បារាំងប្តេជ្ញាប្រយុទ្ធនឹងចរន្តអ៊ីស្លាមជ្រុលនិយម តែព្យាយាមរំងាប់មតិស្អប់បារាំងពីអ្នកកាន់សាសនាអ៊ីស្លាម
ថ្មីៗនេះ ប្រធានាធិបតីតួកគី បានប្រើភាសាអសុរស ចាត់ទុកលោកម៉ាក្រុង ប្រធានាធិបតីបារាំង ថាជាមនុស្សមានបញ្ហាខួរក្បាល បន្ទាប់ពីលោកម៉ាក្រុង បានដាក់ចុះនូវវិធានការប្រយុទ្ធប្រឆាំងនឹងចរន្តអ៊ីស្លាមជ្រុលនិយម នៅក្នុងប្រទេសបារាំង។ លោកអ៊ែរដូហ្កាន់ បានទាំងហៅឲ្យអ្នកកាន់សាសនាអ៊ីស្លាមទូទាំងពិភពលោក ត្រូវធ្វើពហិកា ឈប់ប្រើផលិតផលបារាំង ថែមទៀតផង។ ប្រឈមនឹងបញ្ហានេះ រដ្ឋាភិបាល កាលពីថ្ងៃចន្ទម្សិលមិញ បានបង្ហាញជំហរម៉ឺងម៉ាត់ ក្នុងការបោសសំអាតទ្រឹស្តីអ៊ីស្លាមបែបផ្តាច់ការ តែទន្ទឹមនឹងនេះដែរ បារាំងក៏មានចេតនា រំងាប់មតិដែលស្អប់បារាំង របស់អ្នកកាន់សាសនាអ៊ីស្លាម ដែលជឿតាមការស្រែកអំពាវនាវ របស់លោកប្រធានាធិបតីតួកគី។
ចុះផ្សាយនៅថ្ងៃ៖
ស្តាប់ - ០២:៤៧
លោក អ៊ែរដូហ្កាន់ បានស្រែកក្តែងៗ ហៅលោកម៉ាក្រុង ថាជាមនុស្សមានបញ្ហាខួរក្បាល ហើយនិងបានចាត់ទុកប្រទេសបារាំង ថាជាប្រទេសដែលស្អប់ខ្ពើមសាសនាអ៊ីស្លាម។ ក្រៅពីបានដៀលត្មេះ ប្រធានាធិបតីបារាំង លោកអ៊ែរដូហ្កាន់បានទាំងអំពាវនាវ ឲ្យអ្នកកាន់សាសនាអ៊ីស្លាមទូទាំងពិភពលោក ត្រូវធ្វើពហិការឈប់ប្រើផលិតផលបារាំង។ ជាមួយនឹងសារតាមបណ្តាញសង្គម ការអំពាវនាវញុះញង់ឲ្យស្អប់បារាំងនេះ បានរីកសាយភាពយ៉ាងឆាប់រហ័ស។
គួរបញ្ជាក់ថា សង្រ្គាមពាក្យសម្តីនេះ គឺបន្ទាប់ពីរដ្ឋាភិបាលបារាំង បានចេញវិធានការតឹងតែង ដើម្បីបោសសំអាតចរន្តទ្រឹស្តីអ៊ីស្លាមជ្រុលនិយម បែបភេរវកម្ម ដែលកំពុងតែរីកសាយភាយនៅក្នុងប្រទេសបារាំង។ គឺទ្រឹស្តីអ៊ីស្លាមជ្រុលនិយមនេះហើយ ដែលបានជំរុញឲ្យភេរវជនងប់ងុលម្នាក់ សម្លាប់កាត់ក្បាល លោកគ្រូ Samuel Paty កាលពីថ្ងៃទី១៦តុលា ដោយសារតែលោកគ្រូបង្រៀនរូបនេះ បានយករូបត្លុកព្រះអាឡា មកពន្យល់បង្ហាញសិស្សក្នុងថ្នាក់។ ខណៈដែលគ្រប់ប្រទេស បានថ្លែងសារថ្កោលទោលអំពើនេះភ្លាមៗ តួកគីឯនេះ ទើបតែបានថ្កោសទោសអំពើព្រៃផ្សៃនេះ នៅថ្ងៃចន្ទី២៦តុលាប៉ុណ្ណោះ។
ប្រឈមនឹងបញ្ហានេះ លោកប្រធានាធិបតីម៉ាក្រុង បានសរសេរសារមួយជាភាសាបារាំង ភាសាអង់គ្លេស និងជាភាសាអារ៉ាប់ នៅលើបណ្តាញ Twitter ដោយលោកបានលើកឡើងថា ៖ រដ្ឋាភិបាលបារាំង គោរពនូវរាល់ភាពខុសគ្នាក្នុងសង្គម ជាមួយនឹងស្មារតីសន្តិភាព។ បារាំងមិនអាចទទួលបានជាដាច់ខាត ចំពោះសម្តីផ្សព្វផ្សាយញុះញង់ ឲ្យមានការស្អប់ខ្ពើមគ្នា រវាងមនុស្សនឹងមនុស្ស ហើយរដ្ឋបារាំងនឹងនៅតែបន្តការពារជានិច្ច នូវការជជែក ដោះដូរយោបល់ គំនិតយល់ឃើញផ្សេងៗគ្នា ប្រកបដោយការគោរពគ្នា។
គួរកត់សំគាល់ថា តាមរយៈសារជាភាសាអារ៉ាប់នេះ គឺលោកម៉ាក្រុងមានបំណងផ្សព្វផ្សាយ ឲ្យអ្នកកាន់សាសនាអ៊ីស្លាមទូទាំងពិភពលោក បានយល់ច្បាស់ ពីគោលនយោបាយរបស់រដ្ឋាភិបាលបារាំង ដែលប្តេជ្ញាប្រយុទ្ធប្រឆាំងនឹងចរន្តអ៊ីស្លាមផ្តាច់ការជ្រុលនិយម ព្រោះវាផ្ទុយនឹងច្បាប់បារាំង ដែលឲ្យតម្លៃសិទ្ធិសេរីភាពបញ្ចេញមតិជាធំ។ ទន្ទឹមនឹងនេះដែរ រដ្ឋាភិបាលបារាំង មានបំណងរំងាប់ ចរន្តគំនិតស្អប់បារាំងដោយយល់ខុស បើទោះបីជាការធ្វើពហិការលើទំនិញបារាំង មានផលប៉ះពាល់តិចតួចប៉ុណ្ណោះ សម្រាប់សេដ្ឋកិច្ចបារាំងនាពេលនេះ។
នៅថ្ងៃចន្ទដែរ លោកម៉ាក្រុង បានអញ្ជើញ ប្រធានក្រុមប្រឹក្សាសាសនាអ៊ីស្លាមនៅបារាំង (CFCM) ឲ្យចូលជួប។ លោក Mohammed Moussaoui ប្រធានក្រុមប្រឹក្សានេះ បានលើកឡើងថា ប្រជាជនបារាំងដែលកាន់សាសនាអ៊ីស្លាមទាំងអស់ ត្រូវរួមគ្នា ជួយការពារប្រយោជន៍ជាតិ ប្រឈមនឹងពាក្យឃោសនាញុះញង់ទាំងអស់នេះ។
ដោយឡែក លោកស្រីអង់ហ្គេឡា មែរកិល ព្រមទាំងថ្នាក់ដឹកនាំប្រទេសសហភាពអឺរ៉ុបផ្សេងទៀត បានថ្លែងសារសម្តែងការគាំទ្រលោកម៉ាក្រុង និងបានចាត់ទុកសម្តីរបស់លោកអ៊ែរដូហ្កាន់ ថាជាសម្តីបង្កាច់បង្ខូចកិត្តិយសបារាំង។ លោក Clément Beaune រដ្ឋលេខាធិការបារាំង ទទួលបន្ទុកកិច្ចការអឺរ៉ុប បានលើកឡើងថា លោកអ៊ែរដូហ្កាន់ កំពុងតែឆក់ឱកាស ដោយគ្មានភាពអៀនខ្មាស ដើម្បីបំពេញមហិច្ឆិតា អួតថាខ្លួន ជាកំពូលមេដឹកនាំតែម្នាក់គត់ ដែលការពារអ្នកកាន់សាសនាអ៊ីស្លាម ទូទាំងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ