តើការសោយទីវង្គតរបស់ព្រះមហាក្សត្រិយ៍អេលីហ្សាបិត ទី២ អាចជះឥទ្ធិពលលើអនាគតដែនដីស្កុតឡែនដែរ ឬទេ?
ចុះផ្សាយនៅថ្ងៃ៖
ស្តាប់ - ០៥:៥១
នៅអង់គ្លេស ព្រះសពអេលីហ្សាបិត ទី២ ត្រូវបានដង្ហែតាមរថយន្តទៅតម្កល់រយៈពេលខ្លីនៅក្នុងទីក្រុង Edinburgh នៃខេត្តស្កុតឡែន។ បន្ទាប់មក ព្រះសពអេលីហ្សាបិត ទី២ នឹងត្រូវដង្ហែតាមយន្តហោះទៅកាន់ទីក្រុងឡុងដ៏។ គួររម្លឹកថា គឺនៅលើកទឹកដីស្កុតឡែនដែលព្រះមហាក្សត្រិយ៍អេលីហ្សាបិត ទី២ បានសោយទីវង្គតកាលពីថ្ងៃទី៩ កញ្ញា។ ចាប់ពីពេលនេះទៅ ព្រះអង្គឆាលស៍ទី៣ ឡើងសោយរាជ្យជំនួសកន្លែងព្រះមាតា។ តែមានសំណួរមួយបានចោទឡើងថា តើការឡើងសោយរាជ្យរបស់ព្រះអង្គឆាលស៍ទី៣ អាចដាស់ចលនាទាមទារឯករាជ្យនៅស្កុតឡែនឲ្យកាន់តែផុសផុលជាងមុន ឬយ៉ាងណា?
ភាសាអង់គ្លេសហៅស្កុតឡែន និងភាសាបារាំងហៅអេកូស គឺជាដែនដីមួយរបស់ប្រទេសអង់គ្លេសស្ថិតប៉ែកខាងជើងដែលមានផ្ទៃក្រឡាដីជាង ៧៨ ០០០គីឡូម៉ែត្រការ៉េ និងមានប្រជាជនរស់នៅជិត ៦លាននាក់។ សព្វថ្ងៃនេះ ស្កុតឡែនកំពុងបន្តស្ថិតនៅក្រោមដំបូលរាជាណាចក្រអង់គ្លេសតែមួយ។ តែគេមិនត្រូវភ្លេចនិយាយទេថា ដែនដីអង់គ្លេសមួយនេះមានរចនាសម្ព័ន្ធដឹកនាំដូចប្រទេសមួយអ៊ីចឹងដែរ ពោលមានសភា រដ្ឋាភិបាល និងទង់ជាតិដាច់ដោយឡែករបស់ខ្លួន។ រាជដំណាក់បាល់ម៉ូរ៉ាល់ក្នុងទឹកដីស្កុតឡែនជាទីកន្លែងដែលព្រះមហាក្សត្រិយ៍អេលីហ្សាបិត ទី២ តែងយាងទៅសម្រាកលំហែព្រះកាយ និងដែលនៅទីនោះហើយដែលទ្រង់បានសោយទីវង្គតកាលពីថ្ងៃទី៩ កញ្ញាក្នុងព្រះជន្មាយុ ៩៦ព្រះវស្សា។។
ជាមួយនឹងការសោយទីវង្គតរបស់ព្រះមហាក្សត្រិយ៍អេលីហ្សាបិត ទី២ គឺជាការបិទបញ្ចប់នូវសម័យកាលមួយនៃការសោយរាជ្យរយៈពេល ៧០ឆ្នាំរបស់ព្រះអង្គ។ ជាមួយនឹងការសោយទីវង្គតរបស់ព្រះអង្គ គឺជាការបើកទំព័រថ្មីនៃការបន្តរបបរាជានិយមអង់គ្លេសជាមួយនឹងការឡើងសោយរាជ្យរបស់ព្រះអង្គឆាលស៍ទី៣។ តែខណៈដែលប្រជារាស្រ្តកំពុងបន្តកាន់ទុក្ខ និងចំពេលដែលអង់គ្លេសកំពុងរៀបចំបុណ្យព្រះសពអេលីហ្សាបិត ទី២ នៅថ្ងៃទី១៩ កញ្ញាខាងមុខ មានសំណួរជាច្រើនបាន និងកំពុងត្រូវបានប្រជារាស្រ្តអង់គ្លេសមួយចំនួនចោទសួរឡើង។ តើនឹងមានហេតុការណ៍អ្វីកើតឡើងនៅពេលខាងមុខ ឬមួយក៏ថាជាមួយនឹងព្រះមហាក្សត្រថ្មីឆាលស៍ទី៣ តើអង់គ្លេសនឹងមានស្ថានការណ៍នយោបាយយ៉ាងម៉េច។
មិនមែនជារឿងចៃដន្យទេដែលប្រជារាស្រ្តអង់គ្លេសមួយចំនួនបានចោទសំណួរទាំងនេះឡើង។ មិនចៃដន្យព្រោះនៅក្រោមការគ្រងរាជសម្បត្តិរយៈពេល ៧០ឆ្នាំរបស់ព្រះមហាក្សត្រិយ៍អេលីហ្សាបិត ទី២ ព្រះអង្គបាននាំមកនូវស្ថិរភាព ឯកភាពជាតិ និងភាពរឹងមាំរបស់របបរាជានិយមក៏ដូចជារាជាណាចក្រអង់គ្លេស។ ក្នុងមួយជីវិតរបស់ប្រជារាស្រ្តអង់គ្លេសមួយចំនួន គេមិនដែលស្គាល់ស្តេចអង្គណាក្រៅពីទ្រង់អេលីហ្សាបិត ទី២ ទេ។ ក្នុងនាមជាក្សត្រដែលគ្រងរាជ្យ និងមិនកាន់អំណាច ព្រះមហាក្សត្រិយ៍អេលីហ្សាបិត ទី២ ជាក្សត្រដែលមានឥទ្ធិពលនយោបាយ និងមានប្រជាប្រិយភាពខ្លាំងនៅក្នុងចំណោមប្រជារាស្ត្រអង់គ្លេសទូទៅ និងនៅលើឆាកអន្តរជាតិ។
នៅក្នុងទឹកដីស្កុតឡែននិយាយដោយឡែក ព្រះមហាក្សត្រិយ៍អេលីហ្សាបិត ទី២ ក៏ជាក្សត្រដែលមានប្រជាប្រិយភាព និងទទួលបានការគោរពខ្លាំង។ ព្រះអង្គបានបង្កើតឲ្យមានទំនាក់ទំនងល្អ និងជិតស្និទ្ធិរវាងរាជាណាចក្រអង់គ្លេស និងដែនដីស្កុតឡែន។ ប្រជារាស្រ្តស្កុតឡែនទូទៅបានមើលឃើញ និងយល់ស្របដូចគ្នាថា បើកុំតែមានការចូលរួម និងអំពាវនាវឲ្យមានឯកភាពជាតិពីព្រះមហាក្សត្រិយ៍អេលីហ្សាបិត ទី២ ម្ល៉េះទឹកដីស្កុតឡែនបានរបូតបាត់ពីដៃអង់គ្លេសតាំងពីយូរមកហើយ។ អ៊ីចឹងសួរថា តើព្រះមហាក្សត្រថ្មីឆាលស៍ទី៣ ដែលមិនសូវមានប្រជាប្រិយភាពដូចព្រះមាតាអាចមានលទ្ធភាព និងសមត្ថភាពដើរតួនាទីជាអ្នកធានាឯកភាពជាតិដែរ ឬទេ។
ការធានាឯកភាពជាតិដែលគេចង់និយាយនេះ គឺប្រឈមនឹងចលនាបះបោរទាមទារឯករាជ្យនៅស្កុតឡែនដែលកំពុងរីកកាន់តែធំនៅប៉ុន្មានឆ្នាំកន្លងទៅ ពិសេសតាំងពីអង់គ្លេសបានចាកចេញពីសហភាពអឺរ៉ុប ឬហៅ Brexit។ ខុសពីប្រជារាស្រ្តអង់គ្លេស ប្រជាជនស្កុតឡែនដល់ទៅ ៦២% បានបោះឆ្នោតបន្តរួមរស់ជាមួយសហភាពអឺរ៉ុប។ ក្នុងឆ្នាំ ២០១៤ រដ្ឋាភិបាលស្កុតឡែនបានរៀបចំបោះឆ្នោតប្រជាមតិស្តីពីឯករាជ្យ។ តែមានប្រជារាស្រ្តស្កុតឡែនចំនួន ៥៥% បានបោះឆ្នោតដើម្បីបន្តរួមរស់ជាមួយអង់គ្លេស។ តែទោះជាមានការជំទាស់ច្រើនដងពីរដ្ឋាភិបាលអង់គ្លេសក៏ដោយក៏នាយករដ្ឋមន្រ្តីស្កុតឡែនលោកស្រី Nicolas Sturgeon មិនបានបោះបង់ចោលនូវគំនិតចង់បានឯករាជ្យផ្តាច់ខ្លួនចេញពីអង់គ្លេសដែរ។
នៅដំណាច់ខែមិថុនាកន្លងទៅថ្មីៗនេះ ពោលនៅមុនការសោយទីវង្គតរបស់ព្រះមហាក្សត្រិយ៍អេលីហ្សាបិត ទី២ លោកស្រី Nicolas Sturgeon បានប្រកាសពីការចង់រៀបចំបោះឆ្នោតប្រជាមតិស្តីពីឯករាជ្យជាថ្មីនៅថ្ងៃទី១៩ តុលា ឆ្នាំ ២០២៣។ នេះស បញ្ជាក់ឲ្យឃើញថា ប្រជារាស្រ្តស្កុតឡែនមួយភាគនៅតែមានភាពអន្ទោកអន្ទោលចង់បានឯករាជ្យដោយមិនបោះបង់ចោលទេ។ រីឯគណបក្សឯករាជ្យស្កុតឡែនយល់ថា ការសោយទីវង្គតរបស់ព្រះមហាក្សត្រិយ៍អេលីហ្សាបិត ទី២ ដែលជានិមិត្តរូបនៃឯកភាពជាតិជាហេតុផលមួយទៀតបន្ទាប់ពី Brexit ដើម្បីឲ្យប្រជារាស្រ្តស្កុតឡែនបន្តការទាមទារឯករាជ្យ។
គេមិនដឹងថា តើហេតុផលទាំងពីរលើកឡើងដោយឡើងគណបក្សឯករាជ្យស្កុតឡែនពិតជាគ្រប់គ្រាន់ដើម្បីឲ្យអង់គ្លេសបោះបង់ស្កុតឡែនចោលឬអត់ទេ?។ អ្វីដែលគេដឹង គណបក្សឯករាជ្យស្កុតឡែនមិនបានអំពាវនាវឲ្យផ្តាច់ទំនាក់ទំនងជាមួយរាជាណាចក្រអង់គ្លេសដែលទើបមានព្រះមហាក្សត្រថ្មីជាបុត្រាច្បងរបស់ព្រះសពអេលីហ្សាបិត ទី២ នោះឡើយ។ ដូច្នេះគេអាចនិយាយបានថា អនាគតនៃជោគវាសនានៃទំនាក់ទំនងរវាងអង់គ្លេស និងស្កុតឡែន គឺស្ថិតក្នុងដៃរបស់ព្រះមហាក្សត្រថ្មីព្រះអង្គឆាលស៍ទី៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ