អូស្ត្រាលី ប្រកាសចូលរួមជាមួយអាមេរិក ជប៉ុន និងឥណ្ឌាក្នុងសមយុទ្ធដ៏ធំមួយ
ចុះផ្សាយនៅថ្ងៃ៖
ស្តាប់ - ០៦:៥៥
ខណៈកំពុងមានភាពតានតឹងខ្លាំងជាមួយចិន ប្រទេសអូស្ត្រាលីបានប្រកាសចូលរួមសមយុទ្ធទ័ពជើងទឹករួមគ្នាមួយជាមួយអាមេរិក ជប៉ុន និងឥណ្ឌា។ វត្តមានរបស់អូស្ត្រាលីនេះ បានទៅបង្គ្រប់ជា ៤ ប្រទេសក្នុងបក្សសម័្ពន្ធចតុភាគីដែលគេហៅជាភាសាអង់គ្លេសថា “Quad” និងដែលគេមើលឃើញថាជាបក្សសម័្ពន្ធបង្កើតឡើងដើម្បីប្រឆាំងទល់នឹងចិនដែលកំពុងមានឥទ្ធិពលកើនឡើងជាលំដាប់។
អ្វីជាសមយុទ្ធបក្សសម្ព័ន្ធចតុភាគី?
សមយុទ្ធបក្សសម្ព័ន្ធចតុភាគី គឺជាការធ្វើសមយុទ្ធជើងទឹករួមគ្នារវាងប្រទេសជាដៃគូយុទ្ធសាស្ត្រចំនួនបួនរួមមាន៖ សហរដ្ឋអាមេរិក ជប៉ុន ឥណ្ឌា និងចុងក្រោយគេគឺប្រទេសអូស្ត្រាលី។ អូស្ត្រាលី ដែលយើងដឹងស្រាប់ហើយថាជាប្រទេសមួយដែលកំពុងតែមានបញ្ហារកាំរកូសខ្លាំងជាមួយប្រទេសចិននៅប៉ុន្មានខែថ្មីៗនេះ។
សមយុទ្ធទ័ពជើងទឹករវាងប្រទេសទាំង៤ខាងលើ “Quad” ត្រូវបានគេឲ្យឈ្មោះថា “សមយុទ្ធម៉ាឡាបា” (Exercise Malabar)។ ដើមឡើយសមយុទ្ធម៉ាឡាបានេះជាសមយុទ្ធទ្វេភាគីតែរវាងសហរដ្ឋអាមេរិកនិងឥណ្ឌាតែប៉ុណ្ណោះ និងបានប្រព្រឹត្តធ្វើជារៀងរាល់ឆ្នាំចាប់ពីឆ្នាំ ១៩៩២ មកម្ល៉េះ។
ក្រោយមកទៀត នៅក្នុងឆ្នាំ ២០១៥ ជប៉ុនបានក្លាយជាសមាជិកថ្មី និងជាដៃគូយុទ្ធសាស្ត្រអចិន្ត្រៃយ៍ម្នាក់បន្ថែមទៀត។ ចំណែក អ្នកដែលចូលរួមក្នុងបក្សសម្ព័ន្ធនេះមិនអចិន្ត្រៃយ៍មានប្រទេសចំនួនពីរគឺអូស្ត្រាលី និងសិង្ហបុរី។
សមយុទ្ធទ័ពជើងទឹកប្រចាំឆ្នាំ “ម៉ាឡាបា” ដែលបានផ្តើមសកម្មភាពតាំងពីឆ្នាំ ១៩៩២ នេះ ជាទូទៅ រួមមានសកម្មភាពយោធាចម្រុះតែម្តង រាប់ចាប់ពីប្រតិបត្តិការប្រយុទ្ធពីនាវាដឹកយន្តហោះតាមរយៈលំហាត់រួមគ្នានៃប្រតិបត្តិការដែនសមុទ្រ។
សមយុទ្ធលើកមុនៗរបស់បក្សសម្ព័ន្ធនេះ ត្រូវបានរៀបចំធ្វើឡើងនៅមហាសមុទ្រឥណ្ឌា ក៏ដូចជានៅឯឆ្នេរសមុទ្រជប៉ុន តំបន់ជុំវិញដែនដីកោះប៉ាស៊ីហ្វិកដែលគ្រប់គ្រងដោយអាមេរិកគឺនៅកោះហ្គាម និងនៅសមុទ្រហ្វីលីពីន។
សមយុទ្ធទ័ពជើងទឹករបស់បក្សសម្ព័ន្ធចតុភាគីឆ្នាំ២០២០
សម្រាប់ឆ្នាំ២០២០នេះ ប្រទេសដៃគូយុទ្ធសាស្ត្រទាំងបួននឹងធ្វើសមយុទ្ធទ័ពជើងទឹករួមគ្នានៅមហាសមុទ្រឥណ្ឌា និងនៅតែវិច្ឆិកាក្រោយ។ យ៉ាងណាក៏ដោយ មកទល់ពេលនេះ គេនៅមិនទាន់ដឹងនោះទេថាសមយុទ្ធខាងលើនឹងធ្វើនៅថ្ងៃណាឲ្យប្រាកដនោះ។
ដោយឡែក បើតាមដំណឹងដែលទើបធ្លាក់មកថ្មីៗ សមយុទ្ធនាខែវិច្ឆិកាក្រោយ នឹងមានទំហំធំជាងលើកមុនៗ។ ជាក់ស្តែង ក្រសួងការពារជាតិអូស្ត្រាលីនិងឥណ្ឌា បានប្រកាសកាលពីល្ងាចថ្ងៃចន្ទ ទី ១៩ តុលាម្សិលមិញនេះរួចហើយអំពីការពង្រីកនូវសមយុទ្ធរួមគ្នា ហើយនេះគឺជាអ្វីដែលប្រទេសជាសមាជិកបានរំពឹងទុកជាយូរមកហើយ។
ជុំវិញរឿងនេះដែរ ក្រសួងការពារជាតិឥណ្ឌាបានបញ្ជាក់ប្រាប់បន្ថែមទៀតថា សមយុទ្ធនេះនឹងប្រព្រឹត្តទៅនៅសមុទ្រអារ៉ាប់ និងឈូងសមុទ្របេងហ្គាល់ដែលជាចំណុចក្តៅ សម្រាប់ការប្រកួតប្រជែងក្រោមយុទ្ធសាស្ត្រឥណ្ឌូប៉ាស៊ីហ្វិក។
ក្នុងរយៈពេលប៉ុន្មានទសវត្សរ៍ចុងក្រោយនេះ ប្រទេសចិនបានព្យាយាមបង្កើនឥទ្ធិពលយ៉ាងខ្លាំង នៅក្នុងប្រទេសភូមា ស្រីលង្កា ប៉ាគីស្ថាននិងបង់ក្លាដែស។ និន្នាការនេះបានបំផុសឲ្យមានការព្រួយបារម្ភយ៉ាងខ្លាំងនៅទីក្រុងញូវដែលី។
ទាក់ទងរឿងនេះដែរ គួរបញ្ជាក់ជូនបន្តិចថា ការចូលរួមរបស់អូស្ត្រាលីនាឆ្នាំនេះ មានន័យថាសមាជិកទាំងបួននៃប្រទេស បក្សសម្ព័ន្ធចតុភាគី ឬដែលគេហៅថាភាសាអង់គ្លេសថា “Quad” នឹងពួតដៃគ្នា ចូលរួមក្នុងសមយុទ្ធទ័ពជើងទឹក ជាលើកដំបូងហើយ រាប់ចាប់តាំងពីឆ្នាំ ២០០៧ មក។
កាលពីឆ្នាំ ២០០៧ ទ័ពជើងទឹកអូស្ត្រាលី ធ្លាប់បានចូលរួមធ្វើសមយុទ្ធក្នុងបក្សសម្ព័ន្ធចតុភាគីម្តងដែរ ហើយវត្តមានរបស់អូស្ត្រាលីកាលណោះបានបញ្ឆេះកំហឹងចិនជាខ្លាំង និងក៏បានធ្វើឲ្យទំនាក់ទំនងនៃប្រទេសទាំងពីរធ្លាក់ដុនដាបខ្លាំងម្តងរួចមកហើយដែរ។
ចិនកើតទុក្ខមិនសុខចិត្ត
ជាការពិតក្នុងចំណោមប្រទេសទាំង៤មាន សហរដ្ឋអាមេរិក ជប៉ុន ឥណ្ឌា និងអូស្ត្រាលី គ្មានប្រទេសណាមួយ ដែលថាមិនមានបញ្ហាជាមួយចិន ឬក៏មានទំនាក់ទំនងល្អូកល្អឺនជាមួយចិនឡើយ។
ដូចដឹងស្រាប់ហើយថា អូស្ត្រាលីនាពេលប៉ុន្មានខែថ្មីៗនេះ កំពុងជួបភាពតានតឹងខ្លាំងជាមួយចិនដោយសាររឿងដោះដូរពាណិជ្ជកម្ម។ ឯកងទ័ពឥណ្ឌា និងចិន បានប៉ះទង្គិចគ្នានៅតាមបណ្តោយព្រំដែនរវាងប្រទេសទាំងពីរនៅហិម៉ាឡៃយ៉ាកាលពីខែមិថុនាកន្លងទៅ។
រីឯ ជប៉ុន និងចិនវិញ ពួកគនៅតែមានជំលោះជុំវិញប្រជុំកោះ សេនកាគូ ឬ ទាវយូ ដោយប្រទេសចិនបានបង្កើនវត្តមាននាវាយាមល្បាតរបស់ខ្លួននៅទីនោះ។ ទន្ទឹមនឹងនេះដែរ អាមេរិក បានបង្កើនបេសកកម្មកងទ័ពជើងទឹកនិងអាកាសរបស់ខ្លួននៅក្នុងតំបន់សមុទ្រចិនខាងត្បូងដែលធ្វើឲ្យចិនខឹងសម្បាយ៉ាងខ្លាំង។
បកត្រលប់មកវិញ សម្រាប់បក្សសម្ព័ន្ធចតុភាគី សមយុទ្ធរួមគ្នារបស់ពួកគេគឺជាគន្លឹះដើម្បីពង្រឹងសមត្ថភាពយោធាខាងដែនសមុទ្រ និងដើម្បីរួមគ្នាការពារផលប្រយោជន៍សន្តិសុខរួមតែប៉ុណ្ណោះ។
តែទោះជាបែបនេះក្តី អ្នកវិភាគជាច្រើនយល់ឃើញថាកិច្ចសហប្រតិបត្តិការរវាងបក្សសម្ព័ន្ធចតុភាគី អាមេរិក ជប៉ុន ឥណ្ឌា និងអូស្ត្រាលី គឺជាកិច្ចខិតខំប្រឹងប្រែងដើម្បីទប់ទល់នឹងឥទ្ធិពលដែលកំពុងកើនឡើងរបស់ចិន។ នៅពេលមានការធ្វើសមយុទ្ធរួមគ្នារវាងកងទ័ពជើងទឹកនៃប្រទេសដៃគូយុទ្ធសាស្ត្រទាំង៤ម្តងៗ ចិនមានចិត្តព្រួយបារម្ភជាលំដាប់។
ដោយឡែក ទាក់ទងនឹងការប្រកាសរបស់អូស្ត្រាលីចូលរួមក្នុងសមយុទ្ធទ័ពបង្គ្រប់ជា ៤ ប្រទេស ក្នុងបក្សសម័្ពន្ធចតុភាគីនាឆ្នាំនេះ គេនៅមិនទាន់ឃើញប្រតិកម្មតបរបស់ចិនយ៉ាងណា នៅឡើយនោះទេ។ ក៏ប៉ុន្តែដូចសព្វមួយដងចឹង ចិនច្បាស់ណាស់នឹងខឹងក្តៅស្លឹកត្រជាក់ ហើយប្រឆាំងដាច់ខាតចំពោះការធ្វើសមយុទ្ធ ដែលចិនចាត់ទុកថាជាសកម្មភាពគំរាមកំហែងដល់សន្តិសុខជាតិរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ