បារាំងប្រឈមនឹងវិបត្តិកូវីដផងនិងការវាយប្រហារភេរវកម្មអ៊ីស្លាមជ្រុលនិយមផង
ចុះផ្សាយនៅថ្ងៃ៖
ស្តាប់ - ០៨:១៣
នៅមួយរយៈពេលចុងក្រោយនេះ ប្រទេសបារាំងបាននិងកំពុងពើបប្រទះបញ្ហាច្រើនជាបន្តបន្ទាប់គ្នា។ ក្រៅពីរងគ្រោះខ្លាំងពីវិបត្តិកូវីដ១៩ និងត្រូវបិទខ្ទប់ប្រទេសឡើងវិញនៅថ្ងៃសុក្រនេះ បារាំងកំពុងជួបវិបត្តិធំមួយថ្មីបន្ថែមទៀត គឺអំពើវាយប្រហារភេរវកម្ម។ ក្រោយការវាយប្រហារសម្លាប់មនុស្សបីនាក់នៅឯវិហារកាតូលិកក្នុងទីក្រុងនីសនាថ្ងៃព្រហស្បតិ៍ម្សិលមិញរួចមក រដ្ឋាភិបាលបារាំងបានបង្កើនការប្រុងប្រយ័ត្នក៏ដូចជាបានដំឡើងកម្រិតអាសន្នភេរវកម្មខ្ពស់បំផុតនៅក្នុងប្រទេស។
បារាំងប្រឈមទៅនឹងវិបត្តិធំៗពីរគឺវិបត្តិកូវីដនិងអំពើវាយប្រហារភេរវកម្មអ៊ីស្លាមជ្រុលនិយម
បច្ចុប្បន្ននេះប្រទេសបារាំង កំពុងជួបបញ្ហាច្រើន។ ម្យ៉ាងដោយសារតែជំងឺរាតត្បាតកូវីដ១៩ នៅបន្តវាយលុកលុយប្រទេសបារាំងខ្លាំង រដ្ឋាភិបាលរបស់លោកម៉ាក្រុង បានដាក់ចេញនូវវិធានការបិទខ្ទប់ប្រទេសជាថ្មី រយៈពេលមួយខែចាប់ពីថ្ងៃសុក្រ ទី ៣០ តុលានេះ ដល់ថ្ងៃទី១ ធ្នូ ឆ្នាំ២០២០។
នៅខណៈពេលដែលបារាំងកំពុងប្រឈមទៅនឹងរលកឆ្លងជំងឺកូវីដ១៩ ខ្លាំងជាលើកទី២ បារាំងក៏ត្រូវប្រឈមនឹងបញ្ហាធំថ្មីមួយបន្ថែមទៀតនោះគឺអំពើភេរវកម្មដែលរដ្ឋបារាំងឲ្យឈ្មោះថាជាវិបត្តិនៃការវាយប្រហារភេរវកម្មអ៊ីស្លាមជ្រុលនិយម។
ក្រោយភេរវកម្មសម្លាប់មនុស្ស ៣នាក់ក្នុងទីក្រុងនីសនាថ្ងៃព្រហស្បតិ៍ ទី២៩ តុលាម្សិលមិញនេះ អាជ្ញាធរបារាំងបានបើកការស៊ើបអង្កេតភ្លាមៗ និងឈានដល់កំណត់អត្តសញ្ញាណជនសង្ស័យ និងបានចាប់ខ្លួនអ្នកជាប់ពាក់ព័ន្ធម្នាក់ទៀត។
ជនសង្ស័យបានប្រាប់ថាខ្លួនមានឈ្មោះហៅថា ប្រាហ៊ីម "Brahim Aouissaoui" ហើយបើតាមការណ៍ឲ្យដឹងពីប៉ូលិសបារាំង ជនសង្ស័យគឺជាបុរសមានអាយុ ២១ ឆ្នាំ ជាជាតិទុយនីស៊ី និងដែលទើបតែបានមកដល់ប្រទេសបារាំងកាលពីដើមខែតុលានេះ ពោលគឺនៅថ្ងៃទី ៩ តុលា។
ជនសង្ស័យប្រាហ៊ីម បានធ្វើដំណើរមកអឺរ៉ុបតាមរយៈទូកដឹកជនភៀសខ្លួនដោយឆ្លងកាត់ កោះឡាំពេដុស្យា (Lampedusa) របស់អ៊ីតាលីមុននឹងមកដល់ទឹកដីបារាំង។ រដ្ឋអាជ្ញាប្រឆាំងអំពើភេរវកម្មបារាំងលោកហ្សង់- ហ្វ្រង់ស័ររីឆាតបានឲ្យដឹងថាជនវាយប្រហារខាងលើនេះមានច្បាប់ចម្លងកម្ពីរកូរ៉ានមួយ ទូរសព្ទ ២ និងកាំបិតចំនួន ៣ នៅពេលគេដើរចូលព្រះវិហារកាតូលិកនៅកណ្តាលទីក្រុងនីសនាវេលាម៉ោងប្រមាណ ៨ និង ៣០ នាទីព្រឹកម៉ោងនៅក្នុងស្រុកបារាំង។
ជនមានចិត្តសាហាវនេះបានកាត់បំពង់ករបស់ស្ត្រីអាយុ ៦០ឆ្នាំ និងបុរសអាយុ ៥៥ ឆ្នាំម្នាក់ដែលធ្វើការនៅព្រះវិហារ និងបន្ទាប់មកទៀតបានចាក់ស្ត្រីម្នាក់ទៀតអាយុ ៤៤ ឆ្នាំ ដែលបានរត់គេចរកជំនួយដែរតែក្រោយមកបានស្លាប់ដោយសាររបួសរបស់គាត់ធ្ងន់ធ្ងរពេក។
ក្រៅពីនេះប៉ូលិសបារាំងបានចាប់ឃុំខ្លួនបុរសវ័យ ៤៧ ម្នាក់ផងដែរកាលពីយប់ថ្ងៃព្រហស្បតិ៍ម្សិលមិញ។ គេជឿថាបុរសវ័យ ៤៧ ឆ្នាំរូបនេះ បានទាក់ទងជាមួយនឹងជនសង្ស័យ និងត្រូវបានចាប់ឃុំខ្លួនដើម្បីសាកសួរជុំវិញអំពើភេរវកម្មខាងលើនេះ។
តើបារាំងបានចាត់វិធានការអ្វីខ្លះដើម្បីការពារខ្លួនពីការវាយប្រហារភេរវកម្មជាថ្មីទៀត?
ប៉ុន្មានម៉ោងក្រោយហេតុការណ៍ចាក់សម្លាប់ លោកប្រធានាធិបតីបារាំងអេម៉ានុយអែល ម៉ាក្រុងបានអញ្ជើញទៅដល់កន្លែងកើតហេតុដើម្បីបង្ហាញពីការយកចិត្តទុកដាក់របស់រដ្ឋាភិបាលចំពោះសុខទុក្ខរបស់ប្រជាជនបារាំង។
នៅពេលផ្តល់បទសម្ភាសន៍ទៅកាន់អ្នកយកសារព័ត៌មាន លោកប្រមុខរដ្ឋបារាំងបានចាត់ទុកការប្រហារខាងលើថាជាអំពើវាយប្រហារភេរវកម្មអ៊ីស្លាមជ្រុលនិយម និងបានដំឡើងកម្រិតអាសន្នភេរវកម្មក៏ដូចជាបានបង្កើនការប្រុងប្រយ័ត្នខ្ពស់បំផុតនៅក្នុងប្រទេសនៅមុនថ្ងៃឈប់សម្រាកបុណ្យសាសនា Toussaint នាថ្ងៃអាទិត្យនេះផងដែរ។
លោកម៉ាក្រុង បានប្តេជ្ញាថាប្រទេសបារាំងនឹងប្រកាន់ជំហររឹងមាំប្រយុទ្ធប្រឆាំងទល់នឹងក្រុមអ៊ីស្លាមជ្រុលនិយម។ មួយវិញទៀត ដើម្បីការពារសុខសុវត្ថិភាពរបស់ប្រជាជាតិបារាំង លោកម៉ាក្រុង បាននិយាយដែរថាទាហានរាប់ពាន់នាក់បន្ថែមទៀតនឹងត្រូវដាក់ពង្រាយដើម្បីការពារសន្តិសុខនៅតាមទីតាំងសំខាន់ៗជាច្រើនរួមមានជាអាទិ៍ ទីសក្ការៈបូជា និងសាលារៀនជាដើម។ល។
លើសពីនេះ ដើម្បីឆ្លើយតបទៅនឹងវិបត្តិថ្មីមួយនេះឲ្យកាន់តែមានប្រសិទ្ធភាព លោកម៉ាក្រុងក៏បានបើកកិច្ចប្រជុំបន្ទាន់មួយស្តីពីការវាយប្រហារភេរវកម្មជាមួយរដ្ឋមន្រ្តីជាន់ខ្ពស់បារាំងជាច្រើនរូបនៅព្រឹកថ្ងៃសុក្រម៉ោងនៅប្រទេសបារាំងនេះដែរ។
សហគមន៍អន្តរជាតិបង្ហាញជំហរប្រឆាំងទៅនឹងអំពើវាយប្រហារភេរវកម្មមកលើបារាំង
ក្រោយទទួលបានដំណឹងអំពីហេតុការណ៍វាយប្រហារដោយកាំបិតដែលបណ្តាលឲ្យមនុស្សបីនាក់ស្លាប់នៅក្នុងទីក្រុងនីសនៃប្រទេសបារាំងរួចមក បណ្តាប្រទេសជាច្រើនមានដូចជាសរហរដ្ឋអាមេរិក អាល្លឺម៉ង់ អង់គ្លេស រុស្ស៊ី និងអង្គការសហប្រជាជាតិជាដើម បានចូលរួមរំលែកទុកជាមួយប្រទេសបារាំង ក៏ដូចជាប្រជាជាតិបារាំងទាំងមូលដែរ។
ជាក់ស្តែង អគ្គលេខាធិកាអង្គការសហប្រជាជាតិលោកអង់តូនីញ៉ូ ហ្គូទែរស៍ តាមរយៈអ្នកនាំពាក្យរបស់លោកបានលើកឡើងពីជំហរថ្កោលទោសយ៉ាងខ្លាំងចំពោះការវាយប្រហារដ៏សាហាវនៅទីក្រុងនីស។
ពីទីក្រុងឡុងដ៍នៃប្រទេសអង់គ្លេសឯណោះវិញ លោកនាយករដ្ឋមន្រ្តីបូរីស ចនសុនបានសម្តែងនូវការភ្ញាក់ផ្អើលចំពោះ “អំពើវាយប្រហារដ៏សាហាវ” នៅក្នុងសារមួយដែលលោកបានសរសេរជាភាសាបារាំង។ លោកចនសុនបានសរសេរថា “ ចក្រភពអង់គ្លេស ឈរនៅខាងបារាំងដើម្បីប្រយុទ្ធប្រឆាំងនឹងអំពើភេរវកម្ម និងអំពើព្រៃផ្សៃដែលមិនគួរឲ្យអត់ឱនបាន”។
ក្រៅពីនេះ មានមេដឹកនាំនៅតាមស្ថាប័នធំៗជាច្រើនទៀតក៏បានចូលរួមតាមរយៈបណ្តាញសង្គមផងដែរដើម្បីបង្ហាញពីសាមគ្គីភាពរបស់ពួកគេជាមួយប្រទេសបារាំងរួមមានទាំងប្រធានគណៈកម្មការអឺរ៉ុបលោកស្រីអួរស៊ូឡា វ៉ុនឌែរ ឡេយែន (Ursula von der Leyen) ដែលបាននិយាយថា “ អឺរ៉ុបទាំងអស់គឺមានសាមគ្គីភាពជាមួយបារាំង”។
ពីសហរដ្ឋអាមេរិកឯណោះវិញ ទោះបីជាជាប់ដៃរវល់ខ្លាំងជាមួយនឹងការធ្វើយុទ្ធនាការបោះឆ្នោតយ៉ាងណាក្តី ក៏លោកប្រធានាធិបតីអាមេរិកដូណាល់ ត្រាំ បានឆ្លៀតបង្ហាញពីសាមគ្គីភាពជាមួយបារាំងដោយបានហៅថាការវាយប្រហារភេរវកម្ម ថាជារឿងមិនអាចទទួលយកបានឡើយ និងថាអាមេរិកនៅឈរជាមួយបារាំង ដែលជាសម្ព័ន្ធមិត្តដ៏យូរអង្វែងរបស់ខ្លួនក្នុងការប្រយុទ្ធប្រឆាំងនឹងអំពើវាយប្រហារភេរវកម្មអ៊ីស្លាមជ្រុលនិយម។
យ៉ាងណាក៏ដោយ កាលពីម្សិលមិញនេះក្រោយការវាយប្រហារនៅទីក្រុងនីស គេមានការភ្ញាក់ផ្អើលដោយឃើញលោកមហាធៀរ មហាម៉ាត់ អតីតនាយករដ្ឋមន្ត្រីម៉ាឡេស៊ី បង្ហោះសារដែលបង្កប់ដោយកំហឹងនៅលើគណនីធ្វីតទ័របស់លោកថា “ ប្រជាជនអ៊ីស្លាមមានសិទ្ធិខឹង និងសម្លាប់ប្រជាជនបារាំងរាប់លាននាក់ ចំពោះបាបកម្ម-អំពើដែលបារាំងបានធ្វើនៅអតីតកាល”។ តែក្រោយបន្តិចភ្លាមៗនោះ ក្រុមហ៊ុនធ្វីតទ័របានលុបសាររបស់លោកចេញ។
មានមតិជាច្រើនបានលើកឡើងថា សារដែលបង្កប់កំហឹងនិងមានទម្ងន់ជំរុញឲ្យស្ថានការណ៍ពិភពលោកធ្លាក់អាក្រក់បែបនេះ មិនគួរចេញពីមាត់មេដឹកនាំ ឬអតីតមេដឹកម្នាក់នោះទេ ពីព្រោះថាសន្តិភាពកើតចេញពីការចេះយោគយល់អធ្យាស្រ័យ ការអត់ឱន និងការគោរពសិទ្ធិគ្នាទៅវិញទៅមក។
ជាមួយគ្នានេះដែរ ដើម្បីកុំឲ្យមានការយល់ច្រឡំ កាលពីយប់ម្សិលមិញនេះ រដ្ឋមន្រ្តីក្រសួងការបរទេសបារាំងលោកហ្សង់- អ៊ីវ៉េឡឺឌ្រីយង់ (Jean-Yves Le Drian) បានផ្ញើសារសន្តិភាពទៅកាន់ប្រជាជនអ្នកកាន់សាសនាអ៊ីស្លាមទាំងអស់ដោយអះអាងថាបារាំង គឺជាប្រទេសដែលមានការអត់ឱន គោរពសិទ្ធិសេរីភាពជាទីបំផុត។ លោកបានបន្ថែមទៀតថាសូមកុំឲ្យអ្នកកាន់សាសនាអ៊ីស្លាមជឿពាក្យឃោសនាបង្កាច់បង្ខូចបារាំងឲ្យសោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ