លោក ហ៊ុន សែន ថាការដាក់កែវភ្នែកសិប្បនិម្មិតជប៉ុនជាលទ្ធផលនៃសង្គ្រាម
លោក ហ៊ុន សែន ប្រធានគណបក្សប្រជាជនកម្ពុជា បានធ្វើដំណើរទៅប្រទេសជប៉ុននៅថ្ងៃអង្គារនេះ ដើម្បីឲ្យជប៉ុនផលិតកែវភ្នែកសិប្បនិម្មិតបន្ថែមទៀត ក្រោយលោកប្រើប្រាស់កែវភ្នែកជប៉ុនអស់រយៈពេលជាង៣០ឆ្នាំមកហើយ។ នៅក្នុងសំណេរតាមហ្វេសប៊ុករបស់លោក លោក ហ៊ុន សែន រំលេចថា ការប្រើប្រាស់កែវភ្នែក ដែលជប៉ុនជួយផលិតឲ្យនេះ គឺជាលទ្ធផលនៃប្រទេសមានសង្គ្រាម ដែលពេលនេះលោកត្រូវតែរក្សាឲ្យបាននូវសន្តិភាព។
ចុះផ្សាយនៅថ្ងៃ៖
ស្តាប់ - ០១:៤០
អមដោយរូបភាពនៅក្នុងយន្តហោះទំនើបខ្នាតតូច ដែលរួមដំណើរដោយក្រុមគ្រួសារលោកផងនោះ លោក ហ៊ុន សែន ប្រធានគណបក្សប្រជាជនកម្ពុជាដ៏មានឥទ្ធិពល និងជាអតីតនាយករដ្ឋមន្ត្រី បានសរសេរនៅលើហ្វេសប៊ុករបស់លោកថា លោកកំពុងធ្វើដំណើរទៅទីក្រុងតូក្យូ ប្រទេសជប៉ុន ដើម្បីផលិតកែវភ្នែកសិប្បនិមិ្មត ដែលលោកបានប្រើប្រាស់អស់រយៈពេល ៣៤ឆ្នាំមកហើយ(១៩៩០-២០២៤)។
លោក ហ៊ុន សែន ដែលពិការភ្នែកម្ខាង ខាងឆ្វេង បានសរសើរ និងអរគុណជប៉ុនថារយៈពេល ៣៤ឆ្នាំកន្លងទៅនេះ ការប្រើកែវភ្នែកសិប្បនិម្មិតជប៉ុនមិនដែលធ្វើឲ្យលោកឈឺភ្នែក ឬឈឺក្បាលអ្វីឡើយ ខុសពីកែវភ្នែក ដែលលោកប្រើអំឡុងឆ្នាំ១៩៧៥ ដល់ឆ្នាំ១៩៩០ ដែលតែងតែធ្វើឲ្យលោកឈឺភ្នែក និងឈឺក្បាល។
លោកថា កាលពីឆ្នាំ ២០១៧ រដ្ឋាភិបាលជប៉ុនបានជួយផលិតកែវភ្នែកជាជំនួយចំនួន ៥គ្រាប់ លើកនេះភាគីជប៉ុន នឹងជួយផលិតចំនួន ៥គ្រាប់ទៀត ដែលអាចប្រើបានរយៈពេល១០ឆ្នាំទៀត ពោលគឺមួយឆ្នាំប្រើមួយគ្រាប់។
តាមរយៈការបំពាក់កែវភ្នែកសិប្បនិម្មិតរបស់ជប៉ុនប្រកបដោយសុវត្ថិភាពដូច្នេះ លោក ហ៊ុន សែន ក៏បានភ្ជាប់សារនយោបាយមួយឃ្លាថា វាជាលទ្ធផលនៃប្រទេស ដែលមានសង្គ្រាម ដូចនេះបានជាលោកដឹកនាំស្វែងរកសន្តិភាព និងរក្សាសន្តិភាព។
សូមរំលឹកថា លោក ហ៊ុន សែន បានជួបគ្រោះថ្នាក់ពិការភ្នែកខាងឆ្វេងនៅថ្ងៃទី១៦ ខែមេសា ឆ្នាំ១៩៧៥ អំឡុងពេលដែលលោកធ្វើជាកងទ័ព និងមានការប្រយុទ្ធគ្នានៅក្នុងសមរភូមិ។ នេះបើតាមការលើកឡើងរបស់លោកជាបន្តបន្ទាប់កន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ