អ្នកនាំពាក្យសាលាឧទ្ធរណ៍ថាសវនាការសំណុំរឿងលោក កឹម សុខា នឹងចាប់ផ្តើមឆាប់ៗនេះ
លោក ចាន់ ចេន សហមេធាវីមួយរូបការពារសិទ្ធិលោក កឹម សុខា បានលើកឡើងថារឿងក្តីលោក កឹម សុខា ប្រធានអតីតគណបក្សសង្គ្រោះជាតិគឺជារឿងនយោបាយ ហើយការពន្យាពេលសវនាការសាលាឧទ្ធរណ៍នៃសំណុំរឿងនេះ បានធ្វើឲ្យប៉ះពាល់ដល់សិទ្ធិកូនក្តីរបស់លោក។ តែបញ្ហានេះត្រូវបានឆ្លើយតបដោយមន្ត្រីសាលាឧទ្ធរណ៍ថា តុលាការកំពុងធ្វើការ ហើយនឹងអាចចាប់ផ្តើមក្នុងពេលឆាប់ៗខាងមុខ។
ចុះផ្សាយនៅថ្ងៃ៖
ស្តាប់ - ០២:០៧
នៅក្នុងសំណេរខ្លីលើហ្វេសប៊ុករបស់លោក ចាន់ ចេន សហមេធាវីមួយរូប ក្នុងចំណោមមេធាវីទាំង៤រូបការពារសិទ្ធិឲ្យលោក កឹម សុខា បានបញ្ជាក់ថា ការពន្យាពេលគ្មានកំណត់(លើសំណុំរឿងលោក កឹម សុខា) វារំលោភលើសិទ្ធិទទួលបាននូវការជំនុំជម្រះដោយយុត្តិធម៌ និងឆាប់រហ័ស ដែលមានចែងក្នុងច្បាប់ជាតិ និងកតិការសញ្ញាអន្តរជាតិ។
តាមរយៈការរៀបរាប់ថារឿងក្តីលោកកឹម សុខា ជារឿងនយោបាយ ដោយលោកជាប់ឃុំនៅ«ម៣»(ពន្ធនាគារត្រពាំងផ្លុង) ជាង១ឆ្នាំ និងក្នុងផ្ទះ ២៧ឆ្នាំ តាមសាលក្រមដោយអយុត្តិធម៌ ដែលមិនអាចថ្លែងបាន លោកមេធាវីបន្ថែមថាលោក កឹម សុខា ជាប់ឃុំដោយអយុត្តិធម៌ ដោយសារលោកស្មោះត្រង់នឹងជាតិ ស្មោះត្រង់នឹងម្ចាស់ឆ្នោត រក្សាគោលជំហរដើម ឧត្តមគតិដើមមិនប្រែប្រួល។
ក៏ប៉ុន្តែអ្នកនាំពាក្យសាលាឧទ្ធរណ៍ លោក ឃុន លាងម៉េង បានបញ្ជាក់ថាសុំរឿងលោក កឹម សុខា នឹងត្រូវលើកមកជំនុំជម្រះនៅពេលឆាប់ៗនេះ ខណៈដែលក្រុមប្រឹក្សាជំនុំជម្រះកំពុងធ្វើរបាយការណ៍ និងសេចក្តីសន្និដ្ឋាន ដោយសារសំណុំរឿងនេះ មានភាពស្មុគ្រស្មាញ និងមានឯកសារច្រើន។
សូមរំលឹកថា លោក កឹម សុខា ប្រធានអតីតគណបក្សសង្គ្រោះជាតិត្រូវបានសាលាដំបូងរាជធានីភ្នំពេញផ្តន្ទាទោសកាលពីថ្ងៃទី៣ ខែមីនា ឆ្នាំ២០២៣ ដាក់ពន្ធនាគាររយៈពេល២៧ឆ្នាំ ពីបទសន្ទិដ្ឋិភាពជាមួយបរទេស តាមមាត្រា៤៣៩ និងមាត្រា៤៤៣ នៃក្រមព្រហ្មទណ្ឌ។ ក៏ប៉ុន្តែលោក កឹម សុខា ត្រូវបានបញ្ជូនទៅឃុំខ្លួននៅក្នុងផ្ទះ។ តុលាការ ក៏បានបង្គាប់ឱ្យដកសិទ្ធិនយោបាយជាអចិន្រ្តៃយ៍ចំពោះលោក កឹម សុខា ក្នុងការឈរឈ្មោះ ឬចូលរួមបោះឆ្នោត ដែលជាទណ្ឌកម្មបន្ថែមតាមមាត្រា៤៥០ នៃក្រមព្រហ្មទណ្ឌ។
ក៏ប៉ុន្តែចាប់តាំងពីចុងខែមីនា ឆ្នាំ២០២៣មក សំណុំរឿងលោក កឹម សុខា ត្រូវបានអូសបន្លាយជាច្រើនខែរហូតមកដល់បច្ចុប្បន្ននេះ ដោយក្នុងនោះក៏បានឆ្លងកាត់ការបោះឆ្នោតជ្រើសតាំងតំណាងរាស្ត្រនីតិកាលទី៧ដែរ ដែលក្រុមមេធាវីការពារសិទ្ធិលោក កឹម សុខា តែងធ្វើអត្ថាធិប្បាយថាជាការរំលោភលើសិទ្ធិកូនក្តីរបស់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ