ការប្រារព្ធខួប១៣ឆ្នាំ សោកនាដកម្មលើស្ពានពេជ្រនៅសល់តែចំហាយតាមហ្វេសប៊ុក
នៅថ្ងៃទី២២ ខែវិច្ឆិកា ឆ្នាំ២០២៣នេះ គឺជាខួប១៣ឆ្នាំនៃការស្លាប់យ៉ាងអាណោចអាធមរបស់ពលរដ្ឋខ្មែរជាង៣០០នាក់ នៅលើស្ពានពេជ្រ។ ព្រឹត្តិការណ៍ដ៏មហាសោកសៅនេះ ហាក់ថយឥទ្ធិពលបន្តិចម្តងៗ ដោយនៅថ្ងៃទី២២ ខែវិច្ឆិកា ឆ្នាំនេះ មិនមានពិធីសូត្រមន្ត បង្សុកូល គោរពវិញ្ញាណក្ខន្ធនៅស្តូបជនរងគ្រោះកោះពេជ្រដូចឆ្នាំកន្លងទៅទេ។
ចុះផ្សាយនៅថ្ងៃ៖
ស្តាប់ - ០២:១៣
ពិធីសាសនាផ្សេងៗ ដើម្បីរំលឹកដល់វិញ្ញាណក្ខន្ធជនរងគ្រោះជាង៣០០នាក់ ដែលបានបាត់បង់ជីវិតនៅលើស្ពានពេជ្រកាលពី១៣ឆ្នាំមុន មិនត្រូវបានរៀបចំធ្វើដូចឆ្នាំកន្លងទៅទេ។ ទាំងអាជ្ញាធរ ទាំងក្រុមគ្រួសារជនរងគ្រោះហាក់បង្ហាញភាពស្ងប់ស្ងាត់ ខណៈនៅសល់តែ៥ថ្ងៃទៀតប៉ុណ្ណោះពិធីបុណ្យអុំទូកឆ្នាំ២០២៣នេះនឹងត្រូវចាប់ផ្តើម។
ការរំលឹកភាពសោកសៅនេះ ត្រូវបានជំនួសពីការប្រតិបត្តិផ្ទាល់មកបណ្តែតសារ និងរូបភាពនៅលើបណ្តាញសង្គមជាពិសេសហ្វេប៊ុក។ អមដោយរូបភាពជនរងគ្រោះហាក់នៅស្រស់ៗប្រជ្រៀងគ្នាយ៉ាងណែនដូចគេគ្រីប នៅលើស្ពានដ៏អប្រិយ ដែលមានពន្លឺចម្រុះដូចឆព្វណ្ណរង្សី ពលរដ្ឋខ្មែរមួយចំនួនបានបង្ហោះសាររំលឹកដល់វិញ្ញាណក្ខន្ធអ្នកស្លាប់នៅទីនោះដោយសរសេរថា«ថ្ងៃនេះជាថ្ងៃទី២២ ខែវិច្ឆិកា សូមរំលឹកខួប និងការគោរពដល់វិញ្ញាណក្ខន្ធបងប្អូនខ្មែរ ដែលស្ថិតនៅក្នុងសោកនាដកម្មដ៏សោកសៅស្លាប់នៅលើស្ពានពេជ្រ អស់រយៈពេល ១៣ឆ្នាំកន្លងទៅ»។ គណនីហ្វេសប៊ុកខ្លះទៀត បានបង្ហោះរូបភាព វីដេអូឃ្លីប ដែលបន្សល់ទុកនូវស្បែកជើងជនរងគ្រោះរាយប៉ាយលើស្ពានពេជ្រ និងទិដ្ឋភាពសោកសង្រេងផ្សេងៗទៀត ដោយមិនមានអត្ថាធិប្បាយអ្វីទាំងអស់។
សូមរំលឹកថាកាលពីរាត្រីថ្ងៃទី២២ ខែវិច្ឆិកា ឆ្នាំ២០១០ គឺជាថ្ងៃទី៣ នៃព្រះរាជពិធីបុណ្យអុំទូក ពលរដ្ឋខ្មែរភាគច្រើនជាយុវជនបានប្រជ្រៀតគ្នាឆ្លងកាត់ស្ពានពេជ្រ ធ្វើឲ្យពួកគេជាប់គាំងនៅក្នុងក្រុមមនុស្សដ៏ច្រើនសន្ធឹកសន្ធាប់បណ្តាលឲ្យស្លាប់ជាង៣៥០នាក់ និងរបួសជាង៤០០នាក់។ ព្រឹត្តិការណ៍នេះ មិនមានអ្នកទទួលខុសត្រូវទេរហូតមកទល់ពេលនេះ ខណៈមានការលើកឡើងចម្រុះមតិថាបណ្តាលមកពីឆក់អគ្គិសនី ការថប់ដង្ហើម ការធ្វេសប្រហែលរបស់អាជ្ញាធរ និងអ្នកគ្រប់គ្រងក្រុមហ៊ុនវិនិយោគកោះពេជ្រ។
ក៏ប៉ុន្តែទាំងអស់នេះ គ្រាន់តែជាការលើកឡើង និងមិនមានដំណោះស្រាយ ឬសំណងណាមួយដែលធ្វើឲ្យក្រុមគ្រួសារជនរងគ្រោះអស់ចិត្តនោះទេ។ ទោះយ៉ាងណា អាជ្ញាធរក៏ដូចជាសប្បុរសជននានា ក៏បានផ្តល់ថវិការាប់ម៉ឺនដុល្លារដែរដល់ក្រុមគ្រួសារជនរងគ្រោះនីមួយៗ និងមានការចាត់ចែងដឹកជញ្ជូនសពដល់លំនៅដ្ឋានដើម្បីធ្វើបុណ្យតាមប្រពៃណី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ