រេចបានការគ្របដណ្តប់៩៦ភាគរយ។
គួរដឹងថា នៅប្រទេសកម្ពុជា ជំងឺមហារីកមាត់ស្បូនគឺជាមូលហេតុចម្បងទី២ ក្នុងចំណោមមហារីកគ្រប់ប្រភេទដែលកើតឡើងទៅលើស្ត្រីគ្រប់វ័យ ដោយយោងទៅតាមរបាយការណ៍របស់អង្គការសុខភាពពិភពលោកឆ្នាំ២០២០ ជំងឺមហារីកមាត់ស្បូនសរុបចំនួនប្រមាណ១១៣៥ករណី ឬ ស្មើនឹង១១.៤ភាគរយ ត្រូវបានធ្វើរោគវិនិច្ឆ័យ ហើយចំនួន៦៤៣ករណី បានស្លាប់។
តាមការសិក្សាផ្នែកវិទ្យាសាស្ត្ររបស់អង្គការសុខភាពពិភពលោកបច្ចុប្បន្ននេះ បង្ហាញថា ថ្នាំបង្ការជំងឺមាត់ស្បូនចំនួនមួយដូស គឺមានប្រសិទ្ធភាពខ្ពស់ប្រមាណពី៨០-៩០ភាគរយ ក្នុងការកាត់បន្ថយការឆ្លងនិងការការពារពីជំងឺមហារីកមាត់ស្បូន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ