ក្រសួងចំនួន២ ព្រមានពីគ្រោះថ្នាក់នៃការផ្សព្វផ្សាយ និងសេពគ្រឿងស្រវឹង
ក្រសួងព័ត៌មានបានចេញបម្រាម ហាមផ្សាយពាណិជ្ជកម្មគ្រឿងស្រវឹងដោយផ្តល់រង្វាន់ និងប្រើប្រាស់ស្ត្រី និងអនីតិជនអាយុក្រោម១៨ឆ្នាំ ឲ្យផ្សាយគ្រឿងស្រវឹង ខណៈក្រសួងសុខាភិបាលបានចេញការព្រមានពីគ្រោះថ្នាក់ដល់សុខភាពដោយសារតែការពិសារគ្រឿងស្រវឹង។ ការចេញបម្រាមនេះធ្វើឡើង បន្ទាប់ពីមានប្រតិកម្មរិះគន់ថ្មីៗនេះ លើការផ្សាយពាណិជ្ជកម្មគ្រឿងស្រវឹងតាមកញ្ចក់ទូរទស្សន៍ ដោយប្រើឲ្យយុវជនក្មេងៗសេពគ្រឿងស្រវឹងដើម្បីយករង្វាន់។
ចុះផ្សាយនៅថ្ងៃ៖
ស្តាប់ - ០២:៣៩
នៅក្នុងលិខិតចេញថ្ងៃ៨មករា២០២៤ រដ្ឋមន្ត្រីក្រសួងព័ត៌មានលោក នេត្រ ភក្ត្រា បានគូសបញ្ជាក់ថា ការផ្សាយពាណិជ្ជកម្មគ្រឿងស្រវឹងដោយផ្តល់រង្វាន់ គឺជាសកម្មភាពអូសទាញពលរដ្ឋឲ្យសេពគ្រឿងស្រវឹង ពិសេសយុវជន។ ចំណែកការប្រើប្រាស់ស្ត្រី និងអនីតិជនអាយុក្រោម១៨ឆ្នាំ ឲ្យផ្សាយគ្រឿងស្រវឹង ត្រូវបានក្រសួងព័ត៌មាន ចាត់ទុកថា គឺប៉ះពាល់ដល់សិទ្ធិ និងសេចក្តីថ្លៃថ្នូរបស់ស្ត្រី។
ការចេញបម្រាបរបស់ក្រសួងព័ត៌មាន ដោយសារតែសង្កេតឃើញថា ការផ្សាយពាណិជ្ជកម្មគ្រឿងស្រវឹងបានកើតឡើងយ៉ាងគគ្រឹកគគ្រេង និងផ្តល់រង្វាន់សន្ធឹកសន្ធាប់ ដែលនេះជាការអូសទាញឲ្យយុវជនសេពគ្រឿងស្រវឹង។ ករណីនេះ ក្រសួងចាត់ទុកថា ជាការពង្វក់យុវជនឲ្យធ្លាក់ក្នុងគ្រោះថ្នាក់នៃគ្រឿងស្រវឹង និងខូចអានាគតទំពាំងស្នងឬស្សីថែមទៀតផង។
បន្ថែមពីការចេញបម្រាមរបស់ក្រសួងព័ត៌មាន ក្រសួងសុខាភិបាលនៅថ្ងៃទី៩មករា២០២៤ ក៏បានចេញការព្រមានពីផលប៉ះពាល់នៃការសេពគ្រឿងស្រវឹងនេះដែរ។
បើតាមក្រសួងសុខាភិបាល ការសេពគ្រឿងស្រវឹងនឹងបង្កឲ្យកើតជំងឺ ក្រិនថ្លើម ជំងឺមហារីក មាត់ បំពង់ករ ពោះវៀនធំ ធ្វើឲ្យប្រព័ន្ធរាងកាយចុះខ្សោយ ក្លាយជាមនុស្សញៀនគ្រឿងស្រវឹង អសមត្ថភាពផ្លូវភេទ ជំងឺបេះដូង ជំងឺសរសៃឈាមខួរក្បាល និងបញ្ហាសុខភាពផ្លូវចិត្ត។
ក្រសួងសុខាភិបាល បានអំពាវនាវឲ្យស្ថាប័នពាក់ព័ន្ធចូលរួមទប់ការប្រើប្រាស់គ្រឿងស្រវឹង និងជំរុញឲ្យផ្លាស់ប្តូរឥរិយាថបបុគ្គលសេពគ្រឿងស្រវឹងទាំងនៅតាមគ្រួសារ សហគមន៍ និងសាលារៀន ខណៈការសេពគ្រឿងស្រវឹងក៏អាចបង្កគ្រោះថ្នាក់ចរាចរណ៍ផងដែរនៅពេលបើកបរ។
យោងតាមរបាយការណ៍របស់ Wisevoter កម្ពុជាឈរនៅលេខរៀងទី៣ ដែលមានប្រជាជនផឹកស្រាច្រើនជាងគេនៅក្នុងតំបន់អាស៊ាន និងឈរនៅលេខរៀងទី៣៦ នៅលើពិភពលោក ពោលគឺប្រជាជនកម្ពុជាម្នាក់អាចផឹកស្រាបាន ២១.៧លីត្រ។
ក្រុមអ្នកធ្វើតស៊ូមតិធ្លាប់លើកឡើងថា រដ្ឋាភិបាលគួរតែមានច្បាប់គ្រប់គ្រងគ្រឿងស្រវឹងនៅកម្ពុជាទើបល្អ ជាពិសេសកំណត់អាយុផឹកស្រា ពីព្រោះការផឹកស្រាក៏ជាចំណែកមួយធ្វើឲ្យមានអំពើហិង្សា និងគ្រោះថ្នាក់ចរាចរណ៍ដែលនាំឲ្យខាតទាំងសេដ្ឋកិច្ចជាតិ និងសេដ្ឋកិច្ចគ្រួសារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ