ជក់នឹងបណ្តាញសង្គម អាចប៉ះពាល់ដល់សុខភាពយ៉ាងណា ?
ចុះផ្សាយនៅថ្ងៃ៖
ស្តាប់ - ០៦:៥១
“Instagram ជួយក្មេងដែលកំពុងជួបការលំបាក និងធ្វើឱ្យក្មេងជំទង់់មានអារម្មណ៍ប្រសើរឡើង” នេះជាអ្វីដែលស្ថាបនិកប្រព័ន្ធសង្គម លោក Adam Mosseri បានអះអាងនៅចំពោះមុខសភាអាមេរិក កាលពីខែធ្នូឆ្នាំ២០២១។ សេចក្តីប្រកាសនេះធ្លាក់មកជួនចំពេលដែលកាសែតអាមេរិក Wall Street Journal បានទម្លាយរបាយការណ៍ផ្ទៃក្នុងរបស់ក្រុមហ៊ុនហ្វេសប៊ុកដែលសន្និដ្ឋានថា ប្រព័ន្ធសង្គមInstagram ជាសាខារបស់ខ្លួន ផះផលវិបាកមិនល្អដល់សុខភាពរបស់យុវជន។តើចាប់ពីពេលណា និងកំរិតណា ដែលការប្រើប្រាស់ប្រព័ន្ធសង្គមក្លាយជាថ្នាំពុល និងជាគ្រឿងញៀន ? តើគេអាចស្វ័យត្រួតពិនិត្យការលេងប្រព័ន្ធសង្គមបានដោយរបៀបណា ?
ប្រព័ន្ធសង្គមអាចប៉ះពាល់ដល់សុខភាព និងអាកប្បកិរិយារបស់ក្មេងនិងក្មេងជំទង់ខ្លាំងណាស់ គឺជាគ្រោះថ្នាក់ដែលមានប្រហាក់ប្រហែលនឹងផលវិបាកបង្កឡើងដោយសុរា (ជាតិអាល់កុល) ដែរ។ ប៉ុន្តែល្បែងមួយនេះមិនត្រូវបានហាមឃាត់ដោយច្បាប់ ដើម្បីការពារកុមារនិងក្មេងទេ។ សំឡេងព្រួយបារម្ភ នៅចំពោះសង្គមងប់នឹងការតាមដានប្រព័ន្ធសង្គមបានលាន់ឡើង នៅសហរដ្ឋអាមេរិក បារាំង។
កាលពីថ្ងៃទី ១៧កញ្ញា២០២១ អ្នកជំនាញអាមេរិកខាងបច្ចេកវិទ្យានិងប្រព័ន្ធឃោសនា ដេរិក ធំសុំ Derek Thompson បានចេញផ្សាយអត្ថបទមួយ ក្នុងកាសែត ក្រោមចំណងជើងថា ប្រព័ន្ធសង្គមជាគ្រឿងស្រវឹងស្មារតី។ បន្ទាប់ពីលោក ទស្សនវិទូបារាំង លោក បានចេញផ្សាយអត្ថបទរបស់លោកស្តីពីជំងឺប្រព័ន្ធសង្គម ថា ការញៀនបណ្តាញសង្គមបានក្លាយជាបញ្ហាបុគ្គលទៅបញ្ហាគ្រួសារ និងជាបញ្ហាសង្គមហើយ។
តើការជក់ញៀនបណ្តាញសង្គម ប៉ះពាល់ដល់សុខភាពយ៉ាងណា ? សូមស្តាប់ប្រសាសន៍របស់អ្នកស្រីវេជ្ជបណ្ឌិត Sabine Duflo សាប៊ីន ឌុយហ្លូ គ្រូពេទ្យជំនាញចិត្តវិទ្យាគ្រួសារ ធ្វើការនៅផ្នែកសង្គ្រោះបន្ទាន់ក្មេងជំទង់មានវិបត្តិផ្លូវចិត្ត នៃមណ្ឌលសុខភាពសាធារណៈ Georges Daumezon ក្នុងស្រុក Fleury les Aubraisប្រទេសបារាំង។
តើការជក់មើល ឬលេងហ្វេសប៊ុក ឬបណ្តាញសង្គមទូទៅ នឹងធ្វើឱ្យប៉ះពាល់ដល់សុខភាពខួរក្បាល ?
Sabine Duflo ៖ “មិនមែនត្រឹមតែជាការសម្គាល់របស់ខ្ញុំនៅមន្ទីរពេទ្យមួយទេ ការសិក្សាវិភាគជាលក្ខណៈវិទ្យាសាស្ត្រក៏បានបង្ហាញថា ការលេងប្រព័ន្ធសង្គម នឹងធ្វើឱ្យក្មេងកាន់តែមានអារម្មណ៍ឯកា។ ហើយបើក្មេងមាននិស្ស័យ ឬអាការៈថប់បារម្ភស្រាប់ អារម្មណ៍នេះនឹងកាន់តែលេចធ្លោខ្លាំងនិងធ្ងន់ធ្ងរឡើង។ បើជាអ្នកធ្លាប់មានវិបត្តិផ្លូវចិត្ត ជំងឺធ្លាក់ទឹកចិត្ត អាការៈជំងឺនោះនឹងកាន់តែធ្ងន់។ បានន័យថា ធ្លាប់ឈឺអ្វីជំងឺនោះកាន់តែធ្ងន់ធ្ងរ។ ប្រព័ន្ធសង្គមជាល្បែងងាយស្រួល ចូលលេងពេលណាក៏បាន អផ្សុក ធុនទ្រាញ់ ក៏ចូលលេងដើម្បីឱ្យពេលវេលាទៅលឿន។ ហេតុដូច្នេះហើយបានជាល្បែងនេះ ផ្តល់ផលល្អ នៅពេលភ្លាមដំបូង ព្រោះវាបានធ្វើឱ្យយើងភ្លេចទុកកង្វល់ ឬបង្វែរអារម្មណ៍ទៅណាផ្សេង ប៉ុន្តែសម្រាប់ពេលយូរនិងវែងឆ្ងាយទៅ ល្បែងប្រព័ន្ធសង្គមនឹងផ្តល់ឥទ្ធិពលបញ្ច្រាសវិញ។ នៅពេលបានចូលលេងយូរ គេនឹងជក់លេងយូរជាងការគិតពីដំបូង។ ពេលឈប់លេងអារម្មណ៍កណ្តោចកណ្តែង មួរហ្មង នឿយហត់ទាំងអម្បាលម៉ានដែលមានពីពេលមុន នឹងវិលត្រលប់មកវិញទាំងអស់។ ហើយយើងនឹងមានអារម្មណ៍កាន់តែមិនល្អ កាន់តែឯកា”។
គ្រោះថ្នាក់នៃការលេងនិងញៀនប្រព័ន្ធសង្គមចំពោះសុខភាពខួរក្បាល អាចមានពាក់ព័ន្ធនឹងអាយុរបស់អ្នកប្រើប្រាស់ដែរឬទេ ?
Sabine Duflo ៖ “ចាសច្បាស់ណាស់ ! នៅក្នុងខួរក្បាលរបស់មនុស្ស មានផ្នែកមួយមានតួនាទីជាអ្នកសម្រេចបំណងរបស់ខ្លួន។ ខួរក្បាលអាចបំពេញតួនាទីបានត្រឹមត្រូវនិងពេញលេញនៅពេលចូលដល់វ័យ ២០-២៥ឆ្នាំ។ ដូច្នេះនៅក្នុងវ័យក្មេង វ័យជំទង់ ការគិតរបស់ក្មេងនៅ ទន់ទ្រាយណាស់ ដូចពាក្យចាស់លោកពោលថា នៅក្មេងសេចក្តីពុំទាន់ចេះគិតយ៉ាងដូច្នោះ។ ខួរក្បាលក្មេងពិតជាមិនអាចបំពេញតួនាទីប្រតិបត្តិបានល្អទេ នៅចំពោះចំណង់ និងតុណ្ហាដ៏ច្រើនសន្ធឹកសន្ធាប់នោះ”។
តើអ្វីទៅរោគសញ្ញាបញ្ជាក់ថាអ្នកប្រើប្រាស់ប្រព័ន្ធសង្គមជ្រុលហួសហេតុ ?
Sabine Duflo ៖ “ងាយទេសម្គាល់ទេ ! គឺនៅពេលណាដែលយើងលែងធ្វើអ្វីដែលធ្លាប់ធ្វើមុន មួយភាគ ឬទាំងស្រុង។ លែងសូវចេញក្រៅ ហើយចំណាយពេលវេលាកាន់តែតិចទៅៗ ជាមួយក្រុមគ្រួសារ ជាពិសេសជាមួយ កូនចៅប្តីប្រពន្ធ។ មានវិបត្តិដំណេក (គេងមិនសូវលក់)។ មានវិបត្តិអារម្មណ៍ ឆាប់មួរម៉ៅ ឆាប់ខឹង លែងសូវចូលសង្គម អឿខ្លាំង គិតថាខ្លួនគ្រាន់បើជាងគេ ... ទាំងអស់នេះហើយ ជាអាការៈសញ្ញាដែលអាចដាស់ប្រាប់យើងថា បុគ្គលនោះកំពុងពុល/ញៀនជំងឺប្រព័ន្ធសង្គម ឬនិយាយយ៉ាងសាមញ្ញថា ងប់ប្រព័ន្ធសង្គមជ្រុលហួសហេតុ។”
ជាទូទៅបុគ្គលអ្នកជក់ប្រព័ន្ធសង្គមមិនបានដឹងខ្លួនដោយខ្លួនឯង បើគ្មានអ្នកនៅជិតជាអ្នកសម្គាល់ និងដាស់តឿននោះ។ តើមានទិកនិកអ្វី សម្រាប់ ស្វ័យគ្រប់ខ្លួន នៅពេលលេងប្រព័ន្ធសង្គម ដើម្បីកុំឱ្យលង់ជ្រុលហួសហេតុ ទេ ?
Sabine Duflo ៖ “ប្រព័ន្ធសង្គមត្រូវបានបង្កើតឡើង ដោយមានកម្មវត្ថុជំរុញឱ្យអ្នកប្រើប្រាស់ តាមដាន និងនៅអនឡាញ យូរបំផុតតាមដែលអាចធ្វើទៅបាន។ គ្រប់ប្រព័ន្ធសង្គមលើអ៊ីនធ័រនែត មានគោលការណ៍តែមួយដូចគ្នា គឺ សន្សំសំចៃអារម្មណ៍ មានន័យថា គេមានបញ្ចូលកម្មវិធីទាក់អារម្មណ៍ ធ្វើមិនឱ្យអ្នកប្រើប្រាស់ធុន ហើយនៅបន្តតាមដានលើប្រព័ន្ធសង្គមណាមួយ បានយូរម៉ោង។ ជាការពង្វក់អារម្មណ៍ឱ្យជក់ ឱ្យញៀន ហេតុដូច្នេះគេពិតជាពិបាកគ្រប់គ្រងខ្លួនឯងណាស់ និងតម្រូវឱ្យមានជំនួយដាស់សតិពីអ្នកផ្សេងនោះ។ ហើយនៅពេលយើងចាប់ដឹងថាយើងលេងប្រព័ន្ធសង្គមច្រើនជ្រុល នោះមានន័យថាយើងកំពុងជាពីភាពងប់ញៀនហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ