ហេតុអ្វីបានជាAstra Zeneca បើកការសិក្សាបន្ថែមលើវ៉ាក់សាំង ដែលខ្លួនទើបរកឃើញ?
ចុះផ្សាយនៅថ្ងៃ៖
ស្តាប់ - ០៨:០៨
មន្ទីរពិសោធន៍របស់ក្រុមហ៊ុនផលិតឱសថ Astra Zeneca បានបង្កើតភាពស្រពិចស្រពិលជុំវិញ វ៉ាក់សាំង ប្រឆាំងកូវីដ ១៩ ដែលមន្ទីរពិសោធន៍អង់គ្លេស មួយនេះ ទើបបានប្រកាស នៅដើមសប្តាហ៍នេះ ថា មានប្រសិទ្ធិភាពជាមធ្យម ៧០ភាគរយ។ នៅថ្ងៃព្រហស្បតិ៍ទី ២៦ វិច្ឆិកា នៅក្នុងបទសម្ភាសន៍ជាមួយទូរទស្សន៍អាមេរិក Bloomberg ថ្នាក់ដឹកនាំរបស់ក្រុមហ៊ុនផលិតវ៉ាក់សាំង កូវីដ Astra Zeneca គឺលោក Pascal Soriotទទួលស្គាល់ថា ទិន្នន័យលទ្ធផលសាកល្បងវ៉ាក់សាំងរបស់Astra Zeneca មានបញ្ហា ដែលធ្វើឲ្យក្រុមហ៊ុនត្រូវសិក្សាឡើងវិញ។
ប្រធានក្រុមហ៊ុន Astra Zenecaប្រកាសបើកការសិក្សាថ្មី គឺនៅបន្ទាប់ពីការរិះគន់លើប្រសិទ្ធិភាពរបស់វ៉ាក់សាំងប្រឆាំងកូវីដ ដែល Astra Zenecaបានប្រកាសថា មានប្រសិទ្ធិភាពជាមធ្យម ៧០ភាគរយ។
នៅពីក្រោយពាក្យ ជាមធ្យម ៧០ភាគរយ តាមពិតមានបង្កប់ នូវទិន្នន័យពីផ្សេងគ្នា និងបានមកពីការធ្វើតេស្តសាកល្បង ពីរបែបផ្សេងគ្នា។ របាយការណ៍លម្អិតរបស់ Astra Zenecaបានបង្ហាញថា ប្រសិទ្ធិភាពរបស់វ៉ាក់សាំង អាចឡើងដល់ ៩០% ចំពោះក្រុមដែល បានទទួលចាក់វ៉ាក់សាំងដំបូង តែកន្លះដូស និងបន្ទាប់មកគឺបានទទួលមួយដូសពេញនៅមួយខែក្រោយ។ ចំណែកក្រុមដែលទទួលបានមួយដូសពេញ ទាំងលើកទីមួយនិងលើកទីពីរវិញ ប្រសិទ្ធភាពរបស់វ៉ាក់សាំង បានធ្លាក់ចុះមកនៅត្រឹម៦២%។
គឺគម្លាតប្រសិទ្ធិភាពរបស់វ៉ាក់សាំងនេះហើយដែលធ្វើឲ្យអ្នកវិទ្យាសាស្រ្តចោទជាសំណួរ និងបានស្រាវជ្រាវទៅ រកឃើញថា ក្រុមហ៊ុន ដែលទទួលបន្ទុក ធ្វើតេស្តសាកល្បងវ៉ាក់សាំង នៅទឹកដីអាមេរិក បានប្រព្រឹត្តកំហុសបច្ចេកទេស នៅក្នុងពេលធ្វើតេស្តសាកល្បង។
គេរកឃើញថា ប្រសិទ្ធិភាពរបស់វ៉ាក់សាំង របស់Astra Zeneca ដែលមានដល់ ៩០ភាគរយ គឺកើតឡើងដោយចៃដន្យ ដោយសារតែកំហុសបច្ចេកទេស របស់មនុស្ស។ ដើមឡើយ គេតម្រូវឲ្យចាក់ពីរដូស នៅរវាងរយៈពេល១ខែ។ ប៉ុន្តែ ក្រុមហ៊ុននៅអាមេរិក ដែលទទួលបន្ទុក សាកល្បង ច្រលំ ចាក់តែកន្លះដូស នៅលើកទី១ និង១ដូសពេញ នៅមួយខែក្រោយ។ ក្រុមហ៊ុន Astra Zenecaប្រកាសបើកការសិក្សាឡើងវិញ ក៏ព្រោះតែឃើញថា វិធីចាក់វ៉ាក់សាំង តែកន្លះដូស នៅលើកទី១ មានប្រសិទ្ធិភាព ដល់ទៅ ៩០ភាគរយ គឺ ខ្ពស់ជាង ការចាក់វ៉ាក់សាំង ពីរដូសពេញៗ ដែលមានប្រសិទ្ធិភាពត្រឹមតែ ៦០ភាគរយ។ ក្រុមហ៊ុនត្រូវសិក្សាលម្អិតបន្ថែមទៀត ព្រោះថា អ្នកដែលបានទទួលចាក់វ៉ាក់សាំងដោយច្រលំដូស មានតែ ៣ពាន់នាក់ តែប៉ុណ្ណោះ គឺមិនច្រើនក្នុងទ្រង់ទ្រាយធំ សក្តិសមនឹងដំណាក់កាលសាកល្បងទី៣នោះទេ។ ម្យ៉ាងទៀត ប្រសិទ្ធិភាពរបស់វ៉ាក់សាំង ដល់ទៅ ៩០ភាគរយ មានតែក្នុងចំណោមមនុស្ស ដែលអាយុ ក្រោម ៥៥ឆ្នាំ ដែលជារឿងធ្វើឲ្យគេមិនសូវពេញចិត្ត ខ្លាំងនោះទេ ព្រោះថា វ៉ាក់សាំងនៅតែមិនទាន់មានប្រសិទ្ធិភាព ខ្ពស់សម្រាប់ក្រុមមនុស្សចាស់ ដែលជាក្រុមមនុស្សងាយរងគ្រោះ ដែលតាមពិត ត្រូវការចាំបាច់វ៉ាក់សាំង ជាងក្រុមមនុស្សដែលមានវ័យ ក្រោម ៥៥ឆ្នាំ។
ការប្រកាសបើកការសិក្សាបន្ថែម លើវ៉ាក់សាំងរបស់Astra Zeneca ធ្វើឲ្យទំនុកចិត្តលើវ៉ាក់សាំងកាន់តែធ្លាក់ចុះ អាក្រក់មួយកម្រិតទៀត
ការបិទបាំង កំហុសបច្ចេកទេសរបស់ខ្លួន នៅក្នុងពេលសាកល្បង វ៉ាក់សាំងក្នុងដំណាក់កាលទី៣ បានធ្វើឲ្យ ក្រុមហ៊ុន Astra Zeneca រងការរិះគន់ និងធ្វើឲ្យគេកាន់តែលែងជឿទុកចិត្តលើក្រុមហ៊ុនផលិតឱសថ។ ការស្រាវជ្រាវរកវ៉ាក់សាំង បានក្នុងពេលវេលាខ្លីដ៏សែនខ្លី បានធ្វើឲ្យគេមិនសូវជឿទុកចិត្តលើប្រសិទ្ធិភាពរបស់វ៉ាក់សាំងរួចទៅហើយ នេះគេនៅមិនទាន់និយាយពីផលប៉ះពាល់របស់វា ដែលអាចមានទៅលើសុខភាព របស់មនុស្ស នៅ ថ្ងៃអនាគតផង។
ករណីរបស់ Astra Zenecaបង្ហាញឲ្យឃើញថា ក្រុមហ៊ុនធ្វើការធ្វេសប្រហែស ចាក់ច្រលំ ចំនួនដូស ប៉ុន្តែ បានបិទបាំង មិនឲ្យសាធារណជនដឹងទេ។ ទោះជាដឹងថា ខ្លួនចាក់ច្រលំ ចំនួនដូស ប៉ុន្តែ ក្រុមហ៊ុន នៅតែបន្ត ធ្វើ ហើយបានព្យាយាមបិទបាំង កំហុសបច្ចេកទេសរបស់ខ្លួន។ មួយវិញទៀត នៅពីក្រោយ តួលេខ ប្រសិទ្ធិភាព វ៉ាក់សាំង ដល់ទៅ ៩០ភាគរយ Astra Zenecaមិនបានបញ្ជាក់អាយុរបស់អ្នកដែលបានទទួលវ៉ាក់សាំងនោះទេ។ តាមអាជ្ញាធរអាមេរិក Warp Speed ដែលតាមដានដំណើរការតេស្តរបស់ Astra Zenecaនៅអាមេរិក វ៉ាក់សាំងរបស់ Astra Zenecaដែលចាក់ច្រលំ មានប្រសិទ្ធិភាព សម្រាប់តែអ្នកដែលមានអាយុ ក្រោម ៥៥ឆ្នាំ។ Astra Zenecaមិនបានបញ្ជាក់លម្អិត ដែលជាហេតុធ្វើឲ្យមនុស្សទូទៅអាចជឿថា វ៉ាក់សាំង របស់ Astra Zenecaអាចមានប្រសិទ្ធិភាព ៩០ភាគរយ សម្រាប់មនុស្សទូទៅ គ្រប់អាយុ។
ហេតុអ្វីបានជាគេមិនអាចផ្តោតសំខាន់តែ ទៅលើភាគរយនៃប្រសិទ្ធិភាពរបស់វ៉ាក់សាំង?
វ៉ាក់សាំងមួយមានប្រសិទ្ធភាពប៉ុណ្ណា គេមិនមើលតែទៅលើកម្រិតភាគរយនោះទេ។ គេត្រូវមើលទៅលើទិដ្ឋភាពផ្សេងទៀតរបស់វ៉ាក់សាំង ដែលមានតាំងពីថេរវេលានៃប្រព័ន្ធការពារខ្លួន ដែលវ៉ាក់សាំងជួយទៅ បង្កើតសម្រាប់ទប់ទល់មេរោគកូរ៉ូណា ប្រសិទ្ធិភាពរបស់វ៉ាក់សាំង ទៅលើក្រុមមនុស្សដែលងាយរងគ្រោះ គឺ មនុស្សចាស់ ហើយនិងតម្លៃ របស់វា។
វ៉ាក់សាំងរបស់ ក្រុមហ៊ុន Pfizer និងModerna មានប្រសិទ្ធិភាពខ្ពស់ដល់ទៅ ៩៥%ប៉ុន្តែតម្លៃរបស់វាថ្លៃខ្លាំងណាស់ ដល់ទៅ៣០ ទៅ ៤០ដុល្លារ ចំណែក រឿងស្តុក វ៉ាក់សាំងក៏ស្មុគស្មាញ ពិបាក ព្រោះវាត្រូវការកន្លែងស្តុក នៅកន្លែងត្រជាក់ខ្លាំង ដល់ក្រោម ២០ ឬ ៧០អង្សារ។
វ៉ាក់សាំងរបស់Astrazeneca វិញ ត្បិតតែមានប្រសិទ្ធិភាពត្រឹម ៧០ភាគរយ ប៉ុន្តែ វាមានតម្លៃថោក ត្រឹមតែ ៨ដុល្លារ ចំនែក កន្លែងស្តុក គឺត្រឹមតែទូទឹកកកធម្មតា ដែលជាហេតុធ្វើឲ្យគេជឿថា វ៉ាក់សាំង Astra Zenecaនឹងអាចត្រូវគេចាយចាយ និងមានប្រសិទ្ធិភាពទូលំទូលាយជាងវ៉ាក់សាំងរបស់Pfizer Moderna។ ប៉ុន្តែ ចំណោទចុងក្រោយសម្រាប់វ៉ាក់សាំងរបស់ក្រុមហ៊ុនទាំងបី ដូចគ្នា គឺរយៈពេល នៃប្រសិទ្ធិភាពរបស់វ៉ាក់សាំង។ គេនៅតែមិនដឹងថា តើវ៉ាក់សាំងនឹងអាចជួយការពារកុំឲ្យគេអាចឆ្លងមេរោគកូរ៉ូណា បានក្នុងរយៈពេលប៉ុណ្ណានៅឡើយ
Astra Zenecaប្រកាសបើកការសិក្សាឡើងវិញ ប៉ុន្តែ ក៏នៅតែបន្តផលិតវ៉ាក់សាំងតាមគម្រោង
តាមប្រធានក្រុមហ៊ុន Astra Zenecaការសិក្សាបន្ថែម លើប្រសិទ្ធិភាពរបស់វ៉ាក់សាំងនឹងមិនប៉ះពាល់ដំណើរការ ដាក់ពាក្យសុំសិទ្ធិធ្វើចរាចរណ៍ និងប្រើប្រាស់ថ្នាំបង្ការនោះទេ។ ក្រុមហ៊ុនសង្ឃឹមថា នឹងបញ្ចប់ដំណាក់កាលសិក្សាថ្មី នៅក្នុងពេលដ៏ខ្លី ឆាប់ៗខាងមុខ។ តាមប្រធានក្រុមហ៊ុន Astra Zenecaដដែល ទោះជាក្រុមហ៊ុនចាប់សិក្សាថ្មីឡើងវិញ ប៉ុន្តែ ក្រុមហ៊ុននៅតែបន្តដំណើរការ សុំចុះឈ្មោះ ដាក់ឲ្យចរាចរណ៍វ៉ាក់សាំង តាមធម្មតា។ ដោយសារតែថ្នាំវ៉ាក់សាំងនេះមានភាពងាយស្រួល ក្នុងការទុកដាក់និងចែកចាយ ពិភពលោកនឹងអាចទទួល វ៉ាក់សាំងបង្ការកូវីដ របស់អង់គ្លេស ក្នុងបរិមាណ ៣ពាន់លានដូស នៅក្នុងអំឡុងឆ្នាំ២០២១។
ដោយសារតែក្រុមហ៊ុន Astra Zenecaជាក្រុមហ៊ុនអង់គ្លេស ស្រាវជ្រាវនៅទឹកដី អង់គ្លេស រដ្ឋាភិបាលអង់គ្លេសទើបបានប្រកាសកាលពីថ្ងៃម្សិលមិញថា បានបញ្ជាឲ្យអាជ្ញាធរឱសថជាតិ ចូលសិក្សា ទិន្នន័យវ៉ាក់សាំងរបស់ក្រុមហ៊ុន Astra Zeneca ដែលជាដំណាក់កាលបើកផ្លូវឈានទៅផលិត និងចាក់វ៉ាក់សាំងក្នុងទ្រង់ទ្រាយធំនៅ អង់គ្លេស។
តាមរដ្ឋមន្ត្រីក្រសួងសុខាភិបាលអង់គ្លេស អាជ្ញាធរត្រួតពិនិត្យថ្នាំ ចូលទៅយកទិន្នន័យរបស់ក្រុមហ៊ុន Astra Zenecaមកសិក្សា វាយតម្លៃ ពីសុវត្ថិភាពរបស់វ៉ាក់សាំង។ បើសិន អាជ្ញាធរត្រួតពិនិត្យថ្នាំយល់ព្រម បើកភ្លើងខៀវ នោះរដ្ឋាភិបាលអង់គ្លេសគ្រោងនឹងចាប់ផ្តើមយុទ្ធនាការចាក់វ៉ាក់សាំង ឲ្យបានលឿនបំផុត។ Astra Zenecaបាននិយាយហើយថា វ៉ាក់សាំង ប្រមាណ ៤លានដូស នឹងត្រូវផ្គត់ផ្គង់នៅអង់គ្លេស ឲ្យបានមុនចុងឆ្នាំនេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ