សម្តេចប៉ាបហ្រ្វង់ស័រ៖សហគមន៍សាសនាកាតូលិកនៅតំបន់មជ្ឈិមបូព៌ាមិនត្រូវអស់សង្ឃឹមទេ
ចុះផ្សាយនៅថ្ងៃ៖
ស្តាប់ - ០៥:២៩
ប្រមុខសង្ឃកាតូលិកសម្តេចប៉ាបហ្រ្វង់ស័របានបិទបញ្ចប់ដំណើរទស្សនកិច្ចរយៈពេល ៣ថ្ងៃនៅក្នុងប្រទេសអ៊ីរ៉ាក់នាថ្ងៃអាទិត្យ ទី៧ មីនា។ នេះជាដំណើរទស្សនកិច្ចលើកទី៣៣ របស់ប្រមុខសង្ឃកាតូលិកនៅក្នុងទឹកដីអ៊ីរ៉ាក់ និងជាលើកទី១ សម្រាប់សម្តេចប៉ាបហ្រ្វង់ស័រ។ នៅក្នុងដំណើរទស្សនកិច្ចរយៈពេល ៣ថ្ងៃ សម្តេចប៉ាបហ្រ្វង់ស័របានធ្វើដំណើរទៅកាន់ទីក្រុងមួយចំនួនរបស់គ្រិស្តសាសនិកជន និងបានជួបសន្ទនាជាមួយប្រមុខសាសនាអ៊ីស្លាមនិកាយឈីអ៊ីតដ៏សំខាន់ជាងគេក្នុងលោក។ វត្តមានរបស់ប្រមុខសង្ឃកាតូលិកក្នុងប្រទេសអ៊ីរ៉ាក់បានធ្វើឡើង ខណៈដែលសហគមន៍កាតូលិកក្នុងប្រទេសអ៊ីស្លាមមួយនេះបានរងគ្រោះយ៉ាងខ្លាំង។ អ្វីទៅជាស្ថានភាពរបស់អ្នកកាន់សាសនាកាតូលិកនៅក្នុងប្រទេសអ៊ីរ៉ាក់?។
ចប់ហើយទស្សនកិច្ចរយៈពេល ៣ថ្ងៃរបស់ប្រមុខសង្ឃកាតូលិកសម្តេចប៉ាបហ្វ្រង់ស័រនៅក្នុងប្រទេសអ៊ីរ៉ាក់។ គឺជាដំណើរទស្សនកិច្ចមួយដែលព្រះអង្គបានរង់ចាំអស់រយៈពេល ៦ឆ្នាំមកហើយ។ តែអ្វីជាការកត់សម្គាល់ វត្តមានរបស់សម្តេចប៉ាបហ្រ្វង់ស័រលើទឹកដីអ៊ីរ៉ាក់ពេលនេះបានធ្វើឡើង ក្នុងពេលដែលស្ថានភាពរបស់សហគមន៍អ្នកកាន់សាសនាកាតូលិកនៅក្នុងតំបន់មជ្ឈិមបូព៌ា និយាយជារួម និងនៅក្នុងប្រទេសអ៊ីរ៉ាក់ និយាយដោយឡែកបានរងការធ្វើទុក្ខបុកម្នេញយ៉ាងខ្លាំង។ ពិតណាស់ អ៊ីរ៉ាក់ជាប្រទេសអ៊ីស្លាមនិកាយឈីអ៊ីត តែគេមិនត្រូវភ្លេចនិយាយទេថា ប្រទេសអ៊ីស្លាមមួយនេះក៏មានរស់នៅដោយអ្នកកាន់សាសនាផ្សេងទៀតដែរ ដូចយ៉ាងសាសនាកាតូលិក សាសនាយេហ្ស៊ីឌីស ឬមួយក៏សាសនាកាកាអ៊ីស។
បើគេនិយាយពីសហគមន៍សាសនាកាតូលិកតែមួយ មានសម័យកាលចំនួនពីរដែលសហគមន៍សាសនាមួយនេះបានឆ្លងកាត់យ៉ាងវេទនាជាទីបំផុត ទី១ សម័យកាលសង្រ្គាមបង្កឡើងដោយសហរដ្ឋអាមេរិក និងទី២ គឺសម័យកាលនៃការចាប់កំណើតរបស់អង្គការរដ្ឋអ៊ីស្លាមនៅប៉ែកខាងជើង និងខាងលិចប្រទេស។ នៅមុនឆ្នាំ ២០០៣ ដែលជាឆ្នាំនៃការវាយប្រហាររបស់ទ័ពអាមេរិកលើអ៊ីរ៉ាក់ដើម្បីទម្លាក់របបផ្តាច់ការសាដាំ ហ៊ូសេន ចំនួនអ្នកកាន់សាសនាកាតូលិកនៅអ៊ីរ៉ាក់មានប្រមាណពី ១ ២០០ ០០០ ទៅ ១ ៥០០ ០០០នាក់។ តែសព្វថ្ងៃនេះ ចំនួនអ្នកកាន់សាសនាកាតូលិកនៅសល់ប្រមាណពី ៣០០ ០០០ ទៅ ៥០០ ០០០នាក់ប៉ុណ្ណោះ ពោលស្មើនឹង ១% នៃចំនួនពលរដ្ឋអ៊ីរ៉ាក់សរុប។ ឃើញថាក្នុងរយៈពេលមិនដល់ ២០ឆ្នាំចុងក្រោយនេះ ចំនួនអ្នកកាន់សាសនាកាតូលិកនៅអ៊ីរ៉ាក់បានធ្លាក់ចុះគួរឲ្យកត់សម្គាល់។
សហគមន៍សាសនាកាតូលិកជាផ្ទាំងស៊ីបនៃសង្រ្គាម និងអំពើហិង្សាដែលអ៊ីរ៉ាក់បានឆ្លងកាត់ជិត ២ទសវត្សកន្លងទៅ។ ចាប់ពីឆ្នាំ ២០០៣ មានមន្រ្តីសង្ឃកាតូលិកជាច្រើនអង្គត្រូវបានចាប់ខ្លួនដោយមានអង្គខ្លះទទួលបានការដោះលែងជាថ្នូរនឹងការបង់ប្រាក់យ៉ាងច្រើនសម្បើម និងអង្គខ្លះទៀតបានរកឃើញស្លាប់នៅប៉ុន្មានសប្តាហ៍ក្រោយការចាប់ខ្លួន។ ក្រៅពីការចាប់ខ្លួនទារប្រាក់ និងសម្លាប់មន្រ្តីសង្ឃកាតូលិក វិហារកាតូលិក និងហាងទំនិញរបស់អ្នកកាន់សាសនាកាតូលិកសឹងទាំងអស់ជាផ្ទាំងស៊ីបនៃការវាយប្រហារដោយភេវរកម្ម។ ប្រឈមនឹងការវាយប្រហារ និងការធ្វើទុក្ខបុកម្នេញ អ្នកកាន់សាសនាកាតូលិកខ្លះបានភៀសខ្លួនទៅជ្រកកន្លែងផ្សេង និងខ្លះទៀតបានភៀសខ្លួនចេញពីប្រទេសតែម្តង។
ព្រឹត្តិការណ៍ដែលបានធ្វើឲ្យសហគមន៍សាសនាកាតូលិកនៅចងចាំមិនអាចបំភ្លេចបាន គឺព្រឹត្តិការណ៍ថ្ងៃទី៣០ វិច្ឆិកា ឆ្នាំ ២០១០។ ក្នុងថ្ងៃនោះ កម្ម៉ង់ដូម្នាក់របស់អង្គការភេរវនិយមអាល់កៃដាបានចាប់មនុស្សធ្វើជាចំណាប់ខ្មាំងនៅក្នុងវិហារកាតូលិកមួយក្នុងទីក្រុងបាកដាដ។ នៅពេលកម្លាំងប៉ូលិសអ៊ីរ៉ាក់បានចូលខ្លួនអន្តរាគមន៍ មានចំណាប់ខ្មាំងដែលជាគ្រិស្តសាសនិកជនចំនួន ៤៨នាក់ត្រូវបានកម្ម៉ង់ដូអាល់កៃដាបាញ់សម្លាប់ មុននឹងរូបគេត្រូវបានកម្លាំងប៉ូលិសអ៊ីរ៉ាក់បាញ់សម្លាប់។ គឺទើបចាប់ពីឆ្នាំ ២០១២ ដែលស្ថានការណ៍នយោបាយផ្ទៃក្នុងហាក់បានចាប់ផ្តើមគ្រាន់បើបន្តិច។ តែនៅឆ្នាំ ២០១៤ និងក្នុងពេលដែលអ៊ីរ៉ាក់កំពុងបន្តគំរាមកំហែងដោយពួកអាល់កៃដា ស្រាប់តែមានលេចឡើងនូវអង្គការភេរវនិយមថ្មីមួយទៀតដែលគេស្គាល់ឈ្មោះ « អង្គការរដ្ឋអ៊ីស្លាម »នៅប៉ែកខាងជើង និងប៉ែកខាងលិច។
គឺនៅពេលនោះហើយដែលសហគមន៍សាសនាកាតូលិកបានទទួលរងការធ្វើទុកបុកម្នេញជាបន្តទៀត។ នៅពេលដែលទីក្រុងម៉ូស៊ូលបានធ្លាក់ក្នុងកណ្តាប់ដៃរបស់អង្គការរដ្ឋអ៊ីស្លាមក្នុងខែមិថុនា ឆ្នាំ ២០១៤ ពួកជីហាតអង្គការភេរវនិយមមួយនេះបានឲ្យអ្នកកាន់សាសនាកាតូលិកជ្រើសយកជម្រើសមួយក្នុងចំណោមជម្រើសចំនួន ៣ ទី១ ប្តូរជំនឿសាសនា ទី២ បង់ពន្ធពិសេស និងទី៣ ចាកចេញ។ នៅទីបំផុត គឺពួកជីហាតអង្គការរដ្ឋអ៊ីស្លាមទេតើដែលជាអ្នកសម្រេចិត្តជំនួសអ្នកកាន់សាសនាកាតូលិកដោយបានបណ្តេញពួកគេ និងរឹបអូសយកផ្ទះសម្បែង។ វិធានការធ្វើបាបអ្នកកាន់សាសនាកាតូលិកក៏បានបន្តមាននៅទីកន្លែងផ្សេងទៀតដែលស្ថិតក្រោមការគ្រប់គ្រងរបស់អង្គការរដ្ឋអ៊ីស្លាម។
តែអ្វីដែលសង្រ្គាម និងពួកជីហាតអង្គការរដ្ឋអ៊ីស្លាមបានបន្សល់ទុកសម្រាប់អ្នកកាន់សាសនាកាតូលិកពេលនេះ គឺវិហាររបស់គេដែលនៅសល់តែគំនរថ្មបាក់បែក ឬមួយក៏វិហារដែលនៅសល់តែសសរជាដើម។ គឺនៅទីតាំងទាំងអស់នោះហើយដែលប្រមុខសង្ឃកាតូលិកសម្តេចប៉ាបហ្រ្វង់ស័របានទៅបំពេញទស្សនកិច្ច ពិសេសរៀបចំពិធីសូត្រធម៌នាថ្ងៃទស្សនកិច្ចចុងក្រោយនៅស្រុកការ៉ាកូសដែលជាស្រុកដែលមានអ្នកកាន់សាសនាកាតូលិករស់នៅច្រើនជាងគេ។ សារដែលសម្តេចប៉ាបហ្រ្វង់ស័របានមានបន្ទូលយ៉ាងទទូច គឺអំពាវនាវឲ្យមានការអត់ឱន មានសន្តិភាព និងមានយុត្តិធម៌ រួមទាំងស្នើដល់អ្នកកាន់សាសនាកាតូលិកនៅមជ្ឈិមបូព៌ាទាំងអស់កុំឲ្យអស់សង្ឃឹម។
អ្វីដែលសម្តេចប៉ាបចង់បាន និងចង់ឃើញសម្រាប់អនាគតប្រទេសអ៊ីរ៉ាក់ គឺការរួមរស់ជាមួយគ្នាក្នុងសន្តិភាពរវាងពលរដ្ឋមកពីគ្រប់សាសនាទាំងអស់។ សម្តេចប៉ាបបានយល់ឃើញថា សម្លេងរបស់សហគមន៍សាសនាកាតូលិកជាសម្លេងភាគតិចនៅអ៊ីរ៉ាក់មែន តែជាសម្លេងមួយមិនអាចខ្វះបានសម្រាប់អនាគតរបស់ប្រទេសនេះ និងសម្រាប់តំបន់មជ្ឈិមបូព៌ាទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ