ក្តីសង្ឃឹមនៃការមានចរាចរណ៍ផ្លូវអាកាសធម្មតាឡើងវិញជាប្រធានបទនៃពិព័រណ៍យន្តហោះក្នុងប្រទេសសិង្ហបុរី
ចុះផ្សាយនៅថ្ងៃ៖
ស្តាប់ - ០៤:៥៣
ប្រទេសសិង្ហបុរីធ្វើជាម្ចាស់ផ្ទះរៀបចំពិព័រណ៍យន្តហោះប្រចាំឆ្នាំ ២០២២ រយៈពេល ៤ថ្ងៃដោយចាប់ផ្តើមពីថ្ងៃអង្គារ ទី១៥ កុម្ភៈដល់ថ្ងៃសុក្រ ទី១៨ កុម្ភៈ។ ការមានចរាចរណ៍ផ្លូវអាកាសធម្មតាឡើងវិញជាក្តីសង្ឃឹមនៃពិព័រណ៍យន្តហោះនៅអាស៊ីឆ្នាំ ២០២២។ គួរបញ្ជាក់ថា កូវីដ១៩ បាន និងកំពុងបន្តធ្វើឲ្យប៉ះពាល់ដល់វិស័យផ្លូវអាកាស ពិសេសបានធ្វើឲ្យក្រុមហ៊ុនអាកាសចរណ៍សឹងតែទាំងអស់នៅក្នុងតំបន់ជួបការលំបាកយ៉ាងខ្លាំង។
ក្នុងរយៈពេលជាង ២ឆ្នាំនៃវត្តមានជំងឺកូវីដ១៩ និងកូវីដ១៩ បំប្លែងខ្លួន វិស័យដឹកជញ្ជូនតាមផ្លូវអាកាសជាវិស័យមួយដែលបានរងគ្រោះខ្លាំងជាងគេ ពិសេសនៅអាស៊ីប៉ាស៊ីហ្វិក។ វិធានការបិទខ្ទប់ប្រទេសដើម្បីទប់ស្កាត់នឹងការឆ្លងរាលដាលជំងឺកូវីដ១៩ របស់ប្រទេសនីមួយៗបានធ្វើឲ្យចរាចរណ៍ផ្លូវអាកាសធ្លាក់ចុះយ៉ាងគំហុក។ ចំនួនអ្នកធ្វើដំណើរតាមផ្លូវអាកាស មិនថាអ្នកទេសចរណ៍ អ្នកជំនួញ ឬអ្នកធ្វើការមានតិចតួច ឬសឹងតែគ្មានតែម្តង។ រូបភាពដែលគ្រប់គ្នាធ្លាប់បានឃើញ និងកំពុងបន្តឃើញនៅតាមអាកាសយានដ្ឋានក្នុងប្រទេសខ្លះ គឺយន្តហោះចតចោលត្រៀបត្រា និងភាពស្ងាត់ជ្រងំប្រៀបដូចជាអាកាសយានដ្ឋានខ្មោច។
តើនៅពេលណាទៅទើបពិភពលោកអាចបិទបញ្ចប់ទាំងស្រុងនូវជំងឺកូវីដ១៩ និងកូវីដ១៩ បំប្លែងខ្លួន?។ គ្មានអ្នកណាម្នាក់ហ៊ានផ្តល់ចម្លើយជាក់ច្បាស់ចំពោះសំណួរនេះទេ។ សព្វថ្ងៃនេះ មានប្រទេសអាស៊ីខ្លះ ដូចជាអូស្រា្តលី ថៃ ហ្វីលីពីន និងកម្ពុជាបានចាប់ផ្តើមបើកទ្វារទទួលភ្ញៀវបរទេសជាថ្មី មិនថាអ្នកទេសចរណ៍ ឬអ្នកជំនួញ។ តែនៅមានប្រទេសអាស៊ីខ្លះទៀត ដូចយ៉ាងចិន និងជប៉ុនកំពុងបន្តអនុវត្តន៍វិធានការបិទខ្ទប់ដោយតម្រូវឲ្យធ្វើចត្តាឡីស័ករយៈពេល ១៤ថ្ងៃ។ ក្តីសង្ឃឹមរបស់ក្រុមហ៊ុនអាកាសចរណ៍ និងក្រុមហ៊ុនផលិតយន្តហោះដែលបានចូលរួមនៅក្នុងពិធីតាំងពិព័រណ៍យន្តហោះនៅសិង្ហបុរីពេលនេះ គឺចង់ឃើញប្រទេសអាស៊ីទាំងអស់បើកព្រំដែន និងលើកវិធានការធ្វើចត្តាឡីស័កចេញវិញ។
វិធានការបិទព្រំដែន និងតម្រូវឲ្យអ្នកដំណើរធ្វើចត្តាឡីស័កបានធ្វើឲ្យចំនួនអ្នកធ្វើដំណើរតាមផ្លូវអាកាសក្នុងតំបន់អាស៊ីប៉ាស៊ីហ្វិកធ្លាក់ចុះយ៉ាងគំហុក។ តាមសមាគមក្រុមហ៊ុនអាកាសចរណ៍ក្នុងតំបន់អាស៊ីប៉ាស៊ីហ្វិក មានអ្នកដំណើរតែ ១៦លាន៧សែននាក់ប៉ុណ្ណោះដែលក្រុមហ៊ុនអាកាសចរណ៍ក្នុងតំបន់បានដឹកក្នុងឆ្នាំ ២០២១ ពោលមានប្រមាណតែ ៤,៤% នៃចំនួនអ្នកធ្វើដំណើរសរុបក្នុងឆ្នាំ ២០១៩។ លោកអាណាន់ ស្តានឡេ អ្នកទទួលខុសត្រូវក្រុមហ៊ុនផលិតយន្តហោះ Aibus ប្រចាំតំបន់អាស៊ីប៉ាស៊ីហ្វិកបានថ្លែងដោយកត់សម្គាល់ឃើញថា នៅពេលដែលវិធានការបិទខ្ទប់ត្រូវបានបន្ធូរបន្ធយនៅក្នុងប្រទេសអឺរ៉ុប និងអាមេរិកខាងជើង ចរាចរណ៍ផ្លូវអាកាសបានស្ទុះឡើងយ៉ាងខ្លាំង។
កំណត់សម្គាល់របស់លោកអាណាន់ ស្តានឡេក៏បានទទួលស្គាល់ដោយក្រុមអ្នកអាជីពអាកាសចរណ៍ទូទៅដែរ។ សម្រាប់ពួកគេ ប្រទេសអាស៊ីទាំងអស់នៅក្នុងតំបន់ត្រូវបោះបង់វិធានការបិទខ្ទប់ និងសម្រេចសម្របខ្លួនរស់នៅជាមួយកូវីដ១៩។ ការអំពាវនាវដូចគ្នានេះក៏មានពីលោកអាឡិច ហ្វៀលម៉ាន់ អ្នកទទួលខុសត្រូវក្រុមហ៊ុនផលិតយន្តហោះ Boeing ប្រចាំតំបន់អាស៊ីអាគ្នេយ៍។ តែអ្នកវិភាគម្នាក់នៅក្នុងប្រទេសម៉ាឡេស៊ីលោកស្ហ៊ូក័រ យូសូហ្វបានយល់ឃើញថា ការមានចរាចរណ៍ផ្លូវអាកាសប្រក្រតីឡើងវិញប្រហែលនៅមិនទាន់អាចចាប់ផ្តើមនាដើមឆ្នាំ ២០២២ នេះទេ ព្រោះនៅមានឧសគ្គជាច្រើនទៀតដែលក្រុមហ៊ុនអាកាសចរណ៍ត្រូវដោះស្រាយ។
ពិតណាស់ ព្រឹត្តិការណ៍តាំងពិព័រណ៍ ដូចជាពិព័រណ៍យន្តហោះក្នុងប្រទេសសិង្ហបុរីពេលនេះជាឱកាសដ៏កម្រមួយសម្រាប់ការជួបជុំដោយផ្ទាល់រវាងក្រុមអ្នកប្រកបអាជីពដូចគ្នា ពិសេសរវាងក្រុមហ៊ុនអាកាសចរណ៍ និងក្រុមហ៊ុនផលិតយន្តហោះ។ គឺនៅក្នុងឱកាសនោះឯងដែលក្រុមហ៊ុនផលិតយន្តហោះអាចទទួលបានការកម្ម៉ង់ទិញថ្មីៗទៀតពីអតិថិជនរបស់ខ្លួន ហើយគឺនៅក្នុងឱកាសដដែលនេះឯងដែលក្រុមហ៊ុនអាកាសចរណ៍អាចដឹងនូវផលិតថ្មី និងទទួលបាននូវតម្លៃពិសេស។ ទោះជាយ៉ាងនេះក្តី និងអ្វីដែលគេកំពុងសម្លឹងឃើញនៅចំពោះមុខពេលនេះ គឺការបន្តអូសជើងរបស់វិស័យដឹកជញ្ជូនផ្លូវអាកាសនៅក្នុងវិបត្តិកូវីដ១៩។
ជាកស្តែង ចំនួនអ្នកចូលរួមនៅក្នុងពិព័រណ៍យន្តហោះឆ្នាំ ២០២២ មានប្រមាណតែ ៦០០នាក់ប៉ុណ្ណោះ ពោលតិចជាងឆ្នាំ ២០២០ ដែលមានដល់ទៅជាង ៩០០នាក់។ មួយវិញទៀត ប្រឈមនឹងកំណើនឆ្លងកូវីដ១៩ នៅសិង្ហបុរីសព្វថ្ងៃ អ្នកចូលរួមត្រូវធ្វើតេស្តិ៍រកកូវីដ១៩ ជារៀងរាល់ថ្ងៃក្នុងរយៈពេល ៤ថ្ងៃនៃការតាំងពិព័រណ៍។ ចំណែកមហាជនទូទៅមិនត្រូវបានអនុញ្ញាតឲ្យចូលរួមមើលផ្ទាល់នៅក្នុងការហោះសាកល្បងនូវយន្តហោះរបស់ក្រុមហ៊ុនផលិតយន្តហោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ