ក្រសួងសុខាភិបាល៖ ពលរដ្ឋមានរោគសញ្ញាភ្នែកក្រហមត្រូវសម្រាកពីកន្លែងធ្វើការឬសាលារៀន
ក្រសួងសុខាភិបាលកម្ពុជានៅព្រឹកថ្ងៃព្រហស្បតិ៍នេះ ឱ្យដឹងថា ករណីជំងឺឆ្លងភ្នែកក្រហមកំពុងកើតថ្មីគួរឱ្យកត់សម្គាល់ ក្នុងបណ្តាខេត្តមួយចំនួននៅប្រទេសកម្ពុជា។ ប្រឈមនឹងបញ្ហានេះ ក្រសួងសុខាភិបាលអំពាវនាវដល់ពលរដ្ឋដែលមានរោគសញ្ញាភ្នែកក្រហមនេះ ត្រូវសម្រាកពីកន្លែងធ្វើការ ឬ សាលារៀន ដើម្បីទប់ស្កាត់ការឆ្លងបន្តក្នុងសហគមន៍។
ចុះផ្សាយនៅថ្ងៃ៖
ស្តាប់ - ០២:១៧
ក្រសួងសុខាភិបាលកម្ពុជានៅព្រឹកថ្ងៃទី១៩តុលានេះ បានបញ្ជាក់ពីការឆ្លើយតបជាបន្ទាន់ ដើម្បីទប់ស្កាត់ការឆ្លងជំងឺឆ្លងភ្នែកក្រហមបន្តក្នុងសហគមន៍ នៅខណៈដែលរកឃើញថា ជំងឺឆ្លងភ្នែកក្រហមនេះ កំពុងកើតថ្មីគួរឱ្យកត់សម្គាល់ក្នុងបណ្តាខេត្តមួយចំនួននៅប្រទេសកម្ពុជា។
ប្រឈមនឹងបញ្ហានេះ ក្រសួងសុខាភិបាលបានអំពាវនាវឱ្យពលរដ្ឋដែលមានរោគសញ្ញាភ្នែកក្រហម ត្រូវសម្រាកពីកន្លែងធ្វើការ ឬ សាលារៀន ដើម្បីចៀសវាងការឆ្លងទៅមនុស្សផ្សេងទៀត។ អាការៈឬរោគសញ្ញាជំងឺឆ្លងភ្នែកក្រហមនេះ រួមមាន នៅផ្នែកសនៃភ្នែកឡើងពណ៍ផ្កាឈូក ឬ ពណ៍ក្រហម ហើយត្របកភ្នែក ជាពិសេសនៅពេលព្រឹកមានហូរទឹកភ្នែកច្រើនជាងមុន រកាំភ្នែកដោយសារមានអារម្មណ៍ថាមានអ្វីនៅក្នុងភ្នែក ឬ ចង់ញីភ្នែក រមាស់ភ្នែក រលាក និង/ឬក្រហាមភ្នែក មានអាចន៍ភ្នែក អាចជាខ្ទុះ ឬពណ៍បាយទឹក ឈឺគ្រាប់ភ្នែក ។ល។
នៅក្នុងសេចក្តីប្រកាសព័ត៌មាន ក្រសួងសុខាភិបាលបានអះអាងថា ក្រសួងសុខាភិបាលនិងស្ថាប័នពាក់ព័ន្ធបានចុះអង្កេត ឆ្លើយតប តាមដាន ផ្តល់ការព្យាបាល និងអប់រំបង្ការការឆ្លងរាលដាលជំងឺឆ្លងភ្នែកក្រហមនេះ។ ជំងឺឆ្លងភ្នែកក្រហមនេះ បានឆ្លងដំបូងកាលពីថ្ងៃទី១៤ ខែកញ្ញា ឆ្នាំ២០២៣ ចំនួន៨ករណី ចេញពីភូមិប៉ក់តូចនៃខេត្តរតនៈគីរី ដែលជាប់ព្រំប្រទល់នឹងទឹកដីវៀតណាម។ នេះបើតាមនាយកដ្ឋានប្រយុទ្ធនឹងជំងឺឆ្លង(CDC)។
គួរដឹងថា ករណីភាគច្រើននៃជំងឺឆ្លងភ្នែកក្រហមនេះ ងាយឆ្លងជាទីបំផុត ពីមនុស្សម្នាក់ទៅមនុស្សផ្សេងទៀត។ យ៉ាងណាមិញ ករណីភាគច្រើននៃជំងឺឆ្លងភ្នែកក្រហមនេះ គឺស្រាល ដែលជាធម្មតាការឆ្លងនឹងជាសះស្បើយក្នុងរយៈពេលពី៧ទៅ១៤ថ្ងៃ ដោយមិនតម្រូវឲ្យមានការព្យាបាលនិងមិនមានផលវិបាករយៈពេលវែងឡើយ។
ទោះជាយ៉ាងណា ក្នុងករណីខ្លះ ការរលាកភ្នែកដោយវីរុសត្រូវការរយៈពេល២ទៅ៣សប្តាហ៍ឬច្រើនជាងនេះដើម្បីជាសះស្បើយ។ ចំណែក វិធីព្យាបាលរួមមាន ការសំអាតអនាម័យភ្នែកដែលឈឺជាប់ជាប្រចាំ ការប្រើថ្នាំបន្តក់ភ្នែក ឬថ្នាំក្រែមដាក់ភ្នែក ដែលជួយបន្ថយរយៈពេលនៃការឆ្លង កាត់បន្ថយផលវិបាក និងកាត់បន្ថយការរីករាលដាលដល់អ្នកដទៃ។ នេះបើតាមក្រសួងសុខាភិបាលកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ