ស្នងការអឺរ៉ុបស្នើឲ្យមានកញ្ចប់ថវិកាដើម្បីទិញអាវុធរួមគ្នា
សព្វាវុធធ្លាក់ថយចុះ នៅក្នុងឃ្លាំង ដោយសារត្រូវជួយអ៊ុយក្រែន នៅក្នុងសង្រ្គាមឈ្លានពានរបស់រុស្ស៊ី។ ដើម្បីបំពេញឃ្លាំងអាវុធរបស់ខ្លួនឡើងវិញ ស្នងការអឺរ៉ុប លោកThierry Breton នៅថ្ងៃអង្គារ ម្សិលមិញ បានលើកសំណើ ទៅកាន់ប្រទេសសមាជិកសហភាពអឺរ៉ុប ឲ្យបង្កើតកញ្ចប់ថវិកា ៥០០លានអឺរ៉ូ សម្រាប់ទិញអាវុធរួមគ្នា ក្នុងតម្លៃថោក។ សម្រាប់ស្នងការអឺរ៉ុប នៅក្នុងកាលៈទេសៈ ដែលភ្លើងសង្រ្គាមរបស់រុស្ស៊ី នៅអ៊ុយក្រែនកំពុងឆាបឆេះ នៅមាត់ទ្វារផ្ទះរបស់ខ្លួនយ៉ាងដូច្នេះ អឺរ៉ុបចាំបាច់ត្រូវតែពង្រឹងស្តុកសព្វាវុធជាបន្ទាន់ ដើម្បីទុកការពារខ្លួន។
ចុះផ្សាយនៅថ្ងៃ៖
ស្តាប់ - ០៣:០១
អឺរ៉ុបកំពុងបោះជំហានសំខាន់ នៅក្នុងផ្នែកការពារជាតិ។ ថ្លែងនៅក្នុងសន្និសីទកាសែត កាលពីថ្ងៃអង្គារ ស្នងការអឺរ៉ុប លោកThierry Breton ទទួលបន្ទុកផ្នែកទីផ្សារក្នុងស្រុក (ឧស្សាហកម្ម អវកាស ឌីជីថល និងការពារជាតិ) បានលើកសំណើឲ្យគេបង្កើតកញ្ចប់ថវិកា៥០០លានអឺរ៉ូ ដើម្បីជួយសម្រួលការទិញសព្វាវុធរួមគ្នារបស់ប្រទេសសមាជិក។
តាមស្នងការអឺរ៉ុប ប្រទេសសមាជិកអឺរ៉ុបបានដកអាវុធសឹងអស់ពីក្នុងឃ្លាំង ដែលមានតាំងពីគ្រាប់ ផ្លោង កាំភ្លើងធុនធំ ធុនតូច ប្រព័ន្ធការពារដែនអាកាស មីស៊ីលប្រឆាំងរថក្រោះ ឬរថពាស ដើម្បីយកទៅជួយអ៊ុយក្រែន។
នៅ៤ថ្ងៃក្រោយរុស្ស៊ីចូលធ្វើសង្រ្គាមឈ្លានពានអ៊ុយក្រែន មេដឹកនាំរបស់ប្រទេសសមាជិកសហភាព អឺរ៉ុប ទាំង ២៧ បានសម្រេចចិត្តជាប្រវត្តិសាស្រ្ត ផ្តល់សព្វាវុធដល់កងទ័ពអ៊ុយក្រែន ក្នុងទំហំទឹកប្រាក់ ៤៥០លានអឺរ៉ូ។ ជំនួយសព្វាវុធរបស់អឺរ៉ុបសម្រាប់អ៊ុយក្រែននៅតែកើនឡើងជាប់ជានិច្ច។ នៅថ្ងៃចន្ទ ថ្នាក់ដឹកនាំអឺរ៉ុបបានយល់ព្រមឲ្យគេបើកប្រាក់៥០០លានអឺរ៉ូ ពីមូលនិធិអឺរ៉ុប ដើម្បីសន្តិភាពសម្រាប់យកទៅផ្គត់ផ្គង់ការទិញសព្វាវុធឲ្យអ៊ុយក្រែន។
ការបញ្ចេញសព្វាវុធសម្រាប់ជួយកងទ័ពអ៊ុយក្រែន បានធ្វើឲ្យអាវុធក្នុងឃ្លាំងរបស់ប្រទេសសមាជិកអឺរ៉ុបធ្លាក់ថយចុះច្រើន ដែលនេះជាប្រការមិនល្អ និងដែលត្រូវគេបំពេញបន្ថែមមកវិញជាបន្ទាន់។ សម្រាប់ស្នងការអឺរ៉ុប ដោយមើលទៅលើស្តុកសព្វថ្ងៃ របស់ប្រទេសសមាជិកអឺរ៉ុប គេត្រូវប្រញាប់រួសរាន់បន្ទាន់ ដើម្បីអនុម័តកញ្ចប់ថវិកា។ អាទិភាពចំបងនៃមូលនិធិថ្មីនេះ គឺការទិញ មីស៊ីល បាញ់ចេញពីលើស្មា មីស៊ីលប្រឆាំងរថក្រោះ និងគ្រាប់កាំភ្លើងធំ។ ដោយទិញសព្វាវុធថ្មី សម្រាប់បំពេញស្តុកក្នុងឃ្លាំងអាវុធរបស់ខ្លួនឡើងវិញ ប្រទេសសមាជិកអឺរ៉ុបនឹងអាចមានប្រព័ន្ធមីស៊ីលទំនើបថ្មី ហើយនិងមានលទ្ធភាព ជំនួសសព្វាវុធចាស់ៗ ដែលសល់តាំងពីសម័យសហភាពសូវៀត។
ទៅតាមសំណើរបស់ស្នងការអឺរ៉ុប មូលនិធិថ្មីនឹងអាចជួយ ក្នុងពេលតែមួយ ប្រទេសយ៉ាងហោច ៣ ដែលចង់ទិញសព្វាវុធរួមគ្នា ក្នុងតម្លៃថោក ដើម្បីកាត់បន្ថយការចំណាយយោធា ដែលចេះតែកើនឡើង ដោយសារសង្រ្គាមអ៊ុយក្រែន។
មានជាលើកទី១ក្នុងប្រវត្តិសហភាពអឺរ៉ុប កញ្ចប់ថវិកា៥០០លានអឺរ៉ូ សម្រាប់រយៈពេល២ឆ្នាំ នឹងទៅបំពេញបន្ថែម មូលនិធិការពារជាតិរបស់អឺរ៉ុប ចំនួន ៧,៩ពាន់លានអឺរ៉ូ ដែលសហភាពអឺរ៉ុបបានបោះឆ្នោតអនុម័តកាលពីឆ្នាំ មុន នៅក្រោមការពុះពារ ជំរុញ របស់ប្រទេសបារាំង។
សម្រាប់ស្នងការអឺរ៉ុប លោក Thierry Breton ដែលជាអ្នកនយោបាយបារាំង អឺរ៉ុបបានកាត់បន្ថយសព្វាវុធ និងវិនិយោគតិចតួចទៅលើវិស័យកងទ័ព បើប្រៀបធៀបនឹងប្រទេសផ្សេងទៀត ដូចជាចិន អាមេរិក រុស្ស៊ី ឥណ្ឌា ជាដើម។ នៅរយៈពេល២០ឆ្នាំនេះ ដោយសារតែមិនអាចគោរពតាមគោលដៅ ក្នុងការបង្កើនថវិកាកងទ័ពឲ្យបាន២%នៃផលិតផលក្នុងស្រុកសរុប ឱនភាពថវិកាកងទ័ព របស់អឺរ៉ុប មានចំនួនសរុប ១៣០ម៉ឺនលាន (១៣០០ពាន់លានអឺរ៉ូ)។ ផលវិបាកគឺឃ្លាំងស្តុកអាវុធរបស់អឺរ៉ុប ក៏ធ្លាក់ខ្សត់ខ្សោយទៅតាមនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ