ស៊ូដង់ និងអ៊ីស្រាអែលយល់ព្រមចងសម្ព័ន្ធភាពគ្នាឡើងវិញ ក្រោមការជ្រោមជ្រែងរបស់អាមេរិក
បន្ទាប់ពីអេមីរ៉ាត អារ៉ាប់រួម និងបារ៉ែន ដល់វេនប្រទេសស៊ូដង់ដែលបានយល់ព្រមបង្កើតទំនាក់ទំនងប្រក្រតីឡើងវិញ ជាមួយអ៊ីស្រាអែល។ ទៅតាមការប្រកាសរដ្ឋបាលលោកដូណាល់ត្រាំ កាលពីថ្ងៃសុក្រម្សិលមិញ ស៊ូដង់ ជាប្រទេសអារ៉ាប់មួយទៀតដែល បានយល់ព្រមថា នឹងចុះកិច្ចព្រមព្រៀងសន្តិភាពជាមួយរដ្ឋជ្វីហ្វ អ៊ីស្រាអែល។ នៅពេលប្រមុខដឹកនាំអ៊ីស្រាអែល និងស៊ូដង់ ថ្លែងស្វាគម ជោគជ័យ នយោបាយសម្របសម្រួលរបស់ប្រធានាធិបតី អាមេរិក អ៊ីរ៉ង់ និងក្រុមហាម៉ាសដែលជាសត្រូវរបស់អ៊ីស្រាអែលបានបរិហារ រិះគន់ នយោបាយពុករលួយ របស់រដ្ឋបាលអាមេរិក ដែលមើលរំលងទុក្ខវេទនារបស់ប្រជាជនប៉ាឡេស្ទីន។
ចុះផ្សាយនៅថ្ងៃ៖
ស្តាប់ - ០២:២៧
នៅសេតវិមាន អមដោយមន្រ្តីជាន់ខ្ពស់អាមេរិក ដូចជារដ្ឋមន្រ្តីការបរទេស និងកូនប្រសារប្រុសដែលទទួលបន្ទុក ការចរចា សន្តិភាពនៅដើមបូព៌ា លោកប្រធានាធិបតី អាមេរិក ដូណាល់ ត្រាំ បានប្រកាសជាឱឡារិកពី កិច្ចព្រមព្រៀងសន្តិភាព រវាងប្រទេសគូសត្រូវពីរ ស៊ូដង់ និងអ៊ីស្រាអែល នៅក្រោមគំនិតផ្តួចផ្តើម និងការជួយជ្រោមជ្រែងរបស់អាមេរិក។ នៅថ្ងៃសុក្រ ស៊ូដង់ និងអ៊ីស្រាអែលបានយល់ព្រម ចាប់ផ្តើម កសាងទំនាក់ទំនង ធម្មតានឹងគ្នាឡើងវិញ បន្ទាប់ពី តាំងខ្លួនជាសត្រូវនឹងគ្នា តាំងសង្រ្គាម អ៊ីស្រាអែលអារ៉ាប់ នៅឆ្នាំ ១៩៦៧។
សម្រាប់ប្រធានាធិបតីអាមេរិក នៅក្នុងរយៈពេលតែប៉ុន្មានសប្តាហ៍ ស៊ូដង់បានក្លាយជាប្រទេសអារ៉ាប់ទី៣ ដែលបានយល់ព្រមផ្សារភ្ជាប់ទំនាក់ទំនងធម្មតាឡើងវិញ ជាមួយ អ៊ីស្រាអែល នៅបន្ទាប់ពី ប្រទេសអេមីរ៉ាត អារ៉ាប់រួម និងបារ៉ែន។
តាមប្រមុខរដ្ឋអាមេរិក នៅមានប្រទេសអារ៉ាប់ ចំនួន ៥ទៀត ដែលចង់ចុះកិច្ចព្រមព្រៀងសន្តិភាពជាមួយរដ្ឋជ្វីហ្វ អ៊ីស្រាអែល។ លោកសង្ឃឹមថា អារ៉ាប៊ី សាអូឌីត ដែលជាប្រទេសអារ៉ាប់ធំ ជាងគេ នៅក្នុងតំបន់ នឹងអាចធ្វើតាម បារ៉ែន អេមីរ៉ា អារ៉ាប់រួម និងស៊ូដង់។
នៅក្នុងកិច្ចសន្ទនាត្រីភាគី តាមខ្សែទូរស័ព្ទ កាលពីថ្ងៃ សុក្រ ម្សិលមិញ លោកនាយករដ្ឋមន្រ្តីអ៊ីស្រាអែល បិនចាមីន នេតាន់យ៉ាហ៊ូ បាននិយាយកោតសរសើរថា នៅក្នុងការដឹកនាំរបស់លោកដូណាល់ ត្រាំ គេបានពង្រីកដែនសន្តិភាព នៅតំបន់ដើមបូព៌ា។ នាយករដ្ឋមន្រ្តីស៊ូដង់វិញ បានថ្លែងអំណរគុណ ប្រធានាធិបតី អាមេរិក ដែលបានសម្រេចដកស៊ូដង់ចេញពី បញ្ជីស្បែកខ្មៅ របស់អាមេរិក ក្នុងនាមជាប្រទេសគាំទ្រក្រុមក្រុមភេរវនិយម។
រដ្ឋបាលលោកដូណាល់ ត្រាំ ធ្លាប់បានជូនដំណឹង ទៅសភាអាមេរិកឲ្យលុបចោលទាំងស្រុង ការចោទប្រកាន់ស៊ូដង់ ថា ជាប្រទេសគាំទ្រ ក្រុមភេរវនិយម។ សេតវិមានបានលើកសំណើនេះ នៅក្រោយ ស៊ូដង់ ដែលទើបផ្លាស់ប្តូររបបគ្រប់គ្រងផ្តាច់ការ បានយល់ព្រម បង់ប្រាក់ ប្រមាណ ៣៣៥លានដុល្លារ សម្រាប់គ្រួសារជនរងគ្រោះអាមេរិក ដែលបានស្លាប់នៅក្នុងការវាយប្រហារភេរវកម្ម ប្រឆាំងស្ថានទូតអាមេរិកនៅកេនយ៉ា និងតង់ហ្សានី កាលពីឆ្នាំ ១៩៩៨។ ស៊ូដង់ដែលត្រូវសហគមន៍អន្តរជាតិចោទប្រកាន់ថា បានផ្តល់ជំរកដល់មេដឹកនាំភេរវកម្មអាល់កៃដា ក្នុងអំឡុង ឆ្នាំ ១៩៩០ ត្រូវបានតុលាការអាមេរិកផ្តន្ទាទោសឲ្យសងជំងឺចិត្តដល់ប្រជាជនអាមេរិកដែលបានរងគ្រោះ ដោយសារការវាយប្រហារភេរវកម្ម។
ប្រតិកម្មទៅនឹងការប្រកាសរបស់ប្រធានាធិបតីអាមេរិក ក្រសួងការបរទេសរបស់អ៊ីរ៉ង់ បាន ចាត់ទុក ការផ្ចុងផ្តើម របស់អាមេរិកថា ជារឿងបោកបន្លំ ព្រោះថា បើគេសុខចិត្តបង់លុយ គ្រប់គ្រាន់ ហើយ បិទភ្នែក មើលមិនឃើញឧក្រិដ្ឋកម្មប្រព្រឹត្តទៅលើប្រជាជនប៉ាឡេស្ទីន នោះគេ ប្រាកដជារួចចាកផុតពីបញ្ជីខ្មៅភេរវនិយមរបស់អាមេរិក។ ប្រធានរដ្ឋអំណាចប៉ាឡេស្ទីនវិញ បានថ្កោលទោស មិនទទួលស្គាល់កិច្ចព្រមព្រៀង អ៊ីស្រាអែល ជាមួយប្រទេសអារ៉ាប់ ចំណែក ចលនាហាម៉ាស ប៉ាឡេស្ទីន បរិហារិះគន់ នយោបាយដើរស្ទូចទាក់របស់អាមេរិក ដែលកំពុងបំផ្លាញប្រជាជាតិប៉ាឡេស្ទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ