លោកត្រាំថា អាមេរិកនឹងសងសឹកវិញលើស១០០០ដង បើអ៊ីរ៉ង់ហ៊ានសម្លាប់មន្ត្រីទូតអាមេរិក
កាលពីថ្ងៃចន្ទ ទី១៤កញ្ញា គេហទំព័រព័ត៌មានមួយ បានចុះផ្សាយ ដោយស្រង់ប្រភព ពីមន្ត្រីអាេមរិក ថាអ៊ីរ៉ង់កំពុងរៀបគំរោង សម្លាប់លោកស្រីអគ្គរដ្ឋទូតសហរដ្ឋអាមេរិក ប្រចាំនៅប្រទេសអាហ្វ្រិកខាងត្បូង ដើម្បីជាការសងសឹក ចំពោះការដែលអាមេរិក បានសម្លាប់មេបញ្ជាការកងទ័ពអ៊ីរ៉ង់ ឈ្មោះ កាសេម សូឡីម៉ានី។ នៅតាមទំព័រ Twitter លោកដូណាល់ ត្រាំ បានគំរាមតបទៅវិញថា បើអ៊ីរ៉ង់ហ៊ានធ្វើមែន អាមេរិកនឹងសងសិកវិញ ឲ្យធ្ងន់លើស១០០០ដង។
ចុះផ្សាយនៅថ្ងៃ៖
ស្តាប់ - ០២:០៧
យោងតាមគេហទំព័រព័ត៌មាន Politico ដែលបានផ្អែកលើប្រភពច្បាស់ការ ពីមន្ត្រីជាន់ខ្ពស់អាមេរិក២នាក់ បានឲ្យដឹងថា ភ្នាក់ងារចារកិច្ចអាមេរិក បានដឹងនិងកំពុងតាមដាន អំពីផែនការ របស់រដ្ឋាភិបាលអ៊ីរ៉ង់ ក្នុងការសម្លាប់ លោកស្រី Lana Marks ឯកអគ្គរដ្ឋទូតសហរដ្ឋអាមេរិក ប្រចាំប្រទេសអាហ្វ្រិកខាងត្បូង ដែលជាមនុស្សស្និទ នឹងលោកប្រធានាធិបតីដូណាល់ ត្រាំ។
គេហទំព័រនេះ បន្ថែមថា ភ្នាក់ងារចារកិច្ចអាមេរិក បានតាមដានផែនការនេះ ប្រមាណ៤ខែមកហើយ ហើយបើតាមការសន្និដ្ឋាន គឺប្រហែលជាអ៊ីរ៉ង់ចង់សងសឹក ចំពោះការដែលអាមេរិក បានទំលាក់គ្រាប់មីស៊ីល សម្លាប់លោកមេបញ្ជាការអ៊ីរ៉ង់ កាសេម សូឡីម៉ានី កាលពីថ្ងៃទី៣ខែមករា ឆ្នាំ២០២០ នៅក្រុងបាកដាដ។
ក្រោយការចេញផ្សាយដំណឹងនេះ លោកដូណាល់ ត្រាំ បានបញ្ចេញកំហឹងតាមទំព័រ Twitter នៅយប់ថ្ងៃចន្ទទី១៤កញ្ញា ដោយលោកបានសរសេរថា បើសិនជាអ៊ីរ៉ង់ ហ៊ានតែធ្វើអំពើណាមួយ មកលើសហរដ្ឋ អាមេរិក នោះអាមេរិក នឹងសងសឹកវិញ ខ្លាំងលើស១០០០ដង។
នៅតាមកញ្ចក់ទូរទស្សន៍ Fox News លោក ម៉ៃ ប៉ុមប៉េអូ ប្រមុខការទូតអាមេរិក បានលើកឡើងថា ដំណឹងនេះ គឺរដ្ឋាភិបាលអាមេរិក កំពុងតាមដានដោយចិត្តទុកដាក់ មិនអាចលេងសើចបានទេ។ លោកបន្ថែមថា គ្រប់គ្នាដឹងច្បាស់ណាស់ ថាអ៊ីរ៉ង់ គឺជាប្រទេសដែលតែងតែនៅពីក្រោយក្រុមភេរវកម្មជាច្រើន ហើយធ្លាប់បានធ្វើឃាតមនុស្ស ច្រើនដងមកហើយ មិនថានៅអឺរ៉ុប ឬនៅកន្លែងណាទេ។
ដោយឡែក ក្រសួងការបរទេសអ៊ីរ៉ង់ បានឆ្លើយតបនៅព្រឹកថ្ងៃទី១៥កញ្ញាថា ដំណឹងនេះ គឺជាដំណឹងប្រឌិត ដោយគ្មានមូលដ្ឋានទាល់តែសោះ។ អ្នកនាំពាក្យក្រសួងការបរទសអ៊ីរ៉ង់ បានលើកឡើងថា វាគឺជាយុទ្ធសាស្ត្រ ដ៏ថោកទាប និងគួរឲ្យខ្ពើមរអើម របស់សហរដ្ឋអាមេរិក ដែលមានកម្មវត្ថុតែមួយគត់ គឺបង្កើតឲ្យមានបរិយាកាសខ្មៅអួរអ័ព្វ បង្កាច់បង្ខូចកិត្តិយសរបស់អ៊ីរ៉ង់។ អ្នកនាំពាក្យអ៊ីរ៉ង់ដដែលបន្តថា ជាច្រើនឆ្នាំមកនេះ អ៊ីរ៉ង់បានប្រឹងប្រែងគោរពបទដ្ឋាន ច្បាប់អន្តរជាតិ តែផ្ទុយទៅវិញ គឺលោកដូណាល់ ត្រាំ ប្រធានាធិបតីអាមេរិកទេ ដែលមិនគោរពបទដ្ឋានអន្តរជាតិ តាមរយៈការដើរចេញពីកិច្ចព្រមព្រៀង និងសន្ធិសញ្ញាអន្តរជាតិជាច្រើន ក្នុងនោះ មានកិច្ចព្រមព្រៀងនុយក្លេអ៊ែរ អ៊ីរ៉ង់ជាឧទាហរណ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ