គម្រោងបំពង់បង្ហូរឧស្ម័នNord Stream 2ក្លាយជាចំណុចរស៊ើបក្នុងវិបត្តិរុស្ស៊ី-អ៊ុយក្រែន
ចុះផ្សាយនៅថ្ងៃ៖
ស្តាប់ - ០៤:៥០
វិបត្តិអ៊ុយក្រែនបានបញ្ឆេះឲ្យទីក្រុងម៉ូស្គូ និងបស្ចិមលោកប៉ះទង្គិចសំដីគ្នាច្រើននាមួយរយៈពេលចុងក្រោយនេះ។ ខណៈព្រមានរុស្ស៊ីពីផលវិបាកផ្នែកនយោបាយនិងការខាតបង់ផ្នែកសេដ្ឋកិច្ចធ្ងន់ធ្ងរក្នុងករណីឈ្លានពានអ៊ុយក្រែន សហភាពអឺរ៉ុបកំពុងពិចារណាផងដែរចំពោះការពឹងផ្អែករបស់ខ្លួនលើប្រេងនិងឧស្ម័នរបស់រុស្ស៊ី។
ភាពតានតឹងដែលកើតឡើងពីការបង្កើនកងទ័ពរុស្ស៊ីនៅតាមព្រំដែនអ៊ុយក្រែន នៅតែជាបច្ចុប្បន្នភាពដ៏ក្តៅគគុក។ វិបត្តិរស្ស៊ី-អ៊ុយក្រែន បានបង្វែរឲ្យគេចាប់អារម្មណ៍ជាខ្លាំងឡើងវិញចំពោះគម្រោង Nord Stream 2 ដ៏ចម្រូងចម្រាស ក្រោយពីអាមេរិកគំរាមបិទផ្លូវគម្រោងនេះ។
តើគម្រោងបំពង់បង្ហូរឧស្ម័ន Nord Stream 2 ជាអ្វី?
Nord Stream 2 ដែលជាគម្រោងបំពង់បង្ហូរឧស្ម័នក្រោមបាតសមុទ្របាល់ទិកប្រវែង ១២០០ គីឡូម៉ែត្ររបស់រុស្ស៊ី បង្កើតឡើងដើម្បីបញ្ជូនបង្ហូរឧស្ម័នពីតំបន់ស៊ីបេរីទៅប្រទេសអាល្លឺម៉ង់។ គម្រោងតម្លៃប្រមាណ ១១,៥ ពាន់លានដុល្លារនេះ (១០ពាន់លានអឺរ៉ូ) គឺជាកម្មសិទ្ធិរបស់ក្រុមហ៊ុនឧស្ម័ន Gazprom ដែលគ្រប់គ្រងដោយរដ្ឋរុស្ស៊ី។
ទោះបានបញ្ចប់ក្នុងខែកញ្ញាឆ្នាំ ២០២១ហើយក្តី តែគម្រោង Nord Stream 2 នៅមិនទាន់ចាប់ផ្តើមបង្ហូរឧស្ម័នចេញនៅឡើយទេ ដោយសារតែត្រូវរង់ចាំការអនុញ្ញាតពីសហភាពអឺរ៉ុប។ ប្រសិនបើគម្រោងនេះ ទទួលបានភ្លើងខៀវពីទីក្រុងព្រុចសែល វានឹងអាចបង្ហូរឧស្ម័នបានដល់ ៥៥ ពាន់លានម៉ែត្រគូប ទៅកាន់ប្រទេសអាល្លឺម៉ង់ជារៀងរាល់ឆ្នាំ។ យោងតាមការចុះផ្សាយរបស់សារព័ត៌មាន អាល្លឺម៉ង់ DW សេចក្តីសម្រេចចុងក្រោយនឹងមិនអាចកើតឡើងនោះទេមុនពាក់កណ្តាលឆ្នាំ២០២២នេះ។
ក៏ប៉ុន្តែ វិបត្តិការទូតរវាងបស្ចិមលោកនិងរុស្ស៊ីទាក់ទងសំណុំរឿងអ៊ុយក្រែន កំពុងបង្កជាភាពស្មុគស្មាញដល់អនាគតនៃគម្រោងបំពង់បង្ហូរប្រេងរបស់រុស្ស៊ីទៅអាល្លឺម៉ង់នេះ។ ប្រសិនបើរុស្ស៊ីហ៊ានតែចូលឈ្លានពានអ៊ុយក្រែន នោះការសម្រេចបញ្ឈប់គម្រោង Nord Stream 2 នឹងជាផ្នែកមួយនៃយុទ្ធសាស្ត្រនយោបាយ ឬយោធារបស់សហភាពអឺរ៉ុប”។ នេះបើតាមអ្នកស្រី Anna Creti ប្រធាននាយកដ្ឋានសេដ្ឋកិច្ចអាកាសធាតុនៃសាកលវិទ្យាល័យ Paris Dauphine និយាយក្នុងបទសម្ភាសន៍ជាមួយ FRANCE 24។
យ៉ាងណាក៏ដោយ អ្នកស្រី Anna ថាសេចក្តីសម្រេចនេះមិនអាចធ្វើឡើងដោយឯកតោភាគីបាននោះទេ។ ដោយសារនេះជាគម្រោងរួម ដូច្នោះវាត្រូវការការព្រមព្រៀងគ្នា រវាងក្រុមហ៊ុនពាក់ព័ន្ធទាំងអស់រួមមានក្រុមហ៊ុនថាមពលរុស្ស៊ី អាល្លឺម៉ង់ ហូឡង់ និងបារាំង។
បញ្ហាNord Stream 2ជាសញ្ញាបញ្ជាក់ថាការផ្គត់ផ្គង់ឧស្ម័ននៅអឺរ៉ុបមានហានិភ័យ?
គម្រោង Nord Stream 2 ត្រូវបានគេមើលឃើញថាជាអាវុធដែលលោកខាងលិច ទុកគម្រាមប្រឆាំងនឹងរុស្សី និងដើម្បីបង្ហាញលោកពូទីន ថាការឈ្លានពានលើអ៊ុយក្រែន ទីក្រុងម៉ូស្គូ ត្រូវប្រឈមនឹងត្រូវខាតបង់ធ្ងន់ធ្ងរ។
ជាការពិត គម្រោងបំពង់បង្ហូរឧស្ម័ន មានសារៈសំខាន់សម្រាប់រុស្ស៊ី ពីព្រោះវាអាចបង្ហូរបញ្ជូនឧស្ម័នដោយផ្ទាល់ទៅកាន់អឺរ៉ុប និងកាត់បន្ថយថ្លៃចំណាយលើការផ្គត់ផ្គង់ដឹកបញ្ជូន តាមរយៈអ៊ុយក្រែន។ ដូច្នោះ ទណ្ឌកម្មលើគម្រោងមួយនេះ នឹងធ្វើឲ្យរុស្ស៊ីខាតបង់ចំណូល។
ក៏ប៉ុន្តែ តើអឺរ៉ុបដែលពឹងផ្អែកលើប្រេង និងឧស្ម័នរបស់រុស្ស៊ី មិនរងផលប៉ះពាល់ទេឬ ប្រសិនបើគម្រោង Nord Stream 2 ត្រូវបានបញ្ឈប់?
យោងតាម Eurostat ក្នុងឆ្នាំ២០១៩ ជាងពាក់កណ្តាលឬស្មើនឹង៦១% នៃតម្រូវការថាមពលរបស់សហភាពអឺរ៉ុបត្រូវបានផ្គត់ផ្គង់ដោយការនាំចូល។ ហើយប្រមាណ ៣៥% នៃឧស្ម័នប្រើប្រាស់ក្នុងសហភាពអឺរ៉ុបមានប្រភពចេញមកពីប្រទេសរុស្ស៊ី។
ប្រសិនបើអឺរ៉ុប ផ្តាច់ខ្លួនចេញពីឧស្ម័នរុស្ស៊ីតើអឺរ៉ុបមានជម្រើសអ្វីផ្សេង? អ្នកស្រី Anna Creti បានឆ្លើយតបថា អាមេរិកដែលជាប្រទេសនាំចេញឧស្ម័នធម្មជាតិដ៏ធំបំផុតក្នុងពិភពលោក នឹងក្លាយជាជម្រើសសម្រាប់ពឹងផ្អែករបស់អឺរ៉ុប។
ក្រោយបានគំរាមរារាំងគម្រោងបំពង់បង្ហូរឧស្ម័នពីរុស្ស៊ី ទៅលើអាល្លឺម៉ង់ ក្នុងករណីលោក ពូទីន ហ៊ានតែសម្រេចចិត្តចូលឈ្លានពានអ៊ុយក្រែន អាមេរិកបានស្វះស្វែងរកប្រភពផ្គត់ផ្គង់ថាមពលផ្សេងក្រៅពីរុស្ស៊ីសម្រាប់អាល្លឺម៉ង់ ក៏ដូចជាសហភាពអឺរ៉ុប។ ជាក់ស្តែង កាលពីសប្តាហ៍មុន អាជ្ញាធរអាមេរិកបានប្រកាស ថាពួកគេកំពុងចរចាជាមួយប្រទេសមួយចំនួននៅមជ្ឈិមបូព៌ា និងអាហ្វ្រិកខាងជើងដើម្បីបង្កើនការចែកចាយឧស្ម័នទៅកាន់អឺរ៉ុប។
ជារួមមក អនាគតនៃគម្រោង Nord Stream 2 កំពុងបន្តស្ថិតនៅក្នុងភាពស្រពេចស្រពិលនៅឡើយ ខណៈការប៉ះទង្គិចពាក្យសំដីគ្នារវាងទីក្រុងម៉ូស្គូ និងលោកខាងលិចនៅតែបន្តមានជុំវិញសំណុំរឿងអ៊ុយក្រែន។ បញ្ឈប់ ឬបើកដំណើរការ Nord Stream 2 គឺផ្អែកទាំងស្រុងលើស្ថានភាពបច្ចុប្បន្នរវាងរុស្ស៊ី និងបស្ចិមលោកទាក់ទងវិបត្តិអ៊ុយក្រែន។ ហើយតាមអ្នកវិភាគ ឱកាសនៃការបន្តកិច្ចសហប្រតិបត្តិការលើគម្រោងបំពង់បង្ហូរឧស្ម័នរវាងអឺរ៉ុប និងរុស្ស៊ីមានប្រូបាបប៊ីលីតេ ៥០/៥០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ