សង្រ្គាមអ៊ុយក្រែន៖បស្ចិមលោកកំពុងប្រឈមនឹងកង្វះសម្ភារៈបរិក្ខារយោធា និងគ្រឿងសព្វាវុធសម្រាប់ខ្លួនឯង?
ចុះផ្សាយនៅថ្ងៃ៖
ស្តាប់ - ០៥:១៨
តាំងពីរុស្ស៊ីបើកការវាយប្រហារចូលឈ្លានពានអ៊ុយក្រែន ក្រុមប្រទេសលោកខាងលិចបាននាំគ្នាដាក់ទណ្ឌកម្មសេដ្ឋកិច្ចប្រឆាំងរុស្ស៊ី និងបាននាំគ្នាជួយអ៊ុយក្រែន។ ជំនួយដែលក្រុមប្រទេសលោកខាងលិចបានផ្តល់ឲ្យអ៊ុយក្រែនច្រើនជាងគេ គឺសម្ភារៈបរិក្ខារយោធា និងគ្រឿងសព្វាវុធទំនើបៗដើម្បីប្រឈមទប់នឹងកងទ័ពរុស្ស៊ី។ អាមេរិកជាប្រទេសដែលបានផ្តល់ឲ្យអ៊ុយក្រែនច្រើនជាងគេ។ តែខណៈនេះ អាមេរិក រួមទាំងប្រទេសលោកខាងលិចខ្លះកំពុងស្គាល់ចំនួនស្តុកសម្ភារៈបរិក្ខារយោធា និងគ្រឿងសព្វាវុធធ្លាក់ចុះខ្លាំង។ ហេតុអ្វីបានជាគ្រាន់តែជួយអ៊ុយក្រែនតែមួយ ក្រុមប្រទេសលោកខាងលិចបែរជាកំពុងប្រឈមនឹងការខ្វះសម្ភារៈបរិក្ខារយោធា និងគ្រឿងសព្វាវុធសម្រាប់ការពារខ្លួនឯងទៅវិញ?
តាំងពីរុស្ស៊ីបានបើកការវាយប្រហារចូលឈ្លានពានអ៊ុយក្រែនក្នុងថ្ងៃទី២៤ កុម្ភៈ សង្រ្គាមមួយនេះបានផ្តល់មេរៀនជូរចត់ចំនួនពីរដល់បស្ចិមលោក ពិសេសដល់អឺរ៉ុប។ មេរៀនទី១ គឺទាក់ទងនឹងរឿងថាមពល ពិសេសឧស្ម័នដែលអឺរ៉ុបបានពឹងខ្លាំងលើរុស្ស៊ី។ នៅពេលដែលរុស្ស៊ីបានសម្រេចបិទរ៉ូប៊ីណេឧស្ម័ន អឺរ៉ុបនំាគ្នាជ្រួលច្របល់ដោយពិបាករកឧស្ម័នពីកន្លែងផ្សេងដើម្បីជំនួសឧស្ម័នរុស្ស៊ី។ នេះដោយមិននិយាយពីតម្លៃឧស្ម័នឡើងថ្លៃកប់ពពក។ ចំណែកមេរៀនទី២ គឺទាក់ទងនឹងសម្ភារៈបរិក្ខារយោធា និងគ្រឿងសព្វាវុធដែលក្រុមប្រទេសលោកខាងលិចកំពុងមានក្នុងដៃសព្វថ្ងៃ និងដែលក្រុមប្រទេសលោកខាងលិចបានផ្តល់ឲ្យអ៊ុយក្រែនយ៉ាងច្រើនសម្បើម។
អឺរ៉ុបពិតជានឹកស្មានមិនដល់សោះឡើយថា ជាង ៧០ឆ្នាំក្រោយការបិទបញ្ចប់សង្គ្រាមលោកលើកទី២ និងជាង ៣០ឆ្នាំក្រោយការបិទបញ្ចប់សង្រ្គាមត្រជាក់ អឺរ៉ុបបែរជាកំពុងធ្លាក់ក្នុងសង្រ្គាមថ្មីនៅពេលនេះសោះ។ សង្រ្គាមរុស្ស៊ីឈ្លានពានអ៊ុយក្រែនមិនដល់ ៧ខែផងបានធ្វើឲ្យពិភពលោកច្របូកច្របល់ និងរំជើបរំជួល។ ក្រៅពីវិបត្តិថាមពល សង្រ្គាមមួយនេះកំពុងរុញពិភពលោកឲ្យធ្លាក់ក្នុងវិបត្តិខ្វះស្បៀង។ តែអាទិភាពរបស់ក្រុមបស្ចិមលោកនៅចំពោះមហិច្ឆតារបស់រុស្ស៊ី គឺជួយអ៊ុយក្រែនតាមគ្រប់មធ្យោបាយទាំងអស់ដើម្បីឲ្យអ៊ុយក្រែនអាចត ទល់នឹងទ័ពរុស្ស៊ី ពិសេសជួយអ៊ុយក្រែនក្នុងផ្លូវយោធា។ ជម្រើសនៅក្នុងន័យនេះ គឺការផ្តល់សម្ភារៈបរិក្ខារយោធា និងគ្រឿងសព្វាវុធទំនើបៗឲ្យអ៊ុយក្រែន។
សឹងគ្រប់ប្រទេសអឺរ៉ុបទាំងអស់បានផ្តល់សម្ភារៈបរិក្ខារយោធា និងគ្រឿងសព្វាវុធទំនើបៗឲ្យអ៊ុយក្រែន ក្នុងនោះ អាមេរិកបានផ្តល់ឲ្យច្រើនជាងគេដែលគិតជាទឹកប្រាក់មានជាង ១៥ ០០០លានដុល្លារនៅពេលនេះ។ គ្រឿងសព្វាវុធដែលអាមេរិកបានផ្តល់ឲ្យអ៊ុយក្រែនមានជាពិសេស គ្រាប់ផ្លោងចំនួន ៨០០ ០០០គ្រាប់ គ្រាប់មីស៊ីលបាញ់ចម្ងាយជិតលីបាញ់លើស្មាឈ្មោះ Stinger ជាង ១ ៤០០គ្រាប់ គ្រាប់មីស៊ីលឈ្មោះ Javelin សម្រាប់បាញ់រថក្រោះប្រមាណជា ៨ ៥០០គ្រាប់ គ្រាប់រ៉ូកែតឈ្មោះ Himars សម្រាប់បំពាក់លើរថពាសដែកធុនស្រាល ឬមួយក៏គ្រាប់រ៉ូកែតបំពាក់ដោយប្រព័ន្ធ GPS ដែលអាចបាញ់បានចម្ងាយជាង ៨០គីឡូម៉ែត្រជាដើម។
ក្រុមបស្ចិមលោកពិតជាមិនខកចិត្តចំពោះជំនួយយោធារបស់ខ្លួនចំពោះអ៊ុយក្រែនទេ ព្រោះតាមរយៈជំនួយនេះ ទ័ពអ៊ុយក្រែនមានប្រៀបលើទ័ពរុស្ស៊ីលើសមរភូមិ និងវាយដណ្តើមបានស្រុកមួយចំនួនពីទ័ពរុស្ស៊ីវិញ។ តែចំណោតនៅត្រង់ថានាពេលខាងមុខ អាមេរិកនឹងមិនអាចផ្តល់គ្រឿងសព្វាវុធទំនើបៗឲ្យអ៊ុយក្រែនបានទៀតឡើយ។ នេះមិនមែនមកពីអាមេរិកចង់ឈប់ជួយអ៊ុយក្រែនទេ តែមកពីបរិមាណស្តុកអាវុធរបស់អាមេរិកមានកំណត់ ឬនិយាយឲ្យស្រួល អាមេរិកក៏ត្រូវការទុកគ្រឿងសព្វាវុធទំនើបៗដើម្បីប្រើប្រាស់ខ្លួនឯងដែរ។ បើពុំនោះសោតទេ គឺសមត្ថភាពការពាររបស់អាមេរិកខ្លួនឯងនឹងអាចជួបហានិភ័យ។
គួររម្លឹកថា នៅក្រោយការដួលរលំសហភាពសូវៀតក្នុងទសវត្សរ៍ ៩០ អាមេរិកក៏ដូចជាក្រុមប្រទេសលោកខាងលិចបានបង្ខំចិត្តកាត់បន្ថយ ឬបញ្ឈប់ការផលិតអាវុធប្រភេទខ្លះ។ ជាក់ស្តែង ផលិតកម្មគ្រាប់មីស៊ីលឈ្មោះ Stinger ត្រូវបានរោងចក្រអាមេរិកបោះបង់ចោលក្នុងឆ្នាំ ២០២០។ ចំណែកការផលិតគ្រាប់ផ្លោង គ្រាប់រ៉ូកែត និងគ្រាប់មីស៊ីលផ្សេងទៀតនៅមានកម្រិតទាបនៅឡើយ។ អ៊ីចឹងហើយបានជានៅពេលនេះ រដ្ឋបាលក្រុងវ៉ាស៊ីនតោនបានជំរុញឲ្យឧស្សាហកម្មអាវុធបង្កើនការផលិតបន្ថែមទៀតឲ្យបានលឿនបំផុតដែលអាចធ្វើទៅបាន។ តែក្រុមអ្នកជំនាញបានមើលឃើញថា គេត្រូវការពេលច្រើនខែរហូតដល់ច្រើនឆ្នាំទើបអាមេរិកអាចរកឃើញឡើងវិញនូវកម្រិតបរិមាណស្តុកអាវុធដូចមុនសង្រ្គាមរុស្ស៊ីឈ្លានពានអ៊ុយក្រែន នោះបើទោះបីជារដ្ឋបាលក្រុងវ៉ាស៊ីនតោនបានទម្លាក់លុយច្រើនប៉ុនណាក៏ដោយ។
ក្រៅពីស្នើឲ្យរោងចក្រផលិតអាវុធក្នុងស្រុកបង្កើនល្បឿនលើការផលិតគ្រាប់ផ្លោង ឬគ្រាប់មីស៊ីលដែលកំពុងជិតអស់ពីស្តុកដោយសារយកទៅជួយអ៊ុយក្រែន រដ្ឋបាលក្រុងវ៉ាស៊ីនតោនក៏បានចុះកុងត្រាជាមួយក្រុមហ៊ុនផលិតអាវុធនៅបរទេសដែរ។ កម្មវត្ថុរបស់អាមេរិក គឺដើម្បីបំពេញស្តុកអាវុធរបស់ខ្លួនដើម្បីការពារខ្លួនផង និងដើម្បីអាចបន្តជួយអ៊ុយក្រែនឲ្យប្រឈមទប់នឹងរុស្ស៊ីផង។ ជាងពេលណាៗទាំងអស់ សង្រ្គាមរុស្ស៊ីឈ្លានពានអ៊ុយក្រែនបានផ្តល់មេរៀន និងដាស់បស្ចិមលោកឲ្យដឹងពីចំណុចខ្សោយរបស់ខ្លួន ពិសេសក្នុងវិស័យថាមពល និងវិស័យការពារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ