វិបត្តិអ៊ុយក្រែន៖ អាមេរិកត្រូវការប្រទេសកាតាជំនួសរុស្ស៊ីក្នុងរឿងផ្គត់ផ្គត់ឧស្ម័នសម្រាប់អឺរ៉ុប
នៅក្រោយគំរាមសម្លាប់គម្រោងបំពង់បង្ហូរឧស្ម័នពីរុស្ស៊ី ទៅលើអាល្លឺម៉ង់ Nord Stream 2ក្នុងករណីរុស្ស៊ី ចូលឈ្លានពានអ៊ុយក្រែន អាមេរិកបានស្វែងរកប្រភពផ្គត់ផ្គង់ថាមពលផ្សេង ក្រៅពីរុស្ស៊ី សម្រាប់អាល្លឺម៉ង់ ក៏ដូចជាសហភាពអឺរ៉ុបដែលពឹងផ្អែកលើឧស្ម័នរុស្ស៊ី។ កាតាដែលជាប្រទេសនាំចេញឧស្ម័នធម្មជាតិធំលេខ២ក្នុងពិភពលោក ត្រូវបានអាមេរិកប្រមើលមើលឃើញថា ជាជម្រើសសក្តិសមសម្រាប់ផ្គត់ផ្គង់ឧស្ម័នដល់អឺរ៉ុប ក្នុងអំឡុងពេលដែលរុស្ស៊ី ជាប់ទណ្ឌកម្ម មិនអាចលក់ឧស្ម័នឲ្យអឺរ៉ុប។ នៅថ្ងៃចន្ទ ទី៣០មករា ស្តេចកាតា អេមៀ Tamim ben Hamad al-Thaniត្រូវធ្វើដំណើរទៅទីក្រុងវ៉ាស៊ីនតោន ដើម្បី ជួបពិភាក្សាទ្វេភាគី ជាមួយ ប្រធានាធិបតីអាមេរិក លោកចូ បៃដិន ពីសំណុំរឿងនេះ ហើយនិងសំណុំរឿងតាលីបង់ នៅ៥ខែក្រោយអាមេរិកដកទ័ពទាំងស្រុងចេញពីអាហ្វហ្កានីស្ថាន។
ចុះផ្សាយនៅថ្ងៃ៖
ស្តាប់ - ០២:៤៤
ទស្សនកិច្ចរបស់ស្តេចកាតា អេមៀ Tamim ben Hamad al-Thaniនៅ វ៉ាស៊ីនតោន មិនមែនជារឿងចៃដន្យឡើយ ព្រោះថា វាធ្វើឡើងក្នុងកាលៈទេសៈ ដែលអាមេរិក និងសហភាពអឺរ៉ុបកំពុងស្វះស្វែងរកប្រភពផ្គត់ផ្គង់ឧស្ម័ន ផ្សេង មកជំនួសឧស្ម័នរបស់រុស្ស៊ី នៅក្នុងករណី រុស្ស៊ីជាប់ទណ្ឌកម្ម ដោយសាររឿងឈ្លានពានអ៊ុយក្រែន។
តាមសេតវិមាន របៀបវារៈគោលនៃជំនួបទ្វេភាគីជាលើកទី១រវាងប្រធានាធិបតីអាមេរិក ចូ បៃដិន និងស្តេចកាតានៅទីក្រុងវ៉ាស៊ីនតោន ផ្តោតសំខាន់ទៅលើការប្រឹងប្រែងធានាស្ថិរភាពនៃការផ្គត់ផ្គង់ថាមពលក្នុងពិភពលោក។
តាមមន្រ្តីទូតអឺរ៉ុប វ៉ាស៊ីនតោនកំពុងទាក់ទងផងដែរ អូស្ត្រាលី ដើម្បីឲ្យបង្កើនការផលិតឧស្ម័នសម្រាប់ជំនួសឧស្ម័នរុស្ស៊ី នៅទីផ្សារអឺរ៉ុប។
កាតាដែលមានប្រជាជនមិនដល់៣លាននាក់ ជាប្រទេសនាំចេញឧស្ម័នធម្មជាតិ ធំទី ២ក្នុងពិភពលោកបន្ទាប់ពីអាមេរិក។ នៅមុនជំនួបនៅទីក្រុងវ៉ាស៊ីនតោន អ្នកទទួលខុសត្រូវកាតាម្នាក់បាននិយាយប្រាប់ទីភ្នាក់ងារព័ត៌មានបារាំង AFP គេកំពុងបន្តចរចា ដើម្បី រកវិធីបង្វែរទិសនៃការផ្គត់ផ្គង់ឧស្ម័នរបស់កាតា ចេញពីតំបន់អាស៊ី មកអឺរ៉ុប ប្រសិនបើរុស្ស៊ី សម្រេចផ្អាកលក់បង្ហូរឧស្ម័នឲ្យប្រទេសអឺរ៉ុបខាងលិច។
សព្វថ្ងៃ មួយភាគបីនៃឧស្ម័នប្រើប្រាស់ក្នុងរង្វង់សហភាពអឺរ៉ុប មានប្រភពមកពី រុស្ស៊ី ចំណែកកាតាបានផ្គត់ផ្គង់តែ៥%ប៉ុណ្ណោះនៃតម្រូវការសរុបរបស់សហភាពអឺរ៉ុប។ ប៉ុន្តែ សម្រាប់អ្នកជំនាញ កាតាដែលមានកិច្ចសន្យាផ្គត់ផ្គង់ប្រេងក្នុងរយៈពេលជាមួយអតិថិជននៅអាស៊ី ដូចជាចិន កូរ៉េខាងត្បូង និងជប៉ុន មានសមត្ថភាពមានកម្រិត ដើម្បីផ្គត់ផ្គង់ឧស្ម័នឲ្យអឺរ៉ុប ព្រោះថា កាតា គ្មានកន្លែងស្តុកធំដូចអារ៉ាប៊ី សាអូឌីតនោះទេ។
ម្យ៉ាងបើសិនកាតា បង្វែរទិស លក់ឧស្ម័នពីតំបន់អាស៊ី មួយរយៈ ដើម្បីជួយអឺរ៉ុប ដែលអាចជួបវិបត្តិខ្វះថាមពល ដោយសារវិបត្តិអ៊ុយក្រែន ប្រជាជននៅអឺរ៉ុបត្រូវប្រឈមនឹងបញ្ហាថាមពលឡើងថ្លៃខ្ពស់មួយកម្រិតថែមទៀត។
កាតាអាចឆ្លើយតបតាមការចង់បានរបស់អាមេរិក ដើម្បី ដោះស្រាយវិបត្តិខ្វះថាមពល នៅអឺរ៉ុប នៅក្នុងកាលៈទេសៈដែលអាមេរិក និងអឺរ៉ុប កំពុងតានតឹងជាមួយរុស្ស៊ី ជុំវិញ វិបត្តិអ៊ុយក្រែន។ នេះអាចជាជោគជ័យការទូតដ៏ធំមួយទៀតរបស់កាតា ដែលធ្លាប់ដើរតួនាទីសំខាន់នៅក្នុងការចរចារវាងអាមេរិក ហើយនិងពួកតាលីបង់ ហើយនិងជួយអាមេរិកក្នុងរឿង ជម្លៀសមនុស្សចេញពីអាហ្វហ្កានីស្ថាន។ អ្នកជំនាញវាយតម្លៃថា ដោយទទួលជួបអេមៀរបស់កាតានៅសេតវិមាន លោកប្រធានាធិបតីចូ បៃដិន ទំនងចង់ពិភាក្សារកផ្លូវ ដំណោះស្រាយបន្តទៀត សម្រាប់អាហ្វហ្កានីស្ថាន បន្ទាប់ពីអាមេរិកសម្រេចដកកទ័ព ចេញដោយប្រថុចញ៉ុច នៅក្រោយការចូលកាន់អំណាចរបស់ពួកតាលីបង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ