អ្វីទៅជានយោបាយរបស់សហរដ្ឋអាមេរិកក្នុងអាណត្តិលោកចូ បៃដិនចំពោះតំបន់មជ្ឈិមបូព៌ា?
ចុះផ្សាយនៅថ្ងៃ៖
ស្តាប់ - ០៤:១៣
លោកចូ បៃដិនមកពីគណបក្សប្រជាធិបតេយ្យបានជាប់ឆ្នោតប្រធានាធិបតីសហរដ្ឋអាមេរិកនាការបោះឆ្នោតកាលពីថ្ងៃទី៣ វិច្ឆិកា។ តែគេត្រូវរង់ចាំដល់ថ្ងៃទី២០ មករា ឆ្នាំ ២០២១ ទើបមានការផ្ទេរអំណាចរវាងលោកដូណាល់ ត្រាំ និងលោកចូរ បៃដិន។ សេតវិមានធ្លាក់ទៅក្នុងកណ្តាប់ដៃគណបក្សប្រជាធិបតេយ្យជាថ្មីបានបង្កឲ្យមានអ្នកសប្បាយចិត្ត និងអ្នកខកចិត្ត។ តែគេបានសង្កេតឃើញជារួមថា អ្នកសប្បាយចិត្តហាក់មានច្រើនជាងអ្នកខកចិត្ត ទោះនៅសហរដ្ឋអាមេរិកក៏ដូចជានៅលើពិភពលោក។ នៅតំបន់មជ្ឈិមបូព៌ានិយាយដោយឡែក តើអ្វីទៅជានយោបាយការបរទេសរបស់លោកចូ បៃដិន?។
វាហាក់ដូចជារហ័សពេកដែលគេហ៊ានអះអាងមុនពីជំហរនយោបាយរបស់លោកចូ បៃដិនចំពោះតំបន់មជ្ឈិមបូព៌ា។ តែក្នុងនាមជាអតីតអនុប្រធានាធិបតីរបស់លោកបារ៉ាក់ អូបាម៉ាចំនួន ៨ឆ្នាំពីឆ្នាំ ២០០៨ដល់ឆ្នាំ ២០១៦ លោកបៃដិនបានដឹង និងស្គាល់ច្បាស់រឿងរ៉ាវនៅតំបន់មជ្ឈិមបូព៌ាដូចបាតដៃ។ នេះមិនមែនមានន័យថា លោកបៃដិននឹងយកនយោបាយរបស់លោកអូបាម៉ាទៅអនុវត្តជាថ្មីទេ។ អ្វីដែលគេបានកត់សម្គាល់ឃើញ នយោបាយអាមេរិកចំពោះពិភពលោក និយាយជារួម និងចំពោះតំបន់មជ្ឈិមបូព៌ា និយាយដោយឡែកនារយៈពេល ៤ឆ្នាំក្នុងអាណត្តិរបស់លោកដូណាល់ ត្រាំមានការក្រឡាប់ចាក់ខ្លាំង។
មានសមិទ្ធិផលមួយចំនួនដែលលោកអូបាម៉ាសម្រេចបានក្នុងអំណាចរយៈពេល ៨ឆ្នាំត្រូវបានលោកត្រាំកម្ទេចចោលក្នុងអំណាចរយៈពេល ៤ឆ្នាំ។ ឧទាហរណ៍ជាក់ស្តែងមិនអាចប្រកែកបាន លោកត្រាំបានដកសហរដ្ឋអាមេរិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់ចុះហត្ថលេខាឆ្នាំ ២០១៥ និងកិច្ចព្រមព្រៀងក្រុងប៉ារីសឆ្នាំ ២០១៥ ស្តីពីអាកាសធាតុ។ នយោបាយរបស់លោកត្រាំបានរំកិលកៀកកាន់តែជិតអ៊ីស្រាអែល និងប្រទេសអារ៉ាប៊ីសាអូឌីតដែលជាសម្ព័ន្ធមិត្តចាក់ទឹកមិនលេច រួចងាកទៅសង្កត់ ក ប្រទេសអ៊ីរ៉ង់រឹតតែខ្លាំង។ បន្ទាប់មក លោកត្រាំបានបញ្ជាឲ្យសម្លាប់មេទ័ពអ៊ីរ៉ង់លោកកាសឹម សូឡីម៉ានីរហូតដល់ទឹកដីអ៊ីរ៉ាក់។
លោកត្រាំបានសម្រេចលើកស្ថានទូតអាមេរិកនៅអ៊ីស្រាអែលពីទីក្រុងតេឡាវីទៅដាក់នៅទីក្រុងហ្សេរ៉ុយសាឡិមដែលអ៊ីស្រាអែលកំពុងបន្តមានជម្លោះជាមួយប៉ាឡេស្ទីន និងកាត់បន្ថយវត្តមានទាហានអាមេរិកនៅក្នុងតំបន់។ ចំណែកលោក Jared Kushner ដែលជាកូនប្រសាររបស់លោកត្រាំ និងជាអ្នកទទួលបន្ទុកស្វែងរកសន្តិភាពឲ្យតំបន់ ពិសេសសម្រាប់ជម្លោះអ៊ីស្រាអែល និងប៉ាឡេស្ទីនបានពង្រឹងទំនាក់ទំនងមិត្តភាពជាមួយនាយករដ្ឋមន្រ្តីអ៊ីស្រាអែលលោកនេតាន់យ៉ាហ៊ូ និងរាជទាយាទអារ៉ាប៊ីសាអូឌីតម៉ូហាម៉េដ បិន សាលម៉ាន។
អារ៉ាប៊ីសាអូឌីតជាប្រទេសដែលលោកដូណាល់ ត្រាំបានទៅបំពេញទស្សនកិច្ចមុនគេក្នុងឆ្នាំ ២០១៧ ក្នុងនាមជាប្រធានាធិបតី។ លោកត្រាំជាអ្នកជំទាស់នឹងសេចក្តីសម្រេចរបស់សភាប្រឆាំងនឹងអារ៉ាប៊ីសាអូឌីតដែលបានដឹកនាំកម្លាំងសម្ព័ន្ធអារ៉ាប់វាយប្រហារលើប្រទេសយេម៉ែន។ គឺរដ្ឋបាលរបស់លោកត្រាំដែលបានចេញមុខការពារអារ៉ាប៊ីសាអូឌីតផ្កាប់មុខនៅក្នុងរឿងរ៉ាវសម្លាប់អ្នកកាសែតអារ៉ាប៊ីសាអូឌីតលោកហ្សាម៉ាល់ ខាស្ហូហ្ស៊ីនៅក្នុងស្ថានកុងស៊ុលអារ៉ាប៊ីសាអូឌីតក្នុងប្រទេសតួកគីកាលពីខែតុលា ឆ្នាំ ២០១៨។ ព្រឹត្តិការណ៍កាលណោះត្រូវបានគេសង្ស័យជាការរៀបចំដោយរាជទាយាទបិន សាលម៉ាន។ ដូច្នេះជារឿងមួយធម្មតាដែលថ្នាក់ដឹកនាំអារ៉ាប៊ីសាអូឌីតគ្រប់ជាន់ថ្នាក់ចង់ឃើញលោកត្រាំបន្តអង្គុយកៅអីប្រធានាធិបតីអាមេរិកចំនួន ៤ឆ្នាំបន្ថែមទៀត។
ខណៈដែលបណ្តាប្រទេសអារ៉ាប់សឹងតែទាំងអស់បានសាទរការជាប់ឆ្នោតរបស់លោកចូ បៃដិនតាំងពីយប់ថ្ងៃសៅរ៍ ទី៧ វិច្ឆិកា រដ្ឋអំណាចអារ៉ាប៊ីសាអូឌីតកំពុងបន្តបិទមាត់មិននិយាយអ្វីទាំងអស់។ ក្រៅពីពិនិត្យមើលឡើងវិញនូវទំនាក់ទំនងជាមួយអ៊ីស្រាអែល ឬអារ៉ាប៊ីសាអូឌីត លោកបៃដិនក៏ត្រូវផ្តោតលើរឿងផ្សេងទៀតក្នុងតំបន់ ដូចយ៉ាងវិបត្តិក្នុងប្រទេសលីប៊ី ឬមួយជម្លោះរវាងអ៊ីស្រាអែល និងប៉ាឡេស្ទីន។ តាមក្រុមអ្នកវិភាគ វិធានការមួយក្នុងចំណោមវិធានការដែលលោកបៃដិនត្រូវធ្វើមុនគេ គឺភ្ជាប់ទំនាក់ទំនងជាមួយរដ្ឋអំណាចប៉ាឡេស្ទីនឡើងវិញ ផ្តល់ជំនួយជាថ្មីឲ្យប៉ាឡេស្ទីន និងវិលទៅដោះស្រាយជម្លោះអ៊ីស្រាអែល ប៉ាឡេស្ទីនដោយបន្តប្រកាន់ជំហរឲ្យមានរដ្ឋពីររស់ក្បែរគ្នា។ ដោយឡែក ការដែលសហរដ្ឋអាមេរិកបានអូសទាញប្រទេសអារ៉ាប់ចំនួន ៣ គឺអេមីរ៉ាតអារ៉ាប់រួម បារ៉ែន និងស៊ូដង់ឲ្យភ្ជាប់ទំនាក់ទំនងប្រក្រតីជាមួយអ៊ីស្រាអែល និងដែលបានធ្វើឲ្យប៉ាឡេស្ទីនខឹងសម្បារនោះត្រូវបានក្រុមអ្នកវិភាគយល់ថា លោកបៃដិនប្រហែលមិនប្រឆាំងទេ។
សរុបមកវិញ និងអ្វីដែលច្បាស់ លោកបៃដិននឹងមិនដើរតាមផ្លូវដែលត្រួសត្រាយដោយលោកត្រាំទាំងស្រុងទេ។ អ្វីដែលច្បាស់ លោកបៃដិននឹងត្រូវពិនិត្យមើលឡើងវិញដោយមានការថ្លឹងថ្លែងត្រឹមត្រូវលើសំណុំរឿងខ្លះដែលលោកត្រាំបានសម្រេចសម្រាប់តំបន់ដើមបូព៌ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ