លោក ហ៊ុន សែន៖ ខ្ញុំបន្តរស់រហូតកំចាត់ពួកជ្រុលនិយមអស់ទើបលាចាកលោក
អតីតនាយករដ្ឋមន្ត្រី លោក ហ៊ុន សែន បានសរសេរនៅលើហ្វេសប៊ុកផ្លូវការរបស់លោកនៅថ្ងៃព្រហស្បតិ៍ទី១១ ខែមករាម្សិលមិញថា លោកនៅមានសុខភាព អាចរស់បានរហូតកំចាត់ក្រុមជ្រុលនិយមអស់។ ការបញ្ជាក់របស់លោក ហ៊ុន សែន គឺបន្ទាប់ពីមានការលើកឡើងរបស់សកម្មជនប្រឆាំងមួយចំនួនថាសុខភាពរបស់លោកមិនល្អ ហើយមិនដឹងថាអាចវិលត្រលប់ពីប្រទេសជប៉ុនមកកម្ពុជាវិញបាន ឬអត់នោះទេ។
ចុះផ្សាយនៅថ្ងៃ៖
ស្តាប់ - ០១:៣៣
នៅក្នុងដំណើរវិលត្រលប់ពីប្រទេសជប៉ុនមកកម្ពុជាវិញ អតីតនាយករដ្ឋមន្ត្រីកម្ពុជាលោក ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ បានឆ្លៀតឆ្លើយតបទៅនឹងសកម្មជនប្រឆាំងថាសុខភាពរបស់លោកអាចបន្តរស់រហូតកំចាត់ចោលពួកជ្រុលនិយមអស់ពីកម្ពុជាទើបលាចាកលោកទៅ។ ផ្ទុយទៅវិញលោក ហ៊ុន សែន បានផ្តល់យោបល់ដល់អ្នករិះគន់ពីសុខភាពលោក ឲ្យការពារសុខភាពពួកគេប្រសើរជាងគិតពីសុខភាពរបស់លោក។
ការឆ្លើយតបបែបឌឺដងរបស់លោក ហ៊ុន សែន តាមរយៈសំណេរលើហ្វេសប៊ុក គឺបន្ទាប់ពីសកម្មជនប្រឆាំង ដែលលោក ហ៊ុន សែន ថាជាក្រុមប្រឆាំងជ្រុលនិយម បានបំផុសដំណឹងថាសុខភាពរបស់លោកមិនល្អ ដោយមកលាងឈាមនៅជប៉ុន មិនដឹងថាត្រឡប់ទៅប្រទេសវិញបាន ឬអត់ទេ។
ទោះយ៉ាងណាអតីតនាយករដ្ឋមន្ត្រីរូបនេះបញ្ជាក់តាមសំណេរថា ក្រោយម៉ោង ២ល្ងាច ថ្ងៃទី១២ មករា ឆ្នាំ២០២៤ លោកនឹងមានវត្តមាននៅកម្ពុជាវិញ ហើយប្រាប់ពួកជ្រុលនិយមកុំឲ្យបារម្ភពីលោក គិតពីខ្លួនឯងល្អជាង។
សូមរំលឹកថាកាលពីថ្ងៃអង្គារដើមសប្តាហ៍នេះ លោក ហ៊ុន សែន អមដោយសមាជិកគ្រួសារមួយចំនួនបានធ្វើដំណើរទៅកាន់ប្រទេសជប៉ុន ដើម្បីផលិតកែវភ្នែកសិប្បនិម្មិតចំនួន៥គ្រាប់បន្ថែម សម្រាប់ប្រើប្រាស់រយៈពេល១០ឆ្នាំទៅមុខ នៅលើភ្នែកខាងឆ្វេងរបស់លោក ដែលពិការដោយសារសង្គ្រាម។ លោក ហ៊ុន សែន ថាអស់រយៈពេល៣៤ឆ្នាំ លោកប្រើប្រាស់កែវភ្នែកសិប្បនិម្មិត ដែលផលិតនៅជប៉ុន មិនធ្វើឲ្យលោកឈឺភ្នែក ឬឈឺក្បាលអ្វីឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ