រដ្ឋាភិបាលព្យាករកំណើនសេដ្ឋកិច្ច២០២៣ ប្រហាក់ប្រហែលនឹងWB តែខុសគ្នាឆ្នាំ២០២៤
នៅក្នុងសន្និសីទចក្ខុវិស័យប្រទេសកម្ពុជាឆ្នាំ២០២៣ ដែលរៀបចំឡើងដោយវិទ្យាស្ថានបណ្តុះបណ្តាល និង ស្រាវជ្រាវដើម្បីអភិវឌ្ឍន៍កម្ពុជា(CDRI)នាព្រឹកថ្ងៃព្រហស្បតិ៍នេះ លោកនាយករដ្ឋមន្ត្រី ហ៊ុន ម៉ាណែត បានថ្លែងថាកំណើនសេដ្ឋកិច្ចកម្ពុជាឆ្នាំ២០២៣ ត្រូវរំពឹងថានឹងមាន ៥,៦% និង៦,៦% នៅឆ្នាំ២០២៤។ ការព្យាករណ៍កំណើនសេដ្ឋកិច្ចរបស់រដ្ឋាភិបាលដូច្នេះ គឺប្រហាក់ប្រហែលនឹងការព្យាករណ៍របស់ធនាគារពិភពលោកកាលពីថ្ងៃពុធ ក៏ប៉ុន្តែខុសគ្នានៅឆ្នាំ២០២៤។
ចុះផ្សាយនៅថ្ងៃ៖
ស្តាប់ - ០២:៥៦
ប្រមុខរដ្ឋាភិបាលកម្ពុជាបញ្ជាក់ថាកំណើនសេដ្ឋកិច្ចកម្ពុជានៅឆ្នាំ ២០២៣នេះ ត្រូវបានរំពឹងថា ៥,៦% ហើយនឹងមានសន្ទុះកាន់តែលឿននៅឆ្នាំ ២០២៤ខាងមុខរហូតដល់ ៦,៦%។ ក៏ប៉ុន្តែនៅក្នុងការព្យាករណ៍របស់ធនាគារពិភពលោក(World Bank) កាលពីថ្ងៃពុធកន្លងទៅ កំណើនសេដ្ឋកិច្ចកម្ពុជាឆ្នាំ២០២៣ គឺមានកំរិតទាបជាងការរំពឹងទុកបន្តិច គឺ៥,៤% និងឆ្នាំ២០២៤ ៥,៨% ហើយបន្តមានកំណើនដល់ ៦,១% រហូតដល់ឆ្នាំ២០២៥ ឯណោះ។
ក៏ប៉ុន្តែលោកនាយករដ្ឋមន្ត្រី ហ៊ុន ម៉ាណែត ថាទស្សនវិស័យនៃកំណើនសេដ្ឋកិច្ចកម្ពុជា ក៏អាចប្រឈមនឹងហានិភ័យមួយចំនួនក្នុងពេលដែលស្ថានភាពបច្ចុប្បន្នមានភាពមិនប្រាកដប្រជាខ្ពស់នៅឡើយ ដែលប្រទេសកម្ពុជាចាំបាច់ត្រូវប្រកាន់យកស្មារតីនៃការកែទម្រង់ជាប្រចាំ ដោយព្យាយាមកសាងឲ្យបាននូវភាពធន់ និងជំរុញពិពិទ្ធកម្មសេដ្ឋកិច្ច។
ជាមួយគ្នានេះ ធនាគារពិភពលោកក៏បានលើកឡើងដែរថា ទោះជាមានការវិនិយោគច្រើនទៅលើហេដ្ឋារចនាសម្ព័ន្ធសាធារណៈកន្លងមកក្តី ផ្នែកដឹកជញ្ជូន និងប្រព័ន្ធឡូជីស្ទិកដែលសមត្ថភាពនៅមានកម្រិត និងការផ្គត់ផ្គង់ថាមពលដែលពិបាកទុកចិត្តបាន នៅតែបន្តជាបន្ទុកខ្ពស់លើចំណាយថ្លៃដើមរបស់ធុរកិច្ច និងរបស់អ្នកប្រើប្រាស់ទូទៅ។ នៅក្នុងរយៈពេលមធ្យម វិបត្តិខាងក្រៅ ដែលមានក្នុងពេលតែមួយរួមមាន ការរាតត្បាតជំងឺជាសកល សង្គ្រាមឈា្លនពានរបស់រុស្ស៊ីលើអ៊ុយក្រែន និងអត្រាខ្ពស់របស់ការប្រាក់លើទីផ្សារអន្តរជាតិ ត្រូវបានរំពឹងថានឹងនៅតែបន្តធ្វើជាឧបសគ្គដល់កំណើនសេដ្ឋកិច្ច។ នេះបើតាម World Bank។
តាមលោក ហ៊ុន ម៉ាណែត រដ្ឋាភិបាលអាណត្តិទី៧ បានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដោយកំណត់យកអាទិភាពគន្លឹះចំនួន៥ រួមមាន មនុស្ស ផ្លូវ ទឹក ភ្លើង និងបច្ចេកវិជ្ជា។ រយៈពេល៣ខែកន្លងទៅនេះ រដ្ឋាភិបាលបានដាក់ចេញនូវកម្មវិធីចំនួន៥រួចហើយ ក្នុងនោះមានយុទ្ធសាស្ត្រជាតិស្តីពីការអភិវឌ្ឍន៍សេដ្ឋកិច្ចក្រៅប្រព័ន្ធ(២០២៣-២០២៨) ការពង្រឹងវិសាលភាពមូលនិធិសមធម៌សុខាភិបាល ដល់គ្រួសារងាយរងហានិភ័យ ការបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងងាយរងគ្រោះ ការពង្រីករបបសន្តិសុខសង្គមផ្នែកថែទាំសុខភាពដល់បុគ្គលស្វ័យនិយោជន៍ កម្មវិធីហិរញ្ញប្បទានសំដៅដល់ផលិតផលកសិកម្ម និងការដាក់ពង្រាយមន្ត្រីកសិកម្មទៅគ្រប់ឃុំសង្កាត់។ នេះបើតាមលោក ហ៊ុន ម៉ាណែត។
ក្រៅពីនេះ លោកនាយករដ្ឋមន្ត្រីក៏បានបញ្ជាក់ដែរថាគណៈកម្មការជាតិចំនួន៣ត្រូវបានបង្កើតឡើងទាក់ទងទៅនឹងកំណែទម្រង់រដ្ឋបាលសាធារណៈ វិស័យអប់រំ សុខាភិបាល រួមនឹងកិច្ចដំណើរការរបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ។ លោកក៏បានរំលឹកដែរ ពីការកែទម្រង់ស៊ីជម្រៅ ដើម្បីបង្កបរិយាកាសងាយស្រួលជិត២០០ ដល់ការធ្វើធុរកិច្ចនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ