លោក ហ៊ុន ម៉ាណែត៖ កម្ពុជានាំមុខគេក្នុងការកាត់បន្ថយការបន្ទោបង់ពាសវាលពាលកាល
រយៈពេល១០ឆ្នាំចុងក្រោយនេះ កំណើននៃការទទួលបានសេវាអនាម័យបានកើនឡើងយ៉ាងឆាប់រហ័ស ដោយជាមធ្យមមានអត្រា៥%ក្នុងមួយឆ្នាំ។ កម្ពុជាត្រូវបានទទួលស្គាល់ជាសកលថា ជាប្រទេសនាំមុខក្នុងការពន្លឿនអត្រាគ្រប់ដណ្តប់អនាម័យ និង ការកាត់បន្ថយការបន្ទោបង់ពាសវាលពាលកាល នៅក្នុងចំណោមប្រទេសកំពុងអភិវឌ្ឍន៍។ នេះគឺជាការគូសបញ្ជាក់នៅក្នុងសារលិខិតអបអរទិវាជាតិអនាម័យជនបទលើកទី១៤ នៅថ្ងៃទី១៣វិច្ឆិកា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៣
បើតាមប្រមុខរដ្ឋាភិបាលកម្ពុជា បច្ចុប្បន្ននេះ អត្រាគ្របដណ្តប់អនាម័យកើនដល់៨៥% ខណៈខេត្តចំនួន៦ បានបញ្ចប់នូវការបន្ទោបង់ពាសវាលពាសកាល គឺខេត្តស្វាយរៀង ព្រៃវែង កណ្តាល និងកំពងស្ពឺ កំពង់ឆ្នាំង និងកែប។ ជាមួយគ្នានេះដែរ គឺមានភូមិចំនួន៧៣៩៧ និងឃុំចំនួន៦៥៤ រួមទាំងស្រុក៥៦ ក៏បានបញ្ចប់ការបន្ទោបង់ពាសវាលពាសកាលនេះដែរ។
ទោះជាមានការវិវត្តន៍យ៉ាងនេះក្តី ក៏ប្រមុខរដ្ឋាភិបាលបានដាក់ចេញផែនការឲ្យក្រសួងជំនាញត្រូវពន្លឿនអត្រាគ្របដណ្តប់អនាម័យ និងទឹកស្អាតជនបទបន្ថែមទៀត ដើម្បីសម្រេចគោលដៅកម្មវិធីនយោបាយឆ្នាំ២០២៣ដល់២០២៨។ គឺជាផែនការដែលកម្ពុជាត្រូវសម្រេចឲ្យបាននូវអត្រាផ្គត់ផ្គង់ទឹកស្អាត៩០%នៅឆ្នាំ២០២៣ និង១០០%នៅឆ្នាំ២០៣០ ឆ្លើយតបនឹងការប្រែប្រួលអាកាសធាតុ។
អង្គការយូនីសេហ្វ បានទទួស្គាល់ថា កម្ពុជា កំពុងសម្រេចបាននូវវឌ្ឍនភាពជាបណ្តើរៗ ប៉ុន្តែវឌ្ឍនភាពទាំងនេះពុំទាន់គ្រប់គ្រាន់ ដើម្បីបំពេញទៅតាមចំណុចដៅផ្នែកអនាម័យ និងទឹកស្អាតឡើយ។ បើតាមអង្គការនេះ កម្ពុជា គឺជាប្រទេសដែលមានអត្រាបន្ទោបង់ពាសវាលពាសកាលខ្ពស់ជាងគេនៅក្នុងតំបន់ ពោលគឺក្នុងចំណោមប្រជាជននៅជនបទនៅមានជីវភាពក្រីក្រជាងគេ ១០នាក់ មាន៨នាក់ទៅហើយ ដែលនៅបន្ទោរបង់ក្នុងប្រភពទឹកចំហ ឬបន្ទោរបង់ដោយមិនប្រើប្រាស់បង្គន់។ ទម្លាប់បែបនេះ បន្តជាបញ្ហាប្រឈមដ៏សែនគ្រោះថ្នាក់មួយ ព្រោះថាលាមករបស់មនុស្សដែលនៅជិតផ្លូវទឹក និងផ្ទះសម្បែង នាំឲ្យមានការសាយភាយជំងឺយ៉ាងឆាប់រហ័ស និងធ្វើឲ្យកុមារ និងគ្រួសាររបស់ពួកគេប្រឈមនឹងហានិភ័យ។
ប្រជាពលរដ្ឋកម្ពុជាម្នាក់ ក្នុងចំណោមបីនាក់ ប្រើប្រាស់ទឹកពីប្រភពដែលពុំត្រូវបានកែលម្អ ។ក្នុងចំណោមសាលាមត្តេយ្យសិក្សាចំនួន១០ មាន ៧សាលា ដែលពុំមានបរិក្ខារអនាម័យ និងទឹកស្អាត ទេ ហើយក្នុងចំណោមមណ្ឌលសុខភាពនៅតំបន់ជនបទចំនួនពីរ មានមួយកន្លែងពុំមានទឹកគ្រប់គ្រាន់សម្រាប់ប្រើប្រាស់ពេញមួយឆ្នាំដែ។ ទាំងនេះគឺជាការគូសបញ្ជាក់របស់អង្គការយូនីសេហ្វ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ