អាជ្ញាធរជាតិអប្សរា រៀបចំព្រឹត្តិការណ៍ «រម្លឹកគុណអង្គរ» រយៈពេល៥ថ្ងៃ
នៅលើទឹកដីអង្គរខេត្តសៀមរាប អាជ្ញាធរជាតិអប្សរា បានរៀបចំព្រឹត្តិការណ៍សាសនាដ៏ធំមួយជាលើកដំបូងបង្អស់ ដើម្បីរម្លឹកគុណអង្គរ។ ព្រឹត្តិការណ៍នេះ ចាប់ពីថ្ងៃអាទិត្យទី១២ខែធ្នូនេះ រហូតដល់ថ្ងៃព្រហស្បតិ៍ទី១៦ខែធ្នូខាងមុខ។ បើតាមលោក ឡុង កុសល អ្នកនាំពាក្យអាជ្ញាធរជាតិអប្សរា ព្រឹត្តិការណ៍ដែលមានរយៈពេល៥ថ្ងៃនេះ រៀបចំធ្វើដើម្បីរម្លឹកគុណដល់បុព្វការីជននិងព្រះមហាក្សត្រខ្មែរជំនាន់មុន ដែលបានកសាងសំណង់ប្រាសាទជាច្រើនលើទឹកដីអង្គរ ហើយប្រាង្គប្រាសាទបុរាណទាំងអស់នេះ បានរួមចំណែកផ្ដល់ផលប្រយោជន៍ជាច្រើនដល់សង្គមនិងសេដ្ឋកិច្ចជាតិ នាពេលបច្ចុប្បន្ន។
ចុះផ្សាយនៅថ្ងៃ៖
ស្តាប់ - ០២:៣០
«ព្រឹត្តិការណ៍រម្លឹកគុណអង្គរ» គឺជាពិធីសាសនាដ៏ធំដំបូងគេបង្អស់ ដែលអាជ្ញាធរជាតិអប្សរាផ្ដួចផ្ដើមគំនិតរៀបចំធ្វើឡើង ក្នុងបំណងរម្លឹកគុណបុព្វបុរសខ្មែរ។ បុព្វបុរសខ្មែរ ដែលបានកសាងសំណង់ប្រាសាទដ៏ប្រណិតជាង១០០ប្រាសាទនៅតំបន់អង្គរ។ ប្រាង្គប្រាសាទទាំងអស់នេះ ថ្វីដ្បិតតែមានវ័យចំណាស់ ប៉ុន្តែបានរួមចំណែកផ្ដល់អត្ថប្រយោជន៍ជាច្រើនដល់សង្គមជាតិកម្ពុជា ទាំងក្នុងផ្នែកសិក្សាស្រាវជ្រាវ ប្រវត្តិសាស្ត្រ និងសេដ្ឋកិច្ចជាតិ។
លោក ឡុង កុសល អ្នកនាំពាក្យអាជ្ញាធរជាតិអប្សរា បានគូសបញ្ជាក់ថា នៅក្នុងរយៈពេល៥ថ្ងៃនៃពិធីរម្លឹកគុណអង្គរនេះ អាជ្ញាធរជាតិអប្សរានឹងដាក់បង្ហាញពីសមិទ្ធផលការងារទូទៅដែលសម្រេចបាននៅក្នុងរយៈពេល២៩ឆ្នាំកន្លងមក ក្នុងបេសកកម្មការពារ និងអភិរក្សប្រាង្គប្រាសាទ ដែលជាមរតកដ៏សំខាន់សម្រាប់ប្រជាជាតិកម្ពុជា និយាយដោយឡែក និងសម្រាប់មនុស្សជាតិទាំងមូល និយាយជារួម។
សាធារណជនដែលចាប់អារម្មណ៍ អាចចុះឈ្មោះដើម្បីធ្វើទស្សនកិច្ចស្វែងយល់នៅតាមការដ្ឋានជួសជុលប្រាសាទនានា ដែលអាជ្ញាធរជាតិអប្សរាកំពុងដំណើរការ ចាប់ពីថ្ងៃទី១៤ដល់ថ្ងៃទី១៦ខែធ្នូ។ បើតាមលោក ឡុង កុសល ដំណើរទស្សនកិច្ចនេះ ជាឱកាសដ៏កម្រដែលសាធារណជនទូទៅ អាចឈ្វេងយល់កាន់តែច្បាស់ពីកិច្ចការងាររបស់អាជ្ញារជាតិអប្សរា ក្នុងការអភិរក្ស និងអភិវឌ្ឍរមនីយដ្ឋានអង្គរប្រកបដោយនិរន្ដរភាព។
ជាផ្នែកមួយទៀតនៃព្រឹត្តិការណ៍រម្លឹកគុណអង្គរនេះ អាជ្ញាធរជាតិអប្សរា សហការជាមួយដៃគូពាក់ព័ន្ធ ក៏ដូចជាស្ថាប័នឯកជន នឹងរៀបចំបង្ហាញពិធីសាសនា ការសម្ដែងសិល្បៈ ល្ខោនបាសាក់ ល្ខោនស្បែកធំ ព្រមទាំងពិព័រណ៍ស្នាដៃកូនខ្មែរ និងការរាប់បាត្រព្រះសង្ឃ។ កម្មវិធីទាំងអស់នេះ រៀបចំធ្វើពីថ្ងៃទី១២ដល់ថ្ងៃទី១៦ខែធ្នូ នៅខាងមុខប្រាសាទអង្គរវត្ត បរិវេណខាងមុខប្រាសាទភ្នំបាខែង និងព្រះលានជល់ដំរី។ បើតាមការគូសបញ្ចាក់ពីអាជ្ញាធរជាតិអប្សរា ព្រឹត្តិការណ៍រម្លឹកគុណអង្គរនៅឆ្នាំ២០២១នេះ រៀបចំធ្វើជាលក្ខណៈសាកល្បង ហើយគ្រោងរៀបចំឱ្យបានទៀងទាត់ ជារៀងរាល់ឆ្នាំ នាឆ្នាំបន្តបន្ទាប់ទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ