នៅ អ៊ីរ៉ាក់ សម្តេចប៉ាបអំពាវនាវឲ្យឈប់មានអំពើហិង្សា និងអំពើជ្រុលនិយម
នៅក្នុងទស្សនកិច្ចជាលើកទី១ និងជាប្រវត្តិសាស្រ្ត ក្នុងទឹកដីអ៊ីរ៉ាក់ សម្តេចប៉ាប ហ្រ្វង់ស័រ បានអំពាវនាវឲ្យឈប់មានអំពើហិង្សា អំពើជ្រុលនិយម និងការប្រព្រឹត្តអំពើពុករលួយ ក្នុងទឹកដីអ៊ីរ៉ាក់។ នៅអ៊ីរ៉ាក់ ប្រមុខសង្ឃកាតូលិកបានបរិហាររិះគន់ផងដែរអំពើព្រៃផ្សៃ យង់ឃ្នងរបស់ក្រុមជីហាតអង្គការរដ្ឋអ៊ីស្លាម ទៅលើជនជាតិភាគតិច យ៉ាហ្ស៊ីឌី Yazidie នៅក្នុងប្រទេសអ៊ីរ៉ាក់។ សម្រាប់ប្រធានក្រុមស៊ើបអង្កេតរបស់អង្គការសហប្រជាជាតិ ដែលទទួលបន្ទុកស៊ើបអង្កេតលើអំពើប្រល័យពូជសាសន៍ នៅ អ៊ីរ៉ាក់ ទស្សនកិច្ចរបស់សម្តេចប៉ាប ជាសារជំរុញឲ្យមានការរួបរួម រស់នៅជាមួយគ្នារវាងសហគមន៍សាសនាផ្សេងគ្នា នៅអ៊ីរ៉ាក់។ អ៊ីរ៉ាក់ ដែលស្គាល់តែភ្លើងសង្គ្រាម អំពើភេរវកម្ម បង្កឲ្យក្រុមអាល់កៃដា និងក្រុមជីហាតអង្គការរដ្ឋអ៊ីស្លាម។
ចុះផ្សាយនៅថ្ងៃ៖
ស្តាប់ - ០២:២២
នៅក្នុងបរិបទកូវីដ និងអស្ថិរភាពនយោបាយ ទស្សនកិច្ចរបស់ប្រមុខសង្ឃកាតូលិក នៅប្រទេសអ៊ីរ៉ាក់ ធ្វើឡើងនៅក្នុងការប្រយ័ត្នប្រយែងខ្ពស់ និងការពារសន្តិសុខដ៏តឹងតែង។ នៅក្នុងទស្សនកិច្ចជាលើកទី១ ទៅកាន់ប្រទេសកាន់សាសនាអ៊ីស្លាម ដែលរងការបំផ្លិចបំផ្លាញ ដោយសារសង្រ្គាមអស់ជាច្រើនទសវត្សរ៍ សម្តេចប៉ាបហ្វ្រង់ស័រចង់ទៅលើលើកទឹកចិត្តសហគមន៍គ្រឹស្តសាសនិក ដែលរងគ្រោះដោយសារអំពើហិង្សា ការរើសអើង ហើយនិងភាពក្រីក្រ។
នៅក្នុងប្រទេសដែលគ្រឹស្តសាសនិកមានចំនួន តែ ១%នៃប្រជាជនសរុប ៤០លាននាក់ ប្រមុខសង្ឃកាតូលិក សម្តេចប៉ាប បានអំពាវនាវ ឲ្យឈប់មានអំពើហិង្សា ការប្រយុទ្ធគ្នា ការមិនអត់ឱនឲ្យគ្នា ហើយនិងអំពើពុករលួយ ដែលដើមហេតុនៃបាតុកម្មប្រឆាំងរាប់ខែ របស់យុវជនអ៊ីរ៉ាក់ នៅចុងឆ្នាំ ២០១៩។ ថ្លែងនៅមុខនាយករដ្ឋមន្រ្តី អ៊ីរ៉ាក់ លោក Barham Saleh ដែលជាអ្នកអញ្ជើញព្រះអង្គដោយផ្ទាល់ឲ្យធ្វើទស្សនកិច្ចជាប្រវត្តិសាស្រ្តនៅអ៊ីរ៉ាក់ សម្តេចប៉ាប បានទាមទារថ្នាក់ដឹកនាំអ៊ីរ៉ាក់ កុំឲ្យ រើសអើង ប្រកាន់សាសនា។ ព្រះអង្គបានបរិហាររិះគន់ផងដែរ អំពើឃោឃៅ និងគ្មានមនុស្សធម៌ របស់ក្រុមជីហាតអង្គការរដ្ឋអ៊ីស្លាម ដែលបានយាយីសម្លាប់ យ៉ាងព្រៃផ្សៃ ជាពិសេសទៅលើជនជាតិភាគតិចYazidie នៅក្នុងពេលគ្រប់គ្រងដែនដី មួយភាគធំរបស់អ៊ីរ៉ាក់ រហូតដល់ឆ្នាំ ២០១៩។
ក្រៅតែពីបញ្ហានយោបាយ ទស្សនកិច្ចរបស់សម្តេចប៉ាប នៅអ៊ីរ៉ាក់ នឹងផ្តោតមួយផ្នែកធំទៅលើផ្នែកសាសនា។ នៅក្នុងដំណើរទស្សនកិច្ចក្នុងទឹកដីអ៊ីរ៉ាក់ ក្នុងចម្ងាយ ជាង ១៤០០គីឡូម៉ែត្រ សម្តេចប៉ាប នឹងប្រើច្រើន មធ្យោបាយធ្វើដំណើរ តាមផ្លូវអាកាស ដើម្បី ជៀសវាង មិនឆ្លងកាត់ តំបន់ដែលនៅកាន់កាប់ ដោយក្រុមជីហាតអង្គការរដ្ឋអ៊ីស្លាម។
នៅ អ៊ីរ៉ាក់ ចំនួនប្រជាជនកាន់គ្រឹស្តសាសនាបានថយចុះ ចំនួនពី ជាង ១លានកន្លះ មកនៅ តែជាង ៤សែននាក់ នៅក្នុងរយៈពេល ២០ឆ្នាំចុងក្រោយនេះ។ ទោះយ៉ាងនេះក្តី នៅក្នុងពិធីជួបជាមួយ គ្រឹស្តសាសនិកនៅវិហារក្នុងទីក្រុងបាដាដ សម្តេចប៉ាបបានអំពាវនាវឲ្យគ្រឹស្តសាសនិក បន្ត រស់នៅ ឬត្រលប់មករស់នៅអ៊ីរ៉ាក់ ដូចមុន។ ប៉ុន្តែ សម្រាប់មន្រ្តីសង្ឃទទួលបន្ទុកវិហារកាតូលិកនៅតំបន់ដើមបូព៌ា ដោយសារតែសង្រ្គាម អូសបន្លាយ ជាង ៤០មកនេះ មានប្រជាជនអ៊ីរ៉ាក់ កាន់គ្រឹស្តសាសនាកាន់តែច្រើនបានចាកចេញ និងលែងចង់ត្រលប់មករស់នៅអ៊ីរ៉ាក់វិញ ដោយសារខ្លាច ការយាយី របស់ក្រុមប្រដាប់អាវុធ ការគ្មានការងារធ្វើ ភាពក្រីក្រ ហើយនិងការរើសអើង។
នៅមុន ពិធីសូត្រធម៌នៅថ្ងៃអាទិត្យ ជាមួយ គ្រឹស្តសាសនិកនៅ ទីក្រុងម៉ូស៊ូល ដែលធ្លាប់រងការបំផ្លាញ ខ្ទេចខ្ទីរ ដោយសារក្រុមជីហាត រដ្ឋអ៊ីស្លាម ប្រមុខសង្ឃកាតូលិកនឹងជួបជាប្រវត្តិសាស្រ្ត ជាលើកទី១ ប្រមុខដឹកនាំសាសនាអ៊ីស្លាមនិកាយស៊្ហីអ៊ីតដ៏ធំជាងគេក្នុងលោក គឺ អាយ៉ាតូឡា អាលី ស៊ីសតានី នៅថ្ងៃសៅរ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ