យូណេស្កូចាត់ទុកគណៈកម្មាធិការ ICC-Angkorជាគំរូ និងជោគជ័យដែលត្រូវទទួលជំនួយ១០ឆ្នាំបន្តទៀត
ចុះផ្សាយនៅថ្ងៃ៖
តាំងពីបង្កើតឡើងនៅឆ្នាំ ១៩៩៣ នៅក្រោយសន្និសីទអន្តរជាតិលើកទី១ស្តីពីអង្គរ នៅទីក្រុងតូក្យូ គណៈកម្មាធិការអន្តរជាតិសម្របសម្រួលកិច្ចគាំពារនិងអភិវឌ្ឍន៍តំបន់អង្គរ ហៅកាត់ថា អាយស៊ីស៊ី-អង្គរ (ICC-Angkor) មានអាយុ៣០ឆ្នាំគត់។ ក្នុងរយៈពេល៣០ឆ្នាំ ទឹកប្រាក់ ៦០០លានដុល្លារត្រូវបានចំណាយសម្រាប់ការជួសជុល អភិរក្សតំបន់អង្គរ។ មានសមាជិកចូលរួមពីប្រទេសជាង៣០ និងមានអង្គការអន្តរជាតិជាដៃគូចូលរួមផ្សេងទៀត គណៈកម្មាធិការអាយស៊ីស៊ី-អង្គរ (ICC-Angkor)បានក្លាយជាគំរូគេនៅក្នុងចំណោមគម្រោងថែរក្សាការពារនិងអភិរក្សសម្បត្តិបេតិកភណ្ឌរបស់យូណេស្កូ។ នៅទីស្នាក់ការកណ្តាលរបស់អង្គការយូណេស្កូនៅទីក្រុងប៉ារីស សន្និសីទអន្តររដ្ឋាភិបាលស្តីពីអង្គរបានប្រារព្ធខួប៣០ឆ្នាំនៃវត្តមានរបស់គណៈកម្មាធិការអន្តរជាតិសម្របសម្រួលកិច្ចគាំពារនិងអភិវឌ្ឍន៍តំបន់អង្គរ និងសំបូរពៃ្រគុក ក្រោមព្រះរាជវត្តមានរបស់ព្រះករុណាព្រះបាទសម្តេចព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា៕
