អង់គ្លេស៖ពិភពលោកចូលរួមសម្តែងការសោកស្តាយ និងគោរពវិញ្ញាណក្ខន្ទចំពោះការសោយទីវង្គតព្រះមហាក្សត្រិយអេលីហ្សាបិត ទី២
តាំងពីក្រោយការប្រកាសដំណឹងសោយទីវង្គតព្រះមហាក្សត្រិយអង់គ្លេសអេលីហ្សាបិត ទី២ នៅល្ងាចថ្ងៃព្រហស្បតិ៍ ទី៨ កញ្ញា ថ្នាក់ដឹកនាំគ្រប់ជាន់ថ្នាក់នៅគ្រប់ជ្រុងជ្រោយក្នុងលោកបានចូលរួមគោរពវិញ្ញាណក្ខន្ទ និងផ្ញើសារសម្តែងការសោកស្តាយជាមួយក្រុមគ្រួសាររាជវង្សសានុវង្ស ប្រទេស និងប្រជារាស្រ្តអង់គ្លេស។ ទន្ទឹមគ្នានេះ និងដើម្បីចូលរួមកាន់ទុក្ខ មានប្រទេសមួយចំនួនបានទម្លាក់ទង់ជាតិនៅពាក់កណ្តាលដង។
ចុះផ្សាយនៅថ្ងៃ៖
ស្តាប់ - ០៣:២៣
នៅសហរដ្ឋអាមេរិក ប្រធានាធិបតីលោកចូ បៃដិនបានបញ្ជាក់នៅក្នុងសេចក្តីប្រកាសព័ត៌មានមួយថា ព្រះមហាក្សត្រិយអេលីហ្សាបិត ទី២ ជាស្រ្តីរដ្ឋម្នាក់ប្រកបដោយសេចក្តីថ្លៃថ្នូរ និងភាពខ្ជាប់ខ្ជួនដែលគ្មានអ្នកណាអាចប្រៀបផ្ទឹមបាន។ តាមលោកបៃដិន ព្រះមហាក្សត្រិយអេលីហ្សាបិត ទី២ បានចូលរួមជួយធ្វើឲ្យទំនាក់ទំនងរវាងសហរដ្ឋអាមេរិក និងអង់គ្លេសក្លាយជាទំនាក់ទំនងពិសេស។ « ខ្ញុំរក្សាទុកនូវការចងចាំជាមិត្តរបស់ប្រទេសបារាំង » នេះជាសំណេររបស់ប្រធានាធិបតីបារាំងលោកម៉ាក្រុងនៅក្នុងទំព័រ Twitter របស់លោក។
សម្រាប់ប្រធានាធិបតីអាល្លឺម៉ង់លោក Frank-Walter Steinmeier ព្រះមហាក្សត្រិយអេលីហ្សាបិត ទី២ ជានិមិត្តរូបនៃការផ្សះផ្សាជាមួយអាល្លឺម៉ង់ដោយបានចូលរួមរុំរបួសនៃសង្រ្គាមលោកលើកទី២។ ចំណែកនាយករដ្ឋមន្រ្តីអាល្លឺម៉ង់លោកអូឡាហ្វ ស្ហុលស៍បានសរសេរដាច់ដោយឡែកដោយរម្លឹកពីការប្តេជ្ញាចិត្តរបស់ព្រះមហាក្សត្រិយអេលីហ្សាបិត ទី២ ចំពោះការផ្សះផ្សារវាងអាល្លឺម៉ង់ អង់គ្លេស។ « ព្រះមហាក្សត្រិយអេលីហ្សាបិត ទី២ ជាសាក្សីនៃសង្រ្គាម ការផ្សះផ្សានៅអឺរ៉ុប និងឆ្ងាយពីអឺរ៉ុប រួមទាំងជាសាក្សីនៃការផ្លាស់ប្តូរយ៉ាងជ្រាលជ្រៅនៃភពផែនដី និងសង្គមរបស់យើង » នេះជាប្រតិកម្មរបស់ប្រធានគណៈកម្មការអឺរ៉ុបលោកស្រីអួរស៊ូឡា វ៉ុនឌែរ ឡេយែន។
ពីកាណាដា នាយករដ្ឋមន្រ្តីលោកហ្សូសស្តាំង ទ្រុយដូបានថ្លែងថា ព្រះមហាក្សត្រិយអេលីហ្សាបិត ទី២ បន្តមានវត្តមាននៅក្នុងជីវិតប្រជាជនកាណាដាគ្រប់រូប និងបន្តស្ថិតនៅជាផ្នែកមួយដ៏សំខាន់នៃប្រវត្តិសាស្ត្ររបស់ប្រទេសកាណាដា។ សម្រាប់ព្រះមហាក្សត្រហ្វីលីប និងអគ្គមហេសីរបស់ប្រទេសបែលហ្សិក ព្រះមហាក្សត្រិយអេលីហ្សាបិត ទី២ ជាព្រះមហាក្សត្រិយពិសេសដែលដក់ជាប់យ៉ាងជ្រាលជ្រៅនៅក្នុងប្រវត្តិសាស្រ្តដោយបង្ហាញពីសេចក្តីថ្លៃថ្នូរ ភាពក្លាហាន និងការលះបង់។ សារស្រដៀងគ្នាក៏មានពីអគ្គលេខាធិការអង្គការសហប្រជាជាតិលោកអង់តូនីញ៉ូ ហ្គូទែរស៍ដែរ។
នៅប្រទេសចិន ប្រធានាធិបតីលោកស៊ី ជីនពីងបានផ្ញើសារចូលរួមរំលែកទុក្ខជាមួយក្រុមគ្រួសាររាជវង្សសានុវង្ស រដ្ឋាភិបាល និងប្រជារាស្រ្តអង់គ្លេស។ ចំណែកនាយករដ្ឋមន្រ្តីជប៉ុនលោកហ្វូមីអូ គីស៊ីដាបានចូលរួមសោកស្តាយពីការបាត់បង់ព្រះមហាក្សត្រិយអេលីហ្សាបិត ទី២ ដែលលោកចាត់ទុកជាការបាត់បង់សម្រាប់ប្រជារាស្រ្តអង់គ្លេស និងសម្រាប់សហគមន៍អន្តរជាតិ។ ពីប្រទេសឥណ្ឌាដែលធ្លាប់ស្ថិតក្រោមអាណនិគមនិយមអង់គ្លេស នាយករដ្ឋមន្រ្តីលោកណារិនដ្រា ម៉ូឌីបានសម្តែងការសោកស្តាយចំពោះការបាត់បង់ព្រះមហាក្សត្រិយអេលីហ្សាបិត ទី២។ សម្រាប់លោកម៉ូឌី ព្រះមហាក្សត្រិយអេលីហ្សាបិត ទី២ ជានិមិត្តរូបនៃសេចក្តីថ្លៃថ្នូរនៅក្នុងជីវិតសាធារណៈ។
ដោយឡែក ប្រធានាធិបតីអ៊ុយក្រែនលោកហ្សេឡេនស្គី និងប្រធានាធិបតីរុស្ស៊ីលោកពូទីនដែលកំពុងជាប់ដៃក្នុងសង្រ្គាមនឹងគ្នាក៏មិនបានខកខានចូលរួមរំលែកទុក្ខជាមួយក្រុមគ្រួសាររាជវង្សសានុវង្ស រដ្ឋាភិបាល និងប្រជារាស្រ្តអង់គ្លេសចំពោះការសោយទីវង្គតព្រះមហាក្សត្រិយអេលីហ្សាបិត ទី២ នៅពេលនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ