ព្រះសពនៃព្រះមហាក្សត្រីអេលីហ្សាបិតទី២ ត្រូវបានដង្ហែចេញពីដំណាក់Balmoral ឆ្ពោះមកទីក្រុងឡុងដ៍
នៅថ្ងៃអាទិត្យទី១១កញ្ញានេះ ក្បួនដង្ហែរព្រះសព នៃព្រះមហាក្សត្រីអេលីហ្សាបិតទី២ ត្រូវបានចាប់ផ្តើមហើយ ដោយដង្ហែរចេញពីព្រះរាជដំណាក់ Balmoral ស្ថិតនៅតំបន់អេកូស ជាទីដែលព្រះអង្គបានសោយទីវង្គត ដើម្បីឆ្ពោះមកកាន់ទីក្រុងឡុងដ៍។ ចំណែកកម្មវិធីបុណ្យព្រះសព នឹងត្រូវរៀបចំធ្វើនៅថ្ងៃទី ១៩កញ្ញា។
ចុះផ្សាយនៅថ្ងៃ៖
ស្តាប់ - ០២:១៥
ម៉ោង១០ព្រឹក ក្បួនរថយន្តដឹកព្រះសព ព្រះមហាក្សត្រីអេលីហ្សាបិតទី២ បានចាកចេញពីរបងព្រះរាជដំណាក់ Balmoral ជាទីដែលព្រះអង្គសព្វព្រះហរទ័យមកសម្រាកលំហែញឹកញាប់បំផុត នៅពេលព្រះអង្គមានព្រះជន្ម។ នៅក្នុងរថយន្ត គេឃើញក្តាម្ឈូស ធ្វើពីឈើ Chêne មានគ្របពីលើដោយទង់ក្រណាត់តំណាងតំបន់អេកូស លម្អដោយបាច់ផ្កាពណ៌សលាយលឿងមួយបាច់ពីលើ។
ក្បួនរថយន្តបានឆ្លងកាត់ភូមិស្រុកនៅក្បែរតំណាក់ Balmoral ដែលមានមនុស្សម្នារាប់ពាន់នាក់ មកឈរចាំតាមដងផ្លូវ ដើម្បីសំដែងគារវកិច្ចជូនព្រះរាជដំណើរជាចុងក្រោយ ចំពោះព្រះមហាក្សត្រី ដែលប្រជានុរាស្ត្រគោរពស្រលាញ់បំផុត។ បន្ទាប់ពីធ្វើដំណើរចំងាយប្រមាណ៣០០គីឡូម៉ែត្រ នៅវេលាម៉ោងប្រមាណ៤រសៀល ក្បួនរថយន្តដង្ហែរព្រះសព នឹងត្រូវមកដល់ទីក្រុង Edimbourg ហើយចូលសំចតនៅព្រះរាជដំណាក់ Holyroodhouse មួយយប់។
បន្ទាប់មកទៀត ព្រះសពនឹងត្រូវដឹកតាមយន្តហោះ ឆ្ពោះមកកាន់ទីក្រុងឡុងដ៍នៅថ្ងៃអង្គារទី១៣កញ្ញា។ មកដល់ទីក្រុងឡុងដ៍ភ្លាម ព្រះសពនឹងត្រូវយកទៅព្រះបរមរាជវាំង Buckingham ហើយបន្ទាប់មកទៀត នឹងត្រូវយកទៅដំកល់ នៅវិមាន Westminster ពីថ្ងៃទី១៤ ដល់ថ្ងៃទី១៩កញ្ញា។ ថ្ងៃទី១៩កញ្ញា គឺជាថ្ងៃព្រះរាជពិធីបុណ្យសព ដែលនឹងត្រូវប្រព្រឹត្តិធ្វើទៅនៅព្រះវិហារ Westminster វេលាម៉ោង១០ព្រឹក។ រដ្ឋាភិបាលអង់គ្លេស បានប្រកាសកំណត់ថ្ងៃទី១៩កញ្ញាជាថ្ងៃឈប់សម្រាកទូទាំងប្រទេស។
តាមការគ្រោងទុក ប្រមុខរដ្ឋ ប្រមុខរដ្ឋាភិបាលនៃបណ្តាប្រទេសធំៗទូទាំងពិភពលោក ដូចជាលោកម៉ាក្រុង លោកចូ បៃដិន លោកយូស្តាំង ទ្រុយដូ និងព្រះចៅអធិរាជជប៉ុនជាដើម នឹងមានវត្តមាននៅក្នុងពិធីបុណ្យព្រះសព របស់ព្រះមហាក្សត្រីអេលីហ្សាបិតទី២។ បន្ថែមជាមួយចំនួនមហាជនរាប់សែននាក់ កម្មវិធីបុណ្យព្រះសពនេះ គឺជាបន្ទុកការពារសន្តិសុខដ៏ធំបំផុតមិនធ្លាប់មាន សម្រាប់សមត្ថកិច្ច ក៏ដូចជារដ្ឋាភិបាលអង់គ្លេស។ ក្រោយពិធីផ្លូវការចប់សព្វគ្រប់ ព្រះសពនៃព្រះមហាក្សត្រីអេលីហ្សាបិតទី២ នឹងត្រូវយកទៅបញ្ចុះ នៅវិហារព្រះចៅហ្សកទី៦ ស្ថិតនៅក្នុងប្រាសាទ Windsor ដោយមានអ្នកចូលរួម តែក្រុមគ្រួសារព្រះញាតិវង្សតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ