កូវីដ បានបញ្ចុះចរាចរណ៍ផ្លូវអាកាស៦០% នៅឆ្នាំ២០២០
ដោយហេតុមានជំងឺរាតត្បាតនៃជំងឺកូវី១៩ ចំនួនអ្នកដំណើរតាមផ្លូវអាកាសបានធ្លាក់ចុះអស់ចំនួន៦០% នៅឆ្នាំ២០២០។ ហើយសម្រាប់អនាគតដ៏ខ្លីខាងមុខ ពិភពលោកគ្មានទស្សនៈវិស័យល្អក្នុងវិស័យនេះទេ។ នេះបើតាមការព្រមានរបស់ភ្នាក់ងារអាកាសចរណ៍ស៊ីវិលអង្គការសហប្រជាជាតិ ហៅកាត់ថា (OACI)។
ចុះផ្សាយនៅថ្ងៃ៖
ស្តាប់ - ០២:១៧
នៅឆ្នាំ២០២០ ចំនួនអ្នកដំណើរតាមយន្តហោះ បានធ្លាក់ចុះខ្លាំង ត្រលប់ទៅមានកំរិតដូចកាលពីឆ្នាំ២០០៣ ដោយរាប់ឃើញមានអ្នកធ្វើដំណើរតែ១៨០០លាននាក់ ទល់នឹង៤៥០០លាននាក់កាលពីឆ្នាំ២០១៩។ ចរាចរណ៍ផ្លូវអាកាសក្នុងស្រុក បានធ្លាក់ចុះអស់៥០% និងដល់ទៅ៧៤% សម្រាប់ការហោះហើរអន្តរជាតិ។ នេះបើតាមការលម្អិតក្នុងរបាយការណ៍របស់អង្គការអាកាសចរណ៍ស៊ីវិលអង្គការសហប្រជាជាតិ ដែលមានទីស្នាក់ការនៅម៉ុងរ៉េអាល់ ប្រទេសកាណាដា។
ការធ្វើដំណើរផ្លូវអាកាសមានសកម្មភាពខ្លាំងនិងពេញទំហឹងតែមួយខែមករាដើមឆ្នាំ២០២០ និងសម្រាប់តែប្រទេសមួយចំនួនតូចប៉ុណ្ណោះ។ ចាប់ពីចុងខែមីនា២០២០មក ចរាចរណ៍ហោះហើរត្រូវគាំងស្តូកស្ទើរទូទាំងពិភពលោក។ នៅខែមេសា ភ្នាក់ងារ កត់ត្រាឃើញមានការហោះហើរធ្លាក់ចុះ៩២% បើប្រៀបទៅខែមេសាឆ្នាំ២០១៩។ វិស័យអាកាសចរណ៍ចាប់រើបសកម្មភាពខ្លះឡើងវិញនៅរដូវក្តៅ សម្រាប់តំបន់អឌ្ឍគោលខាងជើង តែចំនួនអ្នកធ្វើដំណើរចាប់ធ្លាក់ចុះវិញ ចាប់ពីខែកញ្ញា ២០២០។
បើតាមភ្នាក់ងារជំនាញផ្នែកអាកាសចរណ៍ស៊ីវិល ចំនួនអ្នកដំណើរតាមផ្លូវអាកាសនឹងបន្តធ្លាក់ចុះទៀត និងធ្លាក់ចុះធ្ងន់ធ្ងរខ្លាំងថែមទៀត នៅត្រីមាសទីមួយឆ្នាំ២០២១នេះ។ ជាផលវិបាកក្រុមហ៊ុនអាកាសចរណ៍បានស្គាល់ការខាតបង់សរុបអស់៣៧០ពាន់លានដុល្លារអាមេរិក។ អាកាសយានដ្ឋាន និងក្រុមហ៊ុនផ្គត់ផ្គង់សេវាហោះហើរ រងការខាតបង់ម្នាក់ៗអស់១១៥ និង១៣ពាន់លានដុល្លារ។ ការខាតបង់ដ៏ធ្ងន់ធ្ងរនេះ ជាបញ្ហាចោទខ្លាំងដល់ផ្នែកសុវត្ថិភាពហិរញ្ញវត្ថុរបស់ឧស្សាហកម្មអាកាសចរណ៍ផង និងជាការគំរាមកំហែងបាត់បង់ការងាររបស់បុគ្គលិករាប់លាននាក់នៅលើពិភពលោកផង។ ហើយដោយហេតុទេសចរចំនួនពាក់កណ្តាលជិះយន្តហោះទៅកាន់ទិសដៅកំសាន្តរបស់ខ្លួន ទីផ្សារទេសចរណ៍ ក៏បានក្លាយជាជនរងគ្រោះខ្លាំងជាងគេបំផុតមួយ។
វិស័យអាកាសចរណ៍នឹងអាចងើបឡើងវិញនៅត្រីមាសទីពីរឆ្នាំ២០២១ តែវាអាស្រ័យទាំងស្រុងទៅលើប្រសិទ្ធភាពនៃយុទ្ធនាការចាក់ថ្នាំបង្ការដែលក្រុមប្រទេសអ្នកមានកំពុងចាប់ផ្តើម។ នេះបើតាមភ្នាក់ងារអាកាសចរណ៍ស៊ីវិលអង្គការសហប្រជាជាតិដែលបានកត់សម្គាល់បន្ថែមទៀតថា អាកាសចរណ៍ក្នុងស្រុកធុននឹងវិបត្តិកូវីដ១៩ បានជាងអាកាសចរណ៍អន្តរជាតិ ជាពិសេសនៅប្រទេសចិន និងរុស្ស៊ី សកម្មភាពធ្វើដំណើរនិងហោះហើរបានវិលមករកភាពធម្មតា ស្មើកំរិតមុនវិបត្តិវិញហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ