អ្នកជំនាញព្រមានពីដែនកំណត់នៃការផ្គត់ផ្គង់សព្វាវុធអាមេរិកសម្រាប់សង្រ្គាមអ៊ុយក្រែន
អាមេរិកទំនងលែងអាចផ្តល់សព្វាវុធទំនើបៗ ដល់កងទ័ពអ៊ុយក្រែន ដូចដែលអាមេរិកកំពុងធ្វើ រហូតដល់សព្វថ្ងៃ។ តាមអ្នកជំនាញមកពីវិទ្យាស្ថានសម្រាប់យុទ្ធសាស្រ្ត និងការសិក្សាអន្តរជាតិ ហៅកាត់ជាភាសាបារាំង CSIS ចំនួនអាវុធក្នុងស្តុករបស់អាមេរិកបានធ្លាក់ចុះ ដល់ដែនកំណត់មួយ ដែលតម្រូវឲ្យអាមេរិកត្រូវតែគិតគូរ ពីផែនការ និងការផលិត ដើម្បីបំពេញបង្រ្គប់សព្វាវុធក្នុងឃ្លាំងឡើងវិញ។
ចុះផ្សាយនៅថ្ងៃ៖
ស្តាប់ - ០២:៤៧
អាមេរិកជាប្រទេសផ្តល់ជំនួយយោធាធំជាងគេបង្អស់សម្រាប់អ៊ុយក្រែន ចាប់តាំងពីផ្ទុះសង្រ្គាមរុស្ស៊ីឈ្លានពានអ៊ុយក្រែន។ នេះជាអ្វីដែលគ្មានអ្នកណាអាចប្រកែកបានទេ។ នៅក្នុងសង្រ្គាមអ៊ុយក្រែន ជាង ៧ខែមកនេះ អាមេរិកបានប្រកាសផ្តល់ជំនួយយោធា ច្រើនជាង ១៦,៨ពាន់លានដុល្លារសម្រាប់ជួយកងទ័ពអ៊ុយក្រែន។
តាមតួលេខរបស់មន្ទីរបញ្ចកោន អាមេរិកបានបញ្ជូន គ្រាប់ផ្លោង ប្រមាណ ៨៨០ ០០០គ្រាប់ទៅឲ្យទីក្រុងកៀវ ដែលស្មើនឹង៣ភាគ៤នៃចំនួន គ្រាប់ដែលសមាជិករបស់អូតង់ទាំងអស់រួមគ្នា ផ្តល់ទៅជួយអ៊ុយក្រែន។ អាមេរិកនៅបានបញ្ជូនសព្វាវុធទំនើបៗផ្សេងទៀតដូចជា មីស៊ីលប្រឆាំង រថក្រោះ បាញ់ពីលើស្មា Javelin ចំនួន ៨៥០០ដើម ដែលកងទ័ពអ៊ុយក្រែននិយមប្រើ និងធ្លាប់យកឈ្នះ ទប់ស្កាត់មិនឲ្យរថក្រោះរុស្ស៊ី រំកិលចូលទីក្រុងកៀវ កាលពីដើមដំបូងនៃសង្រ្គាម។ ចំនែកប្រព័ន្ធមីស៊ីលHimars របស់អាមេរិកក៏កំពុងជួយឲ្យកងទ័ពអ៊ុយក្រែន មានប្រៀបលើកងទ័ពរុស្ស៊ី នៅក្នុងសមរភូមិប្រយុទ្ធនៅតំបន់ខាងកើតអ៊ុយក្រែន។
សព្វថ្ងៃនេះ អាមេរិកបានបញ្ចេញប្រមាណ ១ភាគ៣នៃសព្វាវុធទំនើបៗ ដូចជា មីស៊ីលបាញ់ពីលើស្មា Javelin Stinger និងប្រព័ន្ធមីស៊ីល Himars សម្រាប់ជួយកងទ័ពអ៊ុយក្រែន។ ការចាក់បង្ហូរសព្វាវុធទៅជួយអ៊ុយក្រែន បានធ្វើឲ្យសព្វាវុធក្នុងស្តុករបស់អាមេរិកកាន់តែខើច និងធ្លាក់ចុះដល់កម្រិតមួយ ដែលធ្វើឲ្យអាមេរិកចាប់ផ្តើមគិតគូររកមធ្យោបាយ មកបំពេញស្តុកឡើងវិញ។
សម្រាប់ អ្នកជំនាញ មកពីវិទ្យាស្ថានយុទ្ធសាស្រ្ត និងសិក្សាអន្តរជាតិ លោក Mark Cancian សង្រ្គាមអ៊ុយក្រែនបានធ្វើឲ្យអាមេរិករៀនសូត្រ ដឹងថា តម្រូវការអាវុធ សម្រាប់សង្រ្គាមរវាងប្រទេសមហាអំណាចគឺមានចំនួនច្រើនជាង បរិមាណអាវុធដែលគេស្តុកទុកក្នុងឃ្លាំង។
លោកស្រីLaura Cooper មន្រ្តីទទួលបន្ទុករុស្ស៊ី អ៊ុយក្រែននៅក្រសួងការពារជាតិអាមេរិកបាននិយាយថា អាមេរិកនឹងនៅតែបន្តផ្តល់ជំនួយយោធាដល់អ៊ុយក្រែន ឲ្យបានយូរបំផុត។ សម្រាប់អ្នកជំនាញខាងលើ អាមេរិកទំនងមិនបញ្ចេញសព្វាវុធអស់ពីស្តុក ដើម្បីជួយអ៊ុយក្រែននោះទេ។ ដើម្បីអាចបន្ត ជួយអ៊ុយក្រែន អាមេរិកអាចបញ្ជូនសព្វាវុធចាស់ៗ។ មួយវិញទៀត ដើម្បីបំពេញអាវុធក្នុងស្តុកឲ្យដល់បរិមាណ ដែលអាមេរិកធ្លាប់មាន នៅមុនចាប់ផ្តើមសង្រ្គាមអ៊ុយក្រែន អាមេរិកត្រូវការជំរុញក្រុមហ៊ុន ឧស្សាហកម្មឲ្យផលិតអាវុធឡើងវិញ បន្ទាប់ពីវិស័យនេះធ្លាក់ថយចុះសកម្មភាពសឹងដល់សូន្យ នៅក្រោយចប់សង្រ្គាមត្រជាក់។
នៅខែ ឧសភា អាមេរិកធ្លាប់បានបញ្ជាទិញអាវុធ តម្លៃ ៣៥០លានដុល្លារ ពីក្រុមហ៊ុនផលិតអាវុធដ៏ល្បីឈ្មោះ Lockheed Martin Raytheon។ ប៉ុន្តែ អ្នកជំនាញបានវាយតម្លៃហើយថា ទោះអាមេរិក បញ្ចេញមូលនិធិដើម្បីជំរុញ ការផលិតសព្វាវុធ អាមេរិកត្រូវការពេលវេលាជាច្រើនឆ្នាំ ដើម្បីបង្កើតចំនួនស្តុកសព្វាវុធឲ្យច្រើនដូចដើមឡើងវិញ។ ជាក់ស្តែង អាមេរិកបានផ្តល់មីស៊ីលសម្រាប់ប្រព័ន្ធ Himars ចំនួន ៨ពាន់ដើម ទៅឲ្យអ៊ុយក្រែន ប៉ុន្តែ ក្រុមហ៊ុន Lockheed Martin អាចផលិតមីស៊ីលប្រភេទនេះ តែ ៥ពាន់ដើមប៉ុណ្ណោះ ក្នុងមួយឆ្នាំ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ